Dagiti Proverbio 1:1-33 RIPV1996 - Bible AI

¹Dagitiⓐ proberbio ni Solomon nga anak ni David ken ari ti Israel.

²Adtoy dagiti proberbio a makatulong kadakayo tapno mailasinyo ti kinasirib ken nasayaat a pammagbaga, tapno maawatanyo dagiti pagsasao a nauneg ti kaipapananda.

³Maisurodakayo nga agbiag a manakem, agbiag iti kinalinteg, kinapudno ken kinatakneng.

⁴Mapagbalinda a masirib dagiti awan padasna ket matulonganda dagiti agtutubo a lallaki a mangusar iti panunotda.

⁵Manayonan dagitoy a proberbio ti pannakaammo dagiti masirib. Maidalanda dagiti adda adalna,

⁶tapno maawatanda dagiti naitalimeng a kaipapanan dagiti proberbio ken dagiti salsaludsod dagiti masirib.

⁷Tapnoⓑ maaddaanka iti ammo, masapul nga agdayaw ken agbutengka iti APO.[1] Laisen dagiti maag ti kinasirib ket dida kayat ti agsursuro.

⁸Anakko, ipangagmo ti ibaga da amam ken inam kenka.

⁹Ti pannursuroda pasayaatenna ti kababalinmo. Mayarigda iti napintas a turban wenno kuentas a mangpapintas iti langam.

¹⁰Anakko, no sulisogendaka dagiti managbasol, dika sumuko.

¹¹Kunada, “Umayka ta intay agbirok iti patayentayo. Pagang-angawantayo a darupen dagiti awan basolna a tattao.

¹²Nalabit a nakaradkad ken sibibiagda no masarakantay ida, ngem nataydanton no malpastayo ti kaykayattayo kadakuada.

¹³Makasaraktayto iti amin a kita ti kinabaknang, ket punnoentayo dagiti balbalaytay iti masamsam.

¹⁴Umayka kumuyog kadakami ket pagbibingayantayto dagiti matakawtayo.”

¹⁵Anakko, dika makikuyog kadagiti kakasta a tattao. Adaywam ida.

¹⁶Aggagarda unay nga agaramid iti dakes ken madadaanda a pumatay.

¹⁷Awan serserbi ti iket a maiwayat no kitkitaen ti tumatayab a kayatmo a tiliwen.

¹⁸Ngem agiwayat dagiti kakasta a tattao iti silo a pakatiliwan ken pakatayandanto met laeng.

¹⁹Awan duadua a ti panagarang, isunto met laeng ti pakatayan ti agarang. Kasta ti pagbanagan[2] ti siasinoman nga agbiag iti kinaranggas.

²⁰Denggem!ⓒ Umaw-awag ti kinasirib kadagiti kalsada ken kadagiti plasa.

²¹Um-umkis kadagiti ruangan ti siudad, ken iti sadinoman a paguummongan dagiti tattao. Kunana:

²²“Dakayo a maag, kasano pay kabayag ti kayatyo a kastoy ti kasasaadyo? Kaanonto a maumakayo a manglalais iti pannakaammo? Dikay kadi makasursuro?

²³Ipangagdak no tubngarenkayo. Balakadankay iti naimbag, ket ipakaammok kadakayo ti adda kaniak a kinasirib.

²⁴Inay-ayabankayo, inaw-awiskayo nga umay ngem didak impangag. Didak inkaskaso.

²⁵Diyo intaltalek dagiti pammagbagak ket diyo impalubos nga aturenkayo.

²⁶Iti kasta, no adda mapagtengyo a rigat, katawaankayto. Pagang-angawankayto inton adda kabutengyo.

²⁷Inton dumteng kadakayo a kas bagio, mangyeg iti nadawel nga angin ti rigat ket aglak-amkay iti ut-ot ken tuok.

²⁸Inton mapasamak dagitoy, tarigagayanyonto ti sirib ngem dikayto ipangag. Birokendakto iti amin a suli ngem didakton masarakan.

²⁹Kinagurayo ti pannakaammo ken diyo kinayat ti agbuteng iti APO.

³⁰Diyo inawat ti pammagbagak ket dikay nangikaskaso idi binabalawkayo.

³¹Ngarud, lak-amenyonto ti bunga ti aramidyo, ket pagsakitennakayto dagiti aramidyo.

³²Matay dagiti tattao nga awan padpadasna ta linaisda ti sirib. Madadael dagiti maag gapu iti dida panangikankano.

³³Ngem natalgedto ti panagbiag ti siasinoman a dumngeg kaniak. Natalgedto ket awanto ti pagbutnganna.”