Dagiti Proverbio 16:1-33 RIPV1996 - Bible AI

¹Agplano ti tao, ngem ti Dios ti mangeddeng.

²Nalabit nga ipagarupmo a husto ti amin nga aramidmo, ngem ti APO ti mangtingiting no ania ti panggepmo.

³Dawatem ti APO a bendisionanna dagiti kayatmo nga aramiden, ket agballigika iti panangibanagmo kadagiti panggepmo.

⁴Adda panungpalan ti amin a pinarsua ti APO. Ket pannakadadael ti panungpalan dagiti managdakdakes.

⁵Kagura ni Yahweh ti amin a napalangguad; pulos a dina ipalubos a malisianda ti pannakadusa.

⁶Agtalinaedkaⓒ a napudno ket pakawanento ti Dios ti basolmo. Agbutengka iti APO ket awanto ti dakes a mapasamakmo.

⁷No maay-ayo kenka ti APO, mapagbalinmo[16] a gayyem dagiti kabusormo.

⁸Nasaysayaatⓓ ti bassit a matgedan a saan a sinaur ngem ti adu a saan a nalinteg ti pannakateggedna.

⁹Sika ti agplano, ngem ti APO ti mangiturong kadagiti aramidmo.

¹⁰Agsao ti ari babaen iti nasantoan a pannakabalin; husto amin a pangngeddengna.

¹¹Kalikaguman ti APO a husto dagiti pagtimbangan ken dagiti pagsukatan, ket awan sinasaur iti panaglako.

¹²Saan nga ipalubos ti ari ti dakes nga aramid;[17] ngamin, ti hustisia ti mangpapigsa iti turay.

¹³Maragsakan ti ari a dumngeg iti pudno ket ayatenna dagiti agsao iti kasta.

¹⁴Tarigagayan ti masirib a paragsaken ti ari; no agpungtot ti ari, mabalin nga adda matay.

¹⁵Mayarig ti parabur ti ari kadagiti ulep a mangyeg iti tudo kadagiti maudi a tiempo ti tudtudo—adda biag sadiay.

¹⁶Nasaysayaat nga adayo ti kinasirib ken ammo ngem ti balitok ken pirak.

¹⁷Agdaliasat ti naimbag a tao iti dalan a mangliklik iti kinadakes; kitaem ngarud ti papanam—mabalin nga isu ti pakaisalakanan ti biagmo.

¹⁸Agturong ti kinatangsit iti pannakadadael ket ti kinapalangguad iti pannakatnag.

¹⁹Nasaysayaat ti napakumbaba iti sidong dagiti napanglaw ngem ti maysa kadagiti napalangguad ket mairamanka iti sinamsamda.

²⁰Ipangagmo ti maisursuro kenka ket agballigikanto. Agtalekka iti APO ket naragsakkanto.

²¹Mabigbigbig a mannakaawat ti tao a masirib ken manakem. Nasayaat ti saona ket ad-adda a makaguyugoy.

²²Iti imatang dagiti masirib, ti kinasirib isu ti ubbog ti biag, ngem bambannog ti mangisuro kadagiti maag.

²³Panunoten nga umuna ti masirib ti sawenna, ket ad-adda ngarud a makaguyugoy ti ibagana.

²⁴Mayarig iti diro dagiti makaay-ayo a sao; nasam-it ti ramanna ket nasayaat iti salun-atmo.

²⁵Addaⓔ dalan a kasla nalinteg iti imatang ti tao, ngem agturong iti patay.

²⁶Gapu iti tarigagayna iti taraon, agsalukag ti mangmangged tapno mapedped ti bisinna.

²⁷Biroken ti managdakdakes ti gundawayna a mangdangran iti padana a tao; uray ti saona kasla apuy a gumilgil-ayab iti dakes.

²⁸Agiwarasⓕ dagiti managdakdakes iti parbo a sao; parnuayenda ti riribuk ket dadaelenda ti panaggagayyem.

²⁹Allilawen ti nauyong a tao dagiti kaarrubana ket iturongna ida iti didigra.

³⁰Agannadka kadagiti tattao nga umisem ken mangkidday kenka ta adda pampanunotenda a dakes.

³¹Atiddog a panagbiag ti gunggona ti nalinteg a tao; balangatna a nadayag ti ubanna.

³²Nasaysayaat ti naanus ngem ti nabileg. Nasaysayaat a maiturayam ti bagim ngem ti iturayam ti entero a siudad.

³³Agbibinnunot dagiti tattao tapno ammoenda ti pagayatan ti Dios, ngem ti Dios a mismo ti mangikeddeng iti sungbat.