Dagiti Salmo 144:1-15 RIPV1996 - Bible AI

¹[206] Madaydayaw ti APO, isu a bato a salaknibko; iti pannakibakal, sansanayennak, ket isagananak a makigubat.

²Isu ti salaknib ken sarikedkedko, ti salinong ken salakanko, ti natalged a kamangko. Pinagbalinnak a mangituray kadagiti tattaomi.[207]

³Oⓦ APO, ania ti tao ta isu ketdi ti pampanunotem? Ania aya ti anak ti tao ta isu ketdi ti asikasoem?

⁴Mayarig ti tao iti pul-oy ti angin; dagiti aldawna lumabas a kas anniniwan.

⁵Luktam ti tangatang, O APO, ta bumaba ka; sagidem dagiti bambantay ket umasukda.

⁶Pagkimatem ket warawaraem dagiti mangbusor kenka; ibiatmo dagiti panam tapno agtatarayda.

⁷Manipud ngato nga ayanmo, gaw-atennak, iti adalem a danum, alawennak, iti bileg dagiti ganggannaet, isalakannak.

⁸Pasig nga ulbod ti sasawenda, ket uray ti ulbod sapataanda.

⁹O Dios, kantaanka, iti baro a kanta agtokarak iti arpa ket kantaanka.

¹⁰Ta dagiti ar-ari pagballigiem, ket ni David nga adipenmo, ispalem.

¹¹Ikanawanak kadagiti naranggas a kabusorko; ispalennak kadagiti ganggannaet a tattao. Pasig nga ulbod ti sasawenda, ket uray ti ulbod sapataanda.

¹²Agtutubo dagiti lallaki nga annakmi; sapay koma ta kasda la mula a dumakkel ken pumigsa. Dagiti babbai nga annakmi, kasda la koma estatua a kadagiti suli ti palasio, mayarkosda.

¹³Mapno koma dagiti kamaligmi iti amin a kita ti maapitmi. Dagiti karneromi kadagiti pagpastoran, aganakda koma iti inar-arban.

¹⁴Dagiti bakbakami, agaduda koma; awan koma ti maalisan wenno matay kadakuada. Awan koma met ikkis ti panagbuteng kadagiti kalsadami.

¹⁵Nagasat ti ili a pangibukbokanna iti bendisionna; wen, nagasat ti ili a ti APO ti Diosna.