Dagiti Salmo 18:1-50 RIPV1996 - Bible AI

¹[21] Ay-ayatenka, O APO! Sika ti pagtaudan ti pigsak.

²Ti APO ti salaknibko; isu ti bato a sarikedkedko. Ti Diosko ti mangsalaknib kaniak, kenkuana, awan ti pakaan-anoak. Kas maysa a kalasag salaknibannak, ikaluya ken salluadannak.

³Umawagak iti APO, ket isalakannak kadagiti kabusorko. Madaydayaw ti APO!

⁴Dagiti tali ni patay pinulipolandak; dagiti dalluyon ni pannakadadael inyallondak.

⁵Dagiti tali ni tanem pinulipolandak; ket nangikabil ni patay iti pakaipalab-ogak.

⁶Iti pannakariribukko, immawagak iti APO; immasugak iti tulong iti Diosko. Iti templona, nangngegna ti timekko, ket impangagna ti asugko.

⁷Ket nagkintayeg ken nagunggon ti daga; nadayeg ken nagindayon ti fondasion dagiti bantay, agsipud ta nakapungtot ti Dios.

⁸Rimmuar ti asuk iti agongna, kasta met ti gumilgil-ayab nga apuy ken umap-apuy a beggang iti ngiwatna.

⁹Linuktanna ti langit sa bimmaba; adda nangisit nga ulep iti babaen dagiti sakana.

¹⁰Bimmaba a sisasakay kadagiti kerubim, nagdaliasat a sipapardas iti payak ti angin.

¹¹Binungonna iti sipnget ti bagina; napuskol nga ulep a napno iti danum ti nanglikmut kenkuana.

¹²Iti masangoananna, mayur-urit ti kimat a nangpataud kadagiti yelo ken beggang, a nangsalput kadagiti nangisit nga ulep.

¹³Naggurruod ti APO iti tangatang, ket nangngeg ti timek ti Kangatoan.[22]

¹⁴Imbiatna dagiti panana, ket nawarawara dagiti kabusorna; pinagkimatna, ket pinagtatarayna ida.

¹⁵Nagparang ti lansad ti taaw; nawaknitan dagiti puon ti daga, idi binabalawmo, O APO, dagiti kabusormo, ken binang-esam ida gapu iti pungtotmo.

¹⁶Manipud langit ginaw-atnak ti APO ket iniggamannak, kadagiti adalem a danum inalawnak.

¹⁷Insalakannak iti pannakabalin dagiti kabusorko napipigsada ket diak kabaelan ida, awan gawayko.

¹⁸Dinarupdak iti tiempo ti rigatko, ngem sinalaknibannak ti APO,

¹⁹Tinulongannak idi nagpeggadak; insalakannak gapu ta maragsakan kaniak.

²⁰Ginunggonaannak ti APO ta naimbag ti aramidko, binendisionannak ta awan basolko.

²¹Ti linteg ti APO tinungpalko; saanak a bimmusor iti Diosko.

²²Inannurotko dagiti amin a lintegna, diak sinalungasing dagiti bilinna.

²³Ammona nga awan biddutko, ket inadaywak ti kinadakes.

²⁴Gunggonaannak gapu ta naimbag ti aramidko ta ammona nga awan ti basolko.

²⁵O APO, napudnoka kadagiti napudno kenka; awan pagkurangan ti kinaimbagmo kadagiti awan pakapilawanna.

²⁶Kadagiti nadalus, agparangka a nadalus, ngem naungetka kadagiti nadangkok.

²⁷Isalakanmo dagiti napakumbaba, ngem dagiti natangsit ipababam ida.

²⁸Ni Yahweh ti mangted iti silawko; lawagan ti Diosko ti nasipnget a biagko.

²⁹Papigsaennak a sumaranget kadagiti kabusorko; duprakek dagiti sarikedkedda ta ikkannak iti bilegko.

³⁰Daytoy a Dios awan pakapilawan ti aramidna, mapagtalkan dagiti saona! Mayarig iti maysa a kalasag nga agpaay kadagiti amin a kumamang kenkuana.

³¹Ta siasino ti Dios no di laeng ti APO ket siasino ti maysa a bato no di ti Diostayo?

³²Isu ti Dios a mangmangted iti pigsak, aramidenna a natalged ti pagnaak.

³³Kadagitiⓢ bambantay, aywanannak; kas iti ugsa, papartakennak.

³⁴Sanayennak iti pannakigubatko, tapno ti katibkeran a bai ti pana mabiatko.

³⁵Salakniban ken isalakannak, O APO; tinaripatonak babaen iti pannakabalinmo, ket intan-oknak babaen iti tulongmo.

³⁶Dimo impalubos a matiliwak ket pulos a diak naitublak.

³⁷Kamatek dagiti kabusorko ket tiliwek ida; saanak a sumardeng agingga a maparmekda.

³⁸Dida makabangon iti panangpadsok kadakuada; addada a napasag iti sakaanak.

³⁹Ikkannak iti pigsa a makigubat, tapno parmekek dagiti kabusorko.

⁴⁰Pagtarayem dagiti kabusorko nga umadayo kaniak; pukawek dagiti gumura kaniak.

⁴¹Agpaarayatda ngem awan makaikanawa kadakuada; umawagda ken ni Yahweh ngem dina sungbatan ida.

⁴²Baddekek ida ket kasda la tapok a mayangin, payatpayatek ida a kas pitak kadagiti kalsada.

⁴³Insalakannak kadagiti nasukir a tattao, ket pinagturaynak kadagiti pagilian; nagserbi kaniak dagiti saanko idi nga am-ammo.

⁴⁴Agtamedda kaniak dagiti ganggannaet; agtulnogda no mangngegdak.

⁴⁵Mapukawda ti namnamada, ket agtigergerda a rummuar iti sarikedkedda.

⁴⁶Agbiag ti APO! Madaydayaw ti salaknibko! Ipakaammoyo ti kinatan-ok ti nangisalakan kaniak.

⁴⁷Isu ti mamagballigi kaniak kadagiti kabusorko, ken mangparukma kadagiti tattao tapno iturayak ida,

⁴⁸ket isalakannak kadagiti gumura kaniak.

⁴⁸Sika ti mamagballigi kaniak kadagiti kabusorko, ken mangsalaknib kaniak kadagiti naranggas a tattao.

⁴⁹Ngarud,ⓣ O APO, agyamanakto kenka iti imatang dagiti pagilian; agkantaak kadagiti pagdaydayawko kenka.

⁵⁰Ited ti Dios dagiti naindaklan a balligi iti arina; ipakitana ti di agbalbaliw nga ayatna iti pinilina, ni David ken kadagiti kaputotanna iti agnanayon.