Dagiti Salmo 35:1-28 RIPV1996 - Bible AI

¹[52] Suppiatem, O APO, dagiti mangsuppiat kaniak, gubatem dagiti manggubat kaniak!

²Alaem ti kalasag ken igammo, ket umaynak tulongan.

³Isaganam ti gayang ken wasaymo, ket sarangtem dagiti kumamat kaniak! Ikarim kaniak nga isalakannak.

⁴Maibabain ken maabak koma dagiti agpanggep a mangpatay kaniak! Mapasanud ken mariribuk koma dagiti agtarigagay a mangranggas kaniak!

⁵Kasda la koma taep a mayangin, idinto a kamaten ida ti anghel ti APO!

⁶Nasipnget ken nagalis koma ti dalanda, bayat ti panangsunson ti anghel ti APO kadakuada.

⁷Nangaramidda nga awan gapgapuna iti silo tapno tiliwendak. Nagkalida iti nauneg nga abut a pangipalab-oganda kaniak.

⁸Ngem madadaeldanto a dida mapakpakadaan; matiliwdanto iti palab-og nga impakatda, ket matnagdanto iti mismo nga abut[53] a kinalida!

⁹Ngem gapu iti APO agragsakakto; gapu ta insalakannak, agrag-oakto.

¹⁰Iti amin a pusok, kunakto iti APO, “Awanen ti kas kenka! Salaknibam dagiti nakapuy iti ranggas dagiti napigsa. Salaknibam met dagiti napanglaw ken nakakaasi iti ulpit dagiti mangidadanes!”

¹¹Agsaksi dagiti managdakdakes iti maibusor kaniak, ket ipabasolda kaniak ti diak inaramid.

¹²Dakes ti isupapakda iti impaayko nga imbag, ket malmesak iti pannakaupay.

¹³Ngem nagladingitak idi masakitda; nagayunarak gapu kadakuada. Nagkararagak a sidudumog,

¹⁴kaslaak la mangikarkararag iti gayyem wenno kabsat. Nagpagnapagnaak a sidudumog ken silaladingit a kas iti anak a mangdung-aw iti inana.

¹⁵Ngem nagragsakda idi naitibkolak, nagkatkatawada a nanglawlaw kaniak. Kinabkabildak dagiti saanko nga am-ammo; saandak a sinardengan a minalmalo.

¹⁶Awan sarday a rinabrabakdak, ket nagngarietda iti pungtotda kaniak.

¹⁷Kasano pay ti kabayag, O APO, a buybuyaennak lattan? Arayatennak kadi no darupendak. Isalakanmo ti biagko kadagitoy a leon!

¹⁸Agyamanakto kenka iti gimong dagiti tattaom. Idaydayawkanto iti sangoanan ti dakkel a taripnong.

¹⁹Dimoⓜ ipalubos dagiti naulbod a kabusorko nga agragsak iti pannakaparmekko! Dimo palubosan dagiti manggura kaniak nga awan gapgapuna a pagragsakanda ti panagladingitko.

²⁰Saanda nga agsao a kas gagayyem; agparboda ketdi iti amin a kita ti ulbod a maibusor kadagiti tattao nga agayat iti talna.

²¹Iriawda ti panangpabasolda kaniak, “Hoy! Nakitami ti inaramidmo,” kunada.

²²Ngem sika, O APO, nakitanak; saanka ngarud nga agulimek. Dika kadi umadayo kaniak!

²³Agriingka, O Apo, ket ikaluyanak; tumakderka, Diosko, ket ikalintegannak.

²⁴Nalintegka, O APO, ipakaammom ngarud nga awan basolko. Dimo ipalubos, O Diosko, nga agragsak dagiti kabusorko!

²⁵Dimo ipalubos a kunada iti bagida, “Naparmekmin a namimpinsan!” Dimo ipalubos a kunada, “Ala, dayta man ti kayatmi!”

²⁶Mamimpinsan koma a maparmek ken mariribuk dagiti maragsakan iti panagsagabak. Maibabain ken maipababa koma dagiti mangipapan a naim-imbagda ngem siak!

²⁷Agdir-i koma a sirarag-o iti mamin-adu dagiti maragsakan iti pannakawayawayak. Kunada koma, “Naindaklan ti APO; agragsak iti panagballigi ti adipenna!”

²⁸Iti kasta, ipakaammokto ti kinalintegmo, ket agmalmalem nga idaydayawkanto.