Dagiti Salmo 39:1-13 RIPV1996 - Bible AI

¹[58] Kinunak, “Annadak dagiti tignayko, ket diak ipalubos a pagbasolennak ti dilak. Diak agsao iti uray ania no asideg dagiti managdakdakes.”

²Diak nagtagtagari ket nagulimekak; diak nagsao uray pay maipapan iti naimbag! Ngem ad-adda ketdi a nagsagabaak,

³ket napno ti pusok iti panagdanag. No ut-utobek, ad-adda a bumara ti riknak; diak matengngel ti bagik ket kinunak:

⁴“O APO, kaanonto ti ipapatayko. Kasano pay kabayag ti panagbiagko? Inton ano ti panaggibus dagiti aldawko?”

⁵Nagababa ketdin ti biag nga impabulodmo! Kasla awan aniamanna iti imatangmo. Wen, kasla pul-oy laeng ti angin ti biag ti tao;

⁶awan giddiatna iti anniniwan! Wen, ubbaw amin dagiti aramidna; agurnong iti kinabaknang ngem dina ammo no siasinonto ti agnam-ay iti sanikuana!

⁷“Ket ita, O Apo, ania ngarud ti urayek? Adda kenka ti namnamak.

⁸Isalakannak iti amin a basolko; dimo ipalubos a pagang-angawandak dagiti maag.

⁹Agulimekak, diak agsao iti aniaman a balikas, agsipud ta sika ti nangipaay iti panagsagabak.

¹⁰Isardengmon ti panangdusam kaniak; Matayakon gapu kadagiti danog nga impalak-ammo.

¹¹No agbasol ti tao, dusaem babaen iti panangbabalawmo; kaskala sanga a mangdadael iti napateg kenkuana. Kinapudnona, ti tao pul-oy laeng ti angin ti arigna!

¹²“O APO, denggem kadi ti kararagko, ket ipangagmo ti ararawko. Dika koma agulimek no kenka umawagak. Ganggannaetak laeng kenka, maysaak a sangaili a kas kadagiti kapuonak.

¹³Dinak kadi dusdusaen tapno mabang-aranak, sakbay a pumusayak ket awanakon ditoy a biag.”