Dagiti Salmo 5:1-12 RIPV1996 - Bible AI

¹[4] Denggem, O APO, ti asugko; timudem dagiti balikasko.

²Ipangagmo kadi, O Arik ken Diosko, ti panagdawatko iti tulongmo. Agkararagak kenka, O APO.

³Mangngegmo ti timekko iti bigat, no sumingising ti init agkararagak,[5] ket urayek ti sungbatmo kaniak.

⁴Saanka a Dios a maragsakan iti kinakillo; dimo ipalubos nga adda agaramid iti kinadakes.

⁵Awan lugar dagiti natangsit iti ayanmo, ta kaguram amin nga agaramid iti kinadakes.

⁶Dadaelem dagiti naulbod, O APO, ket umsiem ti narungsot ken manangallilaw.

⁷Ngem gapu iti naindaklan nga ayatmo, makastrekak iti balaymo; makapagdaydayawak iti Templom a nasantoan, ket agrukbabak a siraraem iti sangoanam.

⁸Idalannak, O APO, nga agaramid iti pagayatam, agsipud ta adu dagiti kabusorko. Iturongnak a magna iti dalanmo.

⁹Tiⓖ sao dagiti kabusorko saan a mapagtalkan; ti la mangdaddadael ti inda tartarigagayan. Kasla silulukat a tanem ti ngiwatda, nalamuyot ngem bin-ig a pangallilaw ti saoda.

¹⁰Diosko, ukomem ken dusaem ida; dagiti koma panggepda ti pakadadaelanda. Iti imatangmo, pagtalawem ida gapu iti adu a basolda ken iti panangbusorda kenka.

¹¹Ngem agrag-o amin nga agtalek iti pannalaknibmo; mabalinda latta ti agkanta iti rag-o. Salaknibam dagiti agayat kenka, ta gapu kenka masarakanda ti pudno a ragsakda.

¹²Bendisionam, O APO, dagiti agtulnog kenka, kasla kalasag ti ayatmo a mangsalaknib kadakuada.