Dagiti Salmo 65:1-13 RIPV1996 - Bible AI

¹[99] O Dios, rumbeng nga idaydayawdaka idiay Sion, ket tungpalenmi ti inkarimi kenka.

²Ipangagmo dagiti kararag ket dumatagto kenka dagiti amin a tattao

³gapu kadagiti basbasolda. Adu unay ti biddutmi,[100] ngem pakawanemto ida.

⁴Nagasat dagiti piliem a tattao, isuda nga awisem nga agtaeng iti santuariom! Mapnekkaminto iti agkakaimbag iti balaymo, kadagiti bendision iti nasantoan a Templom!

⁵Sungbatannakami ket ikkannakami iti balligi; agaramidka kadagiti nakaskasdaaw a banag a pakaispalanmi. Agtalek kenka dagiti tattao iti sangalubongan, kasta met dagiti agnaed iti ballasiw-taaw.

⁶Babaen iti pigsam, impasdekmo dagiti bantay a mangipakita iti nabileg a pannakabalinmo.

⁷Pagtalnaem ti daranudor dagiti taaw; pagsardengem ti ungor dagiti dalluyon ken ti riribuk kadagiti pagilian.

⁸Gapu kadagiti aramidmo a naindaklan agruknoy a sibubuteng kenka ti sangalubongan! Gapu kadagiti aramidmo, agriaw iti rag-o dagiti tattao iti maysa a pungto ti daga.

⁹Ipakitam ti panangipategmo iti daga babaen iti panangyegmo iti tudo, ket pagbalinem a nadam-eg ken nabaknang. Napno iti danum dagiti karayanmo, mangipaayka iti apit nga adu.

¹⁰Yegmo ti nabuslon a tudo kadagiti talon a naarado ket rusepem ida, pagarbisem tapno lumukneng ti daga ket agtubo dagiti mula.

¹¹Adu nga apit ti ipaay ti kinaimbagmo! Iti sadinoman a papanam adu a bendision ti itedmo!

¹²Kadagiti pagpastoran, adu ti baka; adda rag-o kadagiti bakras ti turod!

¹³Nasaknapan iti karnero dagiti pagaraban; nakumotan iti trigo dagiti tantanap; agkakanta ken agdidir-i ti amin gapu iti ragsak!