Dagiti Salmo 68:1-35 RIPV1996 - Bible AI

¹[104] Tumakder ti Dios ket warawaraenna dagiti kabusorna! Maparmek koma dagiti gumurgura kenkuana ket agtatarayda.

²Pukawenna ida a kas mayangin nga asuk; kas pannakalunag ti allid iti apuy, kasta met ti pannakapukaw dagiti managdakdakes iti imatang ti Dios.

³Ngem maragsakan dagiti nalinteg, ket agrambakda iti imatangna; naragsakda ket agriawda iti rag-o.

⁴Kantaanyo ti Dios, agkantatayo para kenkuana nga umay a nakasakay kadagiti ulep.[105] APO ti naganna—agragsakkay iti sangoananna.

⁵Agnaed ti Dios iti nasantoan a Templona; salaknibanna dagiti balo, aywananna dagiti ulila.

⁶Ikkanna iti balay ti tao a malmalday; wayawayaanna dagiti balud, paragsakenna ida; ngem agyan dagiti nasukir iti awan matatao a daga.

⁷Idi impanguloam dagiti tattaom, O Dios, idi binallasiwyo ti let-ang,

⁸naggingginedⓘ ti daga ket nagtudo iti napigsa gapu iti kaaddam. Uray ti Bantay Sinai nadayeg iti yaaymo, O Dios ti Israel.

⁹Pinagtudom iti napigsa, aglablabonan ket dimmam-eg manen ti natikag a daga;

¹⁰nagtaeng dagiti tattaom sadiay; iti kinaimbagmo, inikkam ti kasapulan dagiti nakurapay.

¹¹Nagbilin ti Apo, ket adu a babbai ti nangisaknap iti damag:

¹²“Agtatalawen dagiti ari ken dagiti buyotda!” Dagiti babbai a nabati iti pagtaengan nagbibingayandan dagiti nasamsam:

¹³sinan-kalapati a nakalupkopan iti pirak; sumilsilap ti puro a balitok a payakda. (Iti aldaw ti gubat, apay a nagyan ti dadduma kadakayo iti koral dagiti karnero?)

¹⁴Idi warawaraen ti Mannakabalin a Dios dagiti ari idiay Bantay Salmon, pinagtudona iti niebe sadiay.

¹⁵Nagtayag ketdin ti Bantay Basan! Nagadun a pantokmo, bantay ti Basan!

¹⁶Manipud iti adu a pantokmo, apay a matmatam a silalais ti bantay a pinili ti Dios a pagtaengan? Agnanayonto nga agnaed sadiay ti APO!

¹⁷Kadua ti Dios ti rinibribu a nabileg a luganna. Naggapu ti Apo idiay Sinai[106] ket mapan iti nasantoan a disso.

¹⁸Ikuyognaⓙ ti adu a balud a sumang-at iti nangato a disso. Umawat kadagiti sagut nga aggapu kadagiti nasukir a tattao. Agtaengto sadiay ti APO a Dios.

¹⁹Madaydayaw ti Apo, inaldaw nga ibaklayna dagiti awittayo. Isu ti Dios a mangisalakan kadatayo.

²⁰Dios a mangisalakan ti Diostayo; isu ti APO nga Apotayo; ket iti patay, ispalennatayo.

²¹Awan duadua a buraken ti Dios ti ulo dagiti kabusorna a di mangiwaksi iti kinamanagbasolda.

²²Kinuna ti Apo, “Yawidkonto dagiti kabusormo manipud Basan; aonekto ida iti lansad ti taaw nga inda nagkamangan

²³tapno magna dagiti saiti darada, ket agab-ab dagiti asom iti kaykayatda.”

²⁴O Dios nga Arik, makita amin a tao ti parada ti balligim nga agturong iti santuario.

²⁵Umuna dagiti kumakanta; sumaruno dagiti babbalasang nga agtuktokar iti pandereta, adda dagiti musiko iti likudda.

²⁶“Idaydayawyo ti Dios iti taripnong dagiti tattaona; wen, idaydayawyo ti APO, dakayo a kaputotan ti Israel!”

²⁷Ti kabassitan a tribu ti Benjamin ti mangipangulo kadakuada, sumaruno dagiti pangulo ti Juda ken ti grupoda sa dagiti prinsipe ti Zabulon ken Neftali.

²⁸Ipakitam ti bilegmo, O Dios, ipakitam ti pigsam nga inusarmo nga agpaay kadakami.

²⁹Manipud iti Templom idiay Jerusalem a pangipanan dagiti ari kadagiti sagutda kenka,

³⁰tubngarem ti Egipto, dayta atap nga ayup iti karunoan; tubngarem dagiti pagilian, dayta arban ti toro a baka ken dagiti urbonda aginggat' agparintumengda ket idatonda dagiti pirakda. Warawaraem dagita a tattao a naayat a mangparnuay iti gubat!

³¹Umayto dagiti embahador[107] manipud Egipto. Ingatonto dagiti taga-Etiopia ti imada nga agkararag iti Dios.

³²Kantaanyo ti Dios, dakayo a pagarian ti lubong; agkantakay iti pagdaydayaw iti Apo,

³³isu nga agdaliasat iti tangatang, ti daan a tangatang. Denggenyo ti napigsa a timekna!

³⁴Ipakaammoyo ti pannakabalin ti Dios, ti dayagna a mangrimbaw iti Israel; rimbawan ti bilegna ti tangatang.

³⁵Anian a nakaskasdaaw ti Dios a rummuar iti santuariona! Anian a nakaskasdaaw ti Dios ti Israel! Ikkanna ti pigsa ken bileg dagiti tattaona.

³⁵Madaydayaw ti Dios!