Dagiti Salmo 89:1-52 RIPV1996 - Bible AI

¹[142] Oⓧ APO, kanayon nga ikantak ti di agbalbaliw nga ayatmo; ipakaammok ti kinapudnom iti amin a tiempo.

²Ammok a ti ayatmo mataginayon, agpaut a kas iti langit ti kinapudnom.

³Kinunam, “Nakitulagak iti pinilik a tao, inkarik ken David nga adipenko:

⁴‘Addantoⓨ latta agari nga agtaud kenka, Taginayonekto dagiti kaputotam iti awan inggana.’”

⁵O APO, ikanta dagiti langit dagiti nakaskasdaaw nga aramidmo; dagiti nasantoan a parsua ikantada ti kinapudnom.

⁶Siasino ti kas kenka sadi langit, O APO; awan nailangitan a parsua a kaaspingmo.

⁷Dioska a pagraraeman dagiti parsua a nailangitan; naindaklan ken pagbutbutngandaka dagiti adda iti sangoanam.

⁸O APO a Dios a Mannakabalin-amin, awan ti mannakabalin a kas kenka; kadagiti amin a banag, O APO, matalekka.

⁹Iturayam ti nadawel a baybay; pagtalnaem dagiti dadakkel a dalluyonna.

¹⁰Imbaddekmo ti dragon a Rahab[143] ket pinapataymo, winarawaram dagiti kabusormo iti nabileg nga imam.

¹¹Kukuam ti langit agraman ti daga, pinarsuam ti lubong ken amin a linaonna.

¹²Insaadmo ti amianan ken ti abagatan; kantaandaka ti Tabor ken Hermon gapu iti ragsakda.

¹³Anian a kinabilegmo! Anian a nagdakkel ti pannakabalinmo!

¹⁴Nabangon ti pagariam iti kinalinteg ken kinahustisia; iti amin nga aramidmo, makita ti ayat ken kinapudnom.

¹⁵Nagasat dagiti agdaydayaw kenka kadagiti kankanta, isuda nga agbibiag iti silaw ti ayatmo.

¹⁶Agragsakda nga agmalmalem gapu kenka, ket idaydayawdaka iti kinaimbagmo.

¹⁷Sika ti mangted iti dakkel a balligimi; ti ayatmo ti pagtaudan ti pigsami.

¹⁸Sika ti nangpili iti mangsalaknib kadakami; sika a Santo ti Israel ti nangted iti arimi.

¹⁹Iti maysa a parmata idi un-unana, imbagam kadagiti napudno nga adipenmo, “Insaadko ti balangat[144] iti nalatak a soldado; intedko ti trono iti maysa a napili kadagiti tattao.

²⁰Insaadkoⓩ nga ari ni David nga adipenko; babaen iti nasantoan a lana inkonsagrarko.

²¹Kanayonto nga adda kenkuana ti bilegko, ket papigsaento ti pannakabalinko.

²²Saanto nga agballigi ti kabusor a mangparmek kenkuana, dinto abaken dagiti managdakdakes.

²³Rumekekto ti kabusorna iti imatangna, ket papatayekto amin a gumura kenkuana.

²⁴Napudnoakto kenkuana, dinto aggibus ti ayatko; kankanayon nga itedkonto ti balligina.

²⁵Palawaekto ti pagarian nga inna iturayan manipud Mediterranean agingga iti Karayan.[145]

²⁶Kunananto kaniak, ‘Sika ti Diosko, sika ti amak. Sika ti Bato a mangisalakan kaniak.’

²⁷Ibilangkontoⓐ nga inauna nga anakko; isunto ti kangatoan kadagiti amin nga ari.

²⁸Tungpalekto ti inkarik, ket agnanayonto ti tulagko kenkuana.

²⁹Addanto latta agari a kaputotanna; agpautto a kas iti langit ti pagarianna.

³⁰“Ngem no salungasingen ti kaputotanna ti lintegko, ket dida agbiag a kas mayannurot kadagiti bilbilinko,

³¹no dida ikankano dagiti alagaden nga intuyangko ket dida annuroten dagiti bilbilinko,

³²dusaekto ida gapu kadagiti basolda, saplitekto ida gapu kadagiti labsingda.

³³Ngem dinto aggibus ti napudno a panagayatko kenkuana, diakto met paglikudan ti karik kenkuana.

³⁴Diakto waswasen ti tulagko, diakto ibabawi ti karik kenkuana.

³⁵“Iti nasantoan a naganko, insapatak a diakto agulbod ken David.

³⁶Addanto latta agari a kaputotanna, ket agpautto a kas iti init ti pagarianna.

³⁷Mataginayonto ti tronona a kas iti bulan, mataginayonto a kas iti tangatang.”

³⁸Ngem nagpungtotka iti ari a pinilim; linaksidmo ket pinanawam.

³⁹Winaswasmo ti tulagmo iti adipenmo, ket imbarsakmo ti koronana iti daga.

⁴⁰Rinebbam dagiti bakud ti siudadna, ket dinuprakmo dagiti sarikedkedna.

⁴¹Amin nga aglabas takawenda ti sanikuana, ket lalaisen dagiti amin a kaarubana.

⁴²Pinagballigim dagiti kabusorna; pinagragsakmo dagiti gumurgura kenkuana.

⁴³Pinagbalinmo nga awan serbi dagiti armasna, ket binaybay-am a maabak iti paggugubatan.

⁴⁴Inikkatmo ti setrona,[146] iti imana ket impurruakmo ti tronona iti daga.

⁴⁵Pinaababam dagiti aldaw ti kinaagtutubona, ket inyegmo ti naan-anay a pannakaibabainna.

⁴⁶Agnanayon aya, O APO, nga ilingedmo ta rupam? Kasano ti kapaut ti pungtotmo a sumged a kas apuy?

⁴⁷Laglagipem, O APO, nga ababa ti biagko; laglagipem a matay dagiti pinarsuam a tattao.

⁴⁸Adda aya tao a saan a matay? Ania ti aramidenna tapno malisianna ti tanem?

⁴⁹Yanna, O Apo, dagiti pakakitaan iti ayatmo? Yandan dagiti inkarim ken David?

⁵⁰Dimo kad lipaten ti pannakaum-umsik nga adipenmo, ti panagibturko kadagiti pananguyaw[147] dagiti tattao.

⁵¹Anian a pananglais dagiti kabusormo iti pinilim nga ari! Um-umsienda iti sadinoman a papananna, O APO.

⁵²Madaydayaw ti APO iti agnanayon!