1[11] Iti amin a pusok, O APO, agyamanak kenka; amin a nakaskasdaaw nga aramidmo saritaek ida.
2Gapu kenka, agkantaak a sirarag-o. Ikantak, O Kangatoan, ti pagdaydayaw iti naganmo.
3Agsanud dagiti kabusorko no agparangka; mapasagda ket matayda.
4Nalinteg ken pudno dagiti pangngeddengmo, ket nainkalintegan ti sentensiak nga impaulogmo.
5Dinusam dagiti saan a mamati, dagiti managdakdakes dinadaelmo; saandan a malaglagip uray inton kaano man.
6Wen, dagiti kabusor namimpinsan a pinarmekmo, dinadaelmo dagiti siudadda, ket pinukawmo amin a pakalaglagipanda.
7Ngem agari ni Yahweh iti agnanayon; insaganana ti tronona a mangukom.
8Agturay a sililinteg iti lubong; awan idumdumana ti panangukomna kadagiti nasion.
9Ni Yahweh ti pagkamangan dagiti mairurumen; natalged a sarikedked iti nariribuk a panawen.
10Talkendaka, O APO, dagiti makaammo kenka, dagiti agkamang kenka dimo baybay-an ida.
11Agkantakayo kadagiti pagdayawyo iti APO nga agturay idiay Sion! Dagiti inaramidna ipakaammoyo kadagiti nasnasion.
12Silalagip ti Dios kadagiti agsagsagaba; wen, dina malipatan dagiti sangsangitda, ket dusaenna dagiti mangranggas kadakuada.
13Kaasiannak,ⓝ O APO, kaasiannak! Kitaem ti panangranggas dagiti gumura kaniak. Iti patay, O APO, isalakannak,
14tapno idiay Jerusalem agparangak kadagiti tattao, ket ipakaammok kadakuada ti gapu nga agdaydayawak kenka. Agragsakak agsipud ta insalakannak.
15Nagkali dagiti Hentil iti abut a nakatnaganda; nasiloanda iti iket nga impakatda.
16Impakaammo ti APO ti bagina babaen kadagiti nalinteg a pangngeddengna, ket masiloan dagiti nakillo iti aramidda.
17Patay ti tungpal ti amin a managdakdakes, kasta met dagiti saan nga umawat iti Dios.
18Saan a kanayon a mabaybay-an dagiti napanglaw; ti namnama dagiti mailupitlupit saan met a mapukaw.
19Tumakderka, O APO, dimo ipalubos a karitendaka dagiti tattao! Ummongem dagiti saan a mamati ket ukomem ida iti saklangmo.
20Ikkam ida iti pagbutnganda, O APO, tapno maammoanda a tattaoda laeng.