Daniel 9:1-27 RIPV1996 - Bible AI

¹Taga-Media[11] ni Dario nga anak ni Xerxes. Inturayanna ti pagarian ti Babilonia.

²Itiⓣ umuna a tawen a panagarina, ad-adalek dagiti nasagradoan a sursurat ket ut-utobek ti kaipapanan dagiti 70 a tawen a panaglangalangto ti Jerusalem kas imbaga ni Yahweh ken ni profeta Jeremias.

³Gapu iti daytoy, impasnekko ti nagkararag ken nagdawat ken ni Apo Dios. Nagayunarak, nagkawesak iti nakersang a lupot ken nagtugawak iti dapu.

⁴Nagkararagak ken ni Yahweh a Diosko ket impudnok ti basol dagiti kailiak. Kastoy ti kararagko:

⁴“Apo Dios, naindaklanka ket agraemkami kenka. Napudnoka iti nakitulagam, ket ipakitam ti di agbalbaliw nga ayatmo kadagiti agayat kenka ken agtungpal iti aniaman a bilinmo.

⁵Nagbasolkami. Dakeskami, ket saan a naimbag ti inaramidmi. Sinukirmi dagiti imbilinmo nga aramidenmi. Tinallikudanmi ti naimbag nga impakitam kadakami.

⁶Dimi impangag dagiti adipenmo a profeta a nagsao iti naganmo. Kinasaoda dagiti arimi, dagiti agturay kadakami, dagiti kapuonanmi ken ti entero a nasion.

⁷Sika,ⓤ O Apo, kanayon a nalinteg ti aramidmo, ngem dakami, kanayon a nakababain ti aramidmi. Wen, dakami amin a tattao ti Juda ken Jerusalem, kasta met dagiti amin nga Israelita nga inwarawaram kadagiti nadumaduma a pagilian gapu ta saanda a napudno kenka.

⁸Nakababain ti inaramid dagiti arimi, dagiti turayenmi ken dagiti kapuonanmi, ket nagbasolda kenka, O Apo.

⁹Manangngaasi ken sisasaganaka a mamakawan, uray no sinukirdaka.

¹⁰Didaka impangag, O APO Dios, idi imbilinmo kadakami nga agbiagkami kas mayannurot kadagiti linteg nga intedmo kadakami babaen kadagiti adipenmo a profeta.

¹¹Sinalungasingⓥ dagiti amin nga Israelita ti lintegmo ket saanda a nagtulnog iti imbagam. Nagbasolkami kenka ket indissuormo kadakami dagiti lunod a nailanad iti Linteg ni Moises nga adipenmo.

¹²Tinungpalmo dagiti amin nga imbagam nga aramidem kadakami ken kadagiti agturay kadakami. Nakarkaro ti panangdusam iti Jerusalem ngem iti uray ania a siudad ditoy daga.

¹³Sinagabami dagiti amin a dusa a nailanad iti Linteg ni Moises. Ngem uray ita, O APO a Diosmi, awan ti inaramidmi tapno maragsakanka. Saankami a nagbabawi kadagiti basbasolmi wenno sinurot ti kinapudno nga agtaud kenka.

¹⁴Sika, O APO a Diosmi, nakasaganaka a mangdusa kadakami ket pudno a dinusanakami. Ngamin, nalinteg amin nga aramidmo, ket didaka impangag.

¹⁵“Oⓦ Apo a Diosmi, impakitam ti pannakabalinmo babaen iti panangiruarmo kadagiti tattaom idiay Egipto, ket agingga ita, malaglagip pay laeng ti pannakabalinmo. Nagbasolkami. Dakes ti inaramidmi.

¹⁶Sinalaknibannakami iti napalabas isut' gapuna a dimo kadin kapungtot ti Jerusalem a siudadmo, ti nasagradoan a bantaymo. Dagiti amin a tattao kadagiti aglawlaw a pagilian, umsienda ti Jerusalem ken dagiti tattaom gapu kadagiti basolmi ken gapu kadagiti dakes nga inaramid dagiti kapuonanmi.

¹⁷Itaⓧ ngarud, O Diosmi, ipangagmo kadi ti kararag ken panagpakpakaasik. Bangonem manen ti Templom a nadadael tapno maammoan ti amin a sika ti Dios.

¹⁸Ipangagnakami,ⓨ O Dios. Talliawennakami ket kitaem ti rigat a sagsagabaenmi, kasta met ti sagsagabaen ti siudad a napanaganan iti naganmo. Saankami nga agdawat kenka gapu iti naimbag nga inaramidmi, no di ket gapu ta manangngaasika.

¹⁹O Apo, timudennakami. O Apo, pakawanennakami. O Apo, denggennakami ket tulongannakami tapno maammoan ti amin a sika ti Dios. Dika koma agtaktak! Kukuam daytoy a siudad ken dagitoy a tattao.”

²⁰Intultuloyko ti nagkararag ket impudnok dagiti basbasolko ken dagiti basbasol dagiti kailiak nga Israelita. Impakpakaasik iti APO a Diosko a bangonenna manen ti nasantoan a Templona.

²¹Idiⓩ agkarkararagak, timmayab a sipapardas nga immay kaniak ni Gabriel, daydi lalaki a nakitak iti immuna a parmatak. Tiempo idi ti panagidatag iti daton iti rabii.

²²Impalawagna kaniak, “Daniel, immayak tapno tulonganka a mangawat iti kaipapanan ti padto.

²³Itay rugiam ti agpakpakaasi iti Dios, sinungbatannaka. Umayko ibaga kenka ti sungbat ta dungdungngoennaka unay ti Dios. Ita, dumngegka a naimbag iti panangilawlawagko iti parmata.

²⁴“Mamimpito a pitopulo a lawas dagiti tawtawen[12] ti kabayag ti intuding ti Dios a mapalabas sananto wayawayaan dagiti kailiam ken ti nasantoan a siudadmo iti dakes ken panagbasol. Mapakawanton ti basol ket maipasdekton ti agnanayon a kinalinteg, tapno pumayso ti parmata ken ti padto, ket maidaton manen ti nasantoan a Templo.[13]

²⁵Ammoem ngarud ket ammirisem daytoy: Pito a lawas[14] ti mapalabas manipud iti pannakaibilin a mabangon manen ti Jerusalem agingga nga agparang ti pangulo a pinili ti Dios. Mabangonto manen ti Jerusalem. Addanto dagiti kalsadana ken dagiti natibker a sarikedkedna. Agpautto iti 62 a lawas[15] ngem tiemponto ti riribuk.

²⁶Inton aggibus dayta a tiempo, mapapatayto nga awan gapgapuna ti pinili ti Dios. Madadaelto ti siudad ken ti Templo. Dadaelento ti rumaut nga armada ti maysa a nabileg a pangulo. Kaslanto layus a dumteng ti panungpalan. Yegnanto ti gubat ken pannakadadael nga insagana ti Dios.

²⁷Makitulagtoⓐ dayta a pangulo kadagiti adu a tattao iti las-ud ti pito a tawen. Pagsardengennanto ti panagidatag kadagiti daton ken sakrifisio iti uneg ti tallo ket kagudua a tawen. Maisaadto ti Nakabutbuteng a Mangdadael[16] iti kangatoan a paset ti Templo. Agtalinaedto sadiay agingga a madusa ti nangikabil iti daytoy ket dumteng ti kanibusananna kas intuding ti Dios kenkuana.”