Deuteronomio 10:1-22 RIPV1996 - Bible AI

¹“Kinuna kaniak ti APO: ‘Mangtikapka iti dua a tapi a bato a kas kadagiti immuna; mangaramidka iti Lakasa a kayo a pakaikargaanda. Umayka kaniak iti bantay.

²Isuratko kadagita a tapi ti insuratko kadagiti tapi a binurakmo samonto ikabil ida iti Lakasa.’

³“Nangaramidak ngarud iti Lakasa nga akasia. Nangtikapak iti dua a tapi a bato a kas kadagidi immuna ket insang-atko iti bantay.

⁴Insurat ti APO kadagita a tapi dagiti Sangapulo a Bilin nga insuratna idi damo. Dagitoy dagidi impakaammona kadakayo manipud iti apuy iti daydi nga aldaw a naummongkayo iti bantay. Inted kaniak ti APO dagiti tapi

⁵ket simmalogak iti bantay. Kas imbilin ti APO, inkabilko dagiti tapi iti lakasa nga inaramidko. Addada sadiay agingga ita.”

⁵(

⁶Nagrubbuatⓓ dagiti Israelita manipud kadagiti bubon a kukua dagiti tattao ti Jaakan ket napanda idiay Mosera. Natay ni Aaron ket sadiay ti nakaitanemanna. Ni Eleazar nga anakna ti simmukat kenkuana a kas padi.

⁷Pimmanawda idiay Mosera ket napanda idiay Gudgoda. Manipud sadiay, napanda idiay Jotbat nga addaan kadagiti wawaig.

⁸Itiⓔ bantay,[4] dinutokan ti APO dagiti lallaki iti tribu ni Levi a mangaywan iti Lakasa ti Tulag ken agserbi kenkuana a kas padi ken mamendision iti nagan ti APO. Daytoy pay laeng ti akemda agpapan ita.

⁹Iti kasta, awan ti daga nga inawat ti tribu ni Levi a kas kadagiti dadduma a tribu. Ti inawatda isu ti akem a kas papadi ti APO, kas inkari ti APO a Diosyo.)

¹⁰“Kasⓕ idi immuna, nagyanak iti bantay iti las-ud ti 40 nga aldaw ken rabii. Impangagnak manen ti APO ket dina intuloy ti panggepna a mangdadael kadakayo.

¹¹Kalpasanna, imbagana nga innakon ket idalankayo tapno tagikuaenyo ti daga nga inkarina nga ited kadagiti kapuonanyo.”

¹²“Ita, tattao ti Israel, denggenyo no ania ti ipaaramid kadakayo ti APO a Diosyo. Agbutengkayo iti APO ken aramidenyo amin a bilinna. Ayatenyo, agserbikayo kenkuana iti amin a pusoyo,

¹³ken tungpalenyo dagiti amin a lintegna. Itedko dagitoy ita nga aldaw nga agpaay iti pagimbaganyo.

¹⁴Kukua ti APO uray ti kangatoan a tangatang, kasta met ti daga ken amin a linaonna.

¹⁵Ngem gapu ta ay-ayaten unay ti APO dagiti kapuonanyo, pinilinakayo kadagiti pagilian ket dakayo pay laeng dagiti tattao a pinilina.

¹⁶Manipud ita, agtulnogkayo iti APO ket ikkatenyon ti kinasukiryo.

¹⁷Natantan-okⓖ ti APO a Diosyo ngem ti amin a didiosen ken pannakabalin. Naindaklan ken mannakabalin ket rumbeng nga isu ti pagbutngan. Awan ti idumdumana ket saan nga umawat iti pasuksok.

¹⁸Ikalinteganna dagiti ulila ken balo a babbai; ipatpategna dagiti ganggannaet ket ikkanna ida iti taraon ken kawes.

¹⁹Masapul nga ayatenyo met ti ganggannaet iti sidongyo ta ganggannaetkayo met idi idiay Egipto.

²⁰Agbutengkayo iti APO a Diosyo ket isu laeng ti pagdaydayawanyo. Agtalinaedkayo a napudno kenkuana ket agkarikayo iti naganna.

²¹Idaydayawyo—isu ti Diosyo ket mismo a nakitayon dagiti naindaklan ken nakaskasdaaw a banag nga impaayna kadakayo.

²²Pitopuloⓗ laeng ti bilang dagidi kapuonanyo a napan idiay Egipto. Ngem pinaadunakayon ti APO a Diosyo a kas kadagiti bituen iti tangatang.”