Deuteronomio 15:1-23 RIPV1996 - Bible AI

¹Intuloy ni Moises, “Tunggal agtapos ti maikapito a tawen, mapakawan ti amin nga utang.

²Kastoy ti aramidenyo. Ti amin a nagpautang iti kuarta iti padana nga Israelita masapul a pakawanenna dayta nga utang; dina singirenen gapu ta ti APO a mismo ti nangipakaammo iti pannakapakawan ti utang.

³Mabalinyo a piliten nga agbayad ti ganggannaet ngem diyo singiren ti utang ti padayo nga Israelita.

⁴“Bendisionannakayto ti APO a Diosyo iti daga nga itedna kadakayo. Awanto ti napanglaw kadagiti kailianyo,

⁵no la ket agtulnogkayo kenkuana ket ikagumaanyo a tungpalen ti amin nga ibilinko kadakayo ita nga aldaw.

⁶Parang-ayennakayto ti APO a kas inkarina. Adunto a pagilian ti umutang kadakayo ngem saankayto nga umutang kadakuada. Iturayanyonto ti adu a nasion ngem awanto ti nasion a mangituray kadakayo.

⁷“Noⓧ adda napanglaw nga Israelita nga agnaed iti uray ania nga ili iti daga nga ited kadakayo ti APO a Diosyo, diyo ipaidam ti tulongyo kenkuana.

⁸Siaayatkayo ketdi a tumulong kenkuana ket ipabulodyo ti aniaman nga umdas a kasapulanna.

⁹Diyo pampanunoten nga asidegen ti tawen a naituding a pannakapakawan ti utang. Diyo ipalubos a sumrek ti kasta a kinadakes iti uloyo. No diyo kayat a pautangan, umasugto iti APO iti maibusor kadakayo ket makabasolkayo.

¹⁰Siraragsakkayo koma a mangted ket awan koma ti sakit ti nakemyo. Iti kasta, bendisionannakayto ti APO iti amin nga aramidyo.

¹¹Addantoⓨ latta napanglaw ken marigrigat iti pagilianyo. Daytoy ti gapuna nga ibilinko kadakayo: ikkanyo a sibubuslon ti padayo nga Israelita iti tiempo a karigatna.

¹²“Noⓩ adda padayo nga Israelita, lalaki man wenno babai, a mangilako iti bagina a kas tagabu, agserbinto kadakayo iti innem a tawen. Inton dumteng ti maika-7 a tawen, masapul a wayawayaanyo.

¹³Ngem diyo pagawiden nga ima-ima.

¹⁴Ikkanyo a sibubuslon iti aniaman nga imparabur ti APO kadakayo—karnero, trigo ken arak.

¹⁵Laglagipenyo a natagabukayo met idi idiay Egipto ket winayawayaannakayo ti APO a Diosyo; daytoy ti gapuna nga itedko kadakayo ita daytoy a bilin.

¹⁶“Nalabit a madi a pumanaw ti tagabuyo ta, kas kunana, ay-ayatennakayo a sangafamiliaan ket kontento iti panagyanna kadakayo.

¹⁷Ipasanggiriyo iti baotek ti ruangan ti balayyo; tebbenganyo ket tagabuyonton iti tungpal biagna. Kasta met ti pamay-anyo iti babai a tagabu.

¹⁸Saan koma a sakiten ti nakemyo a wayawayaanyo ti maysa a tagabu; nagserbi kadakayo iti innem a tawen ket kagudua laeng ti sueldona iti sueldo ti mangmangged. Aramidenyo daytoy ket bendisionannakayto ti APO a Diosyo iti amin nga aramidyo.

¹⁹“Ikonsagraryoⓐ iti APO a Diosyo ti amin nga inauna a kalakian a yanak ti baka ken ti karneroyo. Diyo pagtrabaho daytoy a baka wenno pukisan dagitoy a karnero.

²⁰Tunggal tawen, dakayo ken ti familiayo, masapul a sidaenyo dagitoy nga animal iti imatang ti APO a Diosyo iti lugar a pagdaydayawan.

²¹Ngem no adda pakapilawan dagiti animal, no pilay wenno bulsekda wenno adda sabali a nakaro a depektoda, saanyo nga idaton ida iti APO a Diosyo.

²²Mabalinyo a sidaen dagiti kasta nga animal iti balayyo. Dakayo amin, nadalus man wenno narugitkayo iti imatang ti linteg, mabalinyo ti agsida kadakuada, kas iti panagsidayo iti ugsa wenno gasela.

²³Ngemⓑ diyo sidaen ti darada; ibellengyo iti daga a kas iti panangibellengyo iti danum.”