Deuteronomio 17:1-20 RIPV1996 - Bible AI

¹“Diyo idaton iti APO a Diosyo ti toro a baka wenno karnero nga adda depektona; kagura ti APO daytoy.

²“No adda siasinoman a nakabasol iti APO

³babaenⓘ iti panagdaydayaw ken panagserbina kadagiti sabali a didiosen wenno iti init, bulan wenno kadagiti bituen, banag a maikaniwas iti bilin ti APO,

⁴palutpotenyo a naimbag. No pudno a napasamak daytoy a kinadakes iti Israel,

⁵ipanyo dayta a tao iti ruar ti ili sayo batoen agingga a matay.

⁶Nupayⓙ kasta, kasapulan ti panagtestigo ti dua wenno tallo a tao; saan a mapapatay no maysa la ti saksi.

⁷Masapulⓚ a dagiti saksi ti umuna a mangbato iti nakabasol ket sumaruno dagiti tattao; kastoy ti panangikkatyo iti daytoy a kinadakes.

⁸“Nalabit nga addanto kaso a narigat a kedngan ti ukom a kas iti inggagara wenno saan nga inggagara a panagpapatay wenno riri maipapan iti sanikua wenno panangkabil iti maysa a tao a puon ti pakasugatanna. Inkay iti lugar a pinili ti APO a Diosyo a pagdaydayawan kenkuana,

⁹ket idatagyo ti kasoyo kadagiti papadi a Levita ken iti agdama nga ukom tapno risutenda ti kaso.

¹⁰Ipaulogda ti sentensia ket ibanagyo ti ibagada a maaramid.

¹¹Awatenyo ti ikeddengda ket tungpalenyo a nainget ti ibilinda.

¹²Mapapatay ti siasinoman a mangsukir iti ukom wenno iti padi a madama nga agserserbi; kastoy ti panangikkatyo iti daytoy a kinadakes iti Israel.

¹³Agbutengto ti amin a makadamag iti daytoy ket awanton ti makaitured nga agaramid iti kasta.

¹⁴“Intonⓛ matagikuayon ti daga nga ited ti APO a Diosyo ket agnaedkayon sadiay, nalabit a kayatyonto ti maaddaan iti ari a kas kadagiti pagilian iti likmutyo.

¹⁵Isaadyo nga ari ti pilien ti APO a Diosyo. Masapul a maysa kadagiti kadaraanyo ti isaadyo; diyo dutokan ti saan nga Israelita.

¹⁶Maiparitⓜ a maaddaan ti ari iti adu a kabalio nga usaren ti armadana; saan a mapalubosan nga agpagatang kadagiti kabalio idiay Egipto. Imbaga ti APO a saankayon nga agsubli sadiay.

¹⁷Maiparitⓝ a mangasawa iti adu ta daytoy ti mangyadayo kenkuana iti APO; saan nga agpabaknang a kadagiti pirak ken balitok.

¹⁸No maisaad nga ari, masapul a maaddaan iti kopia ti libro maipapan kadagiti linteg ken pannursuro ti Dios a naadaw iti libro nga ay-aywanan dagiti papadi a Levita.

¹⁹Masapul nga adda a kanayon kenkuana daytoy a libro ket basbasaenna iti unos ti panagbiagna tapno masursurona ti agbuteng iti APO ken agtulnog a sipapasnek iti amin a bilin a nailanad iti daytoy a libro.

²⁰Iti kasta, dinanto ibilang ti bagina a nalalaing ngem dagiti padana nga Israelita ken dinanto mapanunot ti agsukir kadagiti bilin ti APO. Ket ti ari ken dagiti kaputotanna napautto ti panagturayna iti Israel.”