Deuteronomio 18:1-22 RIPV1996 - Bible AI

¹Intuloy ni Moises, “Awan ti daga iti Israel a maited kadagiti papadi a Levita. Pagbiagdanto dagiti sagut ken dagiti dadduma a daton iti APO.

²Saandaⓞ a mapalubosan nga agtagikua iti daga a kas kadagiti dadduma a tribu; ti bingayda isu ti gundawayda nga agserbi a papadi kas inkari ti APO.

³“No adda maidaton a toro a baka wenno karnero, maited kadagiti papadi ti abaga, ti pingping ken ti bituka.

⁴Masapul a maited kadakuada ti umuna nga apit iti trigo, arak, lana ti olibo ken de lana.

⁵Kadagiti amin a tribuyo, ti tribu ni Levi ti pinili ti APO nga agserbi kenkuana a kas papadi iti agnanayon.

⁶“Mabalin ti siasinoman a Levita iti uray ania nga ili ti Israel ti mapan iti lugar a pilien ti APO a pagdaydayawan kenkuana,

⁷ket agserbi a padi iti APO a Diosna a kas kadagiti dadduma a Levita nga agserserbi sadiay.

⁸Maipada ti kaadu ti awatenna a taraon iti kaadu ti taraon nga awaten dagiti dadduma a papadi. Mabalinna nga idulin ti aniaman nga ipatulod kenkuana ti familiana.[6]

⁹“Inton dumtengkayo iti daga nga ited kadakayo ti APO a Diosyo, diyo tultuladen dagiti makarimon nga ugali dagiti tattao nga agnaed sadiay.

¹⁰Diyoⓟ idatag dagiti annakyo a kas daton a mapuoran iti altaryo. Diyo palubos nga agan-anito wenno agbuybuyon dagiti tattaoyo wenno aggamud

¹¹wennoⓠ agipadles wenno makiumanda kadagiti espiritu dagiti natay.

¹²Kagura ti APO a Diosyo dagiti agaramid kadagiti kastoy a makarimon a banag. Daytoy ti gapuna a paksiatennanto dagita a tattao bayat ti isusungadyo.

¹³Masapulⓡ a naan-anay ti kinapudnoyo iti APO.”

¹⁴Kinuna ni Moises, “Iti daga nga inkay sakupen, agtulnog dagiti tattao iti pammagbaga dagiti agan-anito wenno dagiti agbuybuyon ngem saan nga ipalubos ti APO a Diosyo a kasta ti aramidenyo.

¹⁵Mangpatanortoⓢ iti profeta a kas kaniak nga agtaud iti Israel. Masapul nga agtulnogkayo kenkuana.

¹⁶“Iti daydi nga aldaw a panaguummongyo idiay Bantay Sinai, impakpakaasiyo a diyo koma mangngegen nga agsao ti APO ken makitayo iti apuy ta mabutengkayo amangan no mataykayo.

¹⁷Kinuna ngarud kaniak ti APO, ‘Nasayaat ti dawatda.

¹⁸Mangibaonakto iti profeta a kas kenka nga agtaud kadakuada. Ibagakto kenkuana ti isaona ket ibagananto met kadagiti tattao ti amin nga ibilinko.

¹⁹Agsaontoⓣ iti naganko, ket dusaek[7] ti siasinoman a di agtulnog kenkuana.

²⁰Ngem no adda profeta a diak binilin a mangipakaammo iti mensahe iti naganko, masapul a mapapatay gapu iti inaramidna. Kasta met ti maaramid iti siasinoman a profeta nga agsao iti nagan dagiti didiosen.’

²¹“Nalabit a kayatyo nga ammoen no kasano a mailasinyo a saan a nagtaud iti APO ti mensahe ti profeta.

²²No agsao ti profeta iti nagan ti APO ket saan a mapasamak ti ibagana, saan ngarud a nagtaud iti APO ti ibagana. Nagsao dayta a profeta iti bukodna a nakem, ket dikay agbuteng kenkuana.”