Deuteronomio 19:1-21 RIPV1996 - Bible AI

¹Intuloyⓤ ni Moises, “Kalpasan ti panangparmek ti APO a Diosyo kadagiti tattao nga agnaed iti daga nga itedna a tagikuaenyo ken nasakupyon dagiti siudad ken balbalayda ket agtaengkayon sadiay,

²bingbingayenyo ti daga iti tallo a paset; adda siudad ti tunggal paset a nalaka a papanan. No adda pimmatay, mabalinna ti agkamang iti maysa kadagitoy a siudad tapno masalakniban.

⁴No makapapatay ti maysa a tao iti saanna a kabusor, mabalinna ti agkamang sadiay tapno saan a maan-ano.

⁵Kas pangarigan, adda dua a tao a mapan mangayo iti kabakiran. Bayat ti panagpukan ti maysa, masukto ti ulo ti wasay ket mapuntaan ti kaduana a pakaigapuan ti pannakatayna. Mabalin ti nakapatay ti agkamang iti maysa kadagitoy a siudad tapno saan a maan-ano.

⁶No maymaysa ti siudad ket adayo unay a papananna, nalabit a makamakam ti kabagian ti natay nga agibales ket gapu iti pungtotna, mapatayna ti tao nga awan basolna. Kinapudnona, aksidente laeng ti pannakatay ti tao a dina kabusor.

⁷Daytoy ti gapuna nga ibilinko a mangilasinkayo iti tallo a siudad.

⁸“Inton palawaen ti APO a Diosyo ti daga a masakupanyo a kas imbagana kadagiti kapuonanyo ket itedna ti amin a daga nga inkarina,

⁹mangilasinkayto iti tallo pay a siudad. (Itednanto daytoy a daga no tungpalenyo ti amin nga imbilinko ita nga aldaw ken no ayatenyo ti APO a Diosyo ket agbiagkayo a kas mayannurot kadagiti pannursurona.)

¹⁰Aramidenyo daytoy tapno dikay makabasol iti pannakapapatay iti tao nga awan basolna iti daga nga ited kadakayo ti APO a Diosyo.

¹¹“Ngem no kas pangarigan igagara ti maysa a tao a patayen ti kabusorna sa mapan agkamang iti maysa kadagitoy a siudad,

¹²paalanto dagiti panglakayen ti ilina ket yawatda iti kabagian nga agibales tapno patayenna.

¹³Diyonto kaasian. Pukawenyo iti Israel daytoy a mammapatay tapno awanto ti pakaan-anoanyo.

¹⁴“Diyoⓥ yalis ti mohon ti kaarrubayo a nabayagen nga inkabil dagiti kapuonanyo iti daga nga ited kadakayo ti APO a Diosyo.

¹⁵“Saanⓦ nga umdas ti maysa a saksi tapno masentensiaan ti maysa a tao iti nakaidarumanna. Masapul nga adda dua a saksi a mangpaneknek a nakabasol ti maysa a tao.

¹⁶No idarum ti maysa a tao ti padana a tao iti basol a dina inaramid,

¹⁷masapul a dumatagda a dua iti imatang ti APO ket usigen ida dagiti papadi ken dagiti ukom nga agserserbi sadiay.

¹⁸Usigen a naimbag dagiti ukom ti kaso ket no saan a pudno ti pammabasol ti nagdarum a maibusor iti padana nga Israelita,

¹⁹isu ti umawat iti dusa a maipatay koma iti indarumna. Kastoy ti panangikkatyo iti daytoy a kinadakes.

²⁰Madamagto ti amin ti napasamak; agbutengdanto ket awanton ti agaramid iti kasta a kinadakes.

²¹Dikayⓧ mangngaasi; no biag ti inutangmo, biag met ti pagbayadmo, mata iti mata, ngipen iti ngipen, ima iti ima ken saka iti saka.”