Deuteronomio 26:1-19 RIPV1996 - Bible AI

¹Intuloy ni Moises, “Kalpasan ti panangsakupyo iti daga nga ited kadakayo ti APO a Diosyo ket agnaedkayon sadiay,

²masapulⓩ a mangalakay iti umuna nga apit iti tunggal mulayo. Ibasketyo dagitoy ket ipanyo iti naituding a lugar a pagrukbaban.

³Inkay iti padi nga agserserbi iti dayta a tiempo ket kunayo kenkuana, ‘Kayatko nga ipakaammo iti imatang ti APO a Diosko nga addaakon iti daga nga inkarina kadagidi kapuonanmi.’

⁴“Alaen ti padi ti basket sana ikabil iti sango ti altar ti APO a Diosyo

⁵ket ipakaammoyo iti imatang ti APO a Diosyo, ‘Maysa nga agalla-alla nga Arameo ni amak a nangipan iti familiana idiay Egipto. Bassit ti bilangda idi napanda sadiay ngem immaduda ket nagbalinda a nabileg a pagilian.

⁶Pinarparigatdakami dagiti Egipcio ket pinilitdakami nga agtrabaho a kas tagabu.

⁷Immasugkam iti APO a Dios dagiti kapuonanmi. Impangagna dagiti asugmi; nakitana ti panagsagaba, pannakaparparigat ken panagladladingitmi.

⁸Babaen iti naindaklan a pannakabalinna, impanawnakam idiay Egipto. Nagiparang kadagiti milagro ken datdatlag a pasamak. Nakabutbuteng dagiti pasamak a pinarnuayna.

⁹Inyegnakami ditoy ket intedna kadakami daytoy nabaknang ken nadam-eg a daga.

¹⁰Ngarud, yegko iti APO ti umuna nga apitko iti daga nga intedna kaniak.’

¹⁰“Ikabilyo ti basket iti imatang ti APO ket agrukbabkayo sadiay.

¹¹Agyamankayo gapu iti amin a naimbag a banag nga inted kadakayo ti APO a Diosyo, dakayo ken ti familiayo. Awisenyo a makipagrambak dagiti Levita ken dagiti ganggannaet nga agnaed iti sakupyo.

¹²“Tunggalⓐ maikatlo a tawen, itedyo dagiti apagkapullo dagiti apityo kadagiti Levita, ganggannaet, ulila ken balo a babbai tapno iti amin nga ili adda umanay a taraonda. Kalpasanna,

¹³kunayo iti APO, ‘Awanen ti nabati iti nasagradoan nga apagkapullo iti balayko. Intedko kadagiti Levita, ganggannaet, ulila ken balo a babbai a kas imbilinmo kaniak. Awan ti sinalungasingko wenno nalipatak a bilinmo maipapan iti apagkapullo.

¹⁴Diak nangan iti apagkapullo idi nagminatayak. Awan ti inruarko iti daytoy idi maibilangak a narugit iti imatang ti linteg. Awan met ti indatonko uray sangkabassit laeng kadagiti natay. Tinungpalko ti pagayatam, O APO. Inaramidko amin nga imbilinmo kaniak maipapan iti apagkapullo.

¹⁵Tumannawagka ngarud manipud nasantoan a pagtaengam sadi langit ket bendisionam dagiti tattaom nga Israelita ken ti nabaknang ken nadam-eg a daga nga intedmo kadakami, kas inkarim kadagidi kapuonanmi.’

¹⁶“Ita nga aldaw, ibilin ti APO a Diosyo a tungpalenyo dagiti amin a lintegna. Tungpalenyo ngarud ida a sipapasnek iti amin a puso ken kararuayo.

¹⁷Ita nga aldaw, binigbigyo ti APO a kas Diosyo. Inkariyo nga agtulnogkayo kenkuana, tungpalenyo dagiti lintegna ken aramidenyo amin nga ibilinna.

¹⁸Itaⓑ nga aldaw, inawatnakayo ti APO a tattaona a kas inkarina kadakayo ket bilinennakayo a tungpalenyo amin a lintegna.

¹⁹Pagbalinennakay a nabilbileg ngem dagiti dadduma a pagilian a pinarsuana ket maidaydayaw ken maitan-okto ti naganna.[9] Dakayto dagiti nasantoan a tattaona a kas inkarina.”