Deuteronomio 34:1-12 RIPV1996 - Bible AI

¹Pimmanaw ni Moises iti tanap ti Moab ket simmang-at iti Bantay Nebo. Dimmanon iti tapaw ti Bantay Pisga iti daya ti Jerico. Sadiay, impakita ni Yahweh kenkuana ti entero a daga: ti sakup ti Galaad agingga iti amianan iti ili ti Dan;

²ti entero a sakup ti Neftali; dagiti sakup ti Efraim ken Manases; ti sakup ti Juda nga agpa-laud agingga iti Taaw Mediterranean;

³ti akin-abagatan a paset ti Juda; ken ti tanap manipud iti Zoar agingga idiay Jerico a siudad dagiti kayo a palma.

⁴Kinunaⓛ ni Yahweh ken ni Moises, “Daytoy ti daga nga inkarik kada Abraham, Isaac ken Jacob nga ited kadagiti kaputotanda. Impalubosko a kitaem daytoy a daga ngem saankanto a makastrek sadiay.”

⁵Natay ngarud ni Moises, ti adipen ni Yahweh, iti daga ti Moab kas imbaga ni Yahweh kenkuana.

⁶Ni Yahweh ti nangitanem kenkuana idiay Moab, iti tanap a kasumbangir ti ili ti Bet-peor. Ngem agingga ita, awan ti makaammo iti mismo a lugar a nakaitanemanna.

⁷Agtawen ni Moises iti 120 idi matay. Saan a kimmapsut ti bagina wenno ti panagkitana.

⁸Tallopulo nga aldaw a dinungdung-awan dagiti Israelita iti tanap ti Moab.

⁹Napno iti sirib ni Josue nga anak ni Nun agsipud ta isu ti dinutokan ni Moises a sumukat kenkuana. Nagtulnog dagiti Israelita ken ni Josue. Tinungpalda dagiti bilin nga inted ni Yahweh ken ni Moises.

¹⁰Awanenⓜ ti profeta a timmaud iti Israel a kas ken ni Moises. Nakisao ni Yahweh kenkuana iti rupanrupa.

¹¹Awan sabali a profeta a nakaaramid kadagiti nakaskasdaaw a banag ken milagro a kas iti pinaaramid ni Yahweh ken ni Moises a maibusor iti ari ti Egipto, kadagiti ofisialesna ken iti entero a pagilian.

¹²Awan met ti profeta a nakaaramid kadagiti nakabutbuteng ken datdatlag a kas iti inaramid ni Moises iti imatang dagiti amin nga Israelita.