Deuteronomio 5:1-33 RIPV1996 - Bible AI

¹Inummong ni Moises dagiti amin nga Israelita ket kinunana kadakuada, “Tattao ti Israel, denggenyo dagiti amin a linteg nga ipakaammok kadakayo ita nga aldaw. Adalenyo ida ket kitaenyo a tungpalenyo ida a tungpalen.

²Nakitulag kadatayo ti APO a Diostayo idi addatay idiay Bantay Sinai.

³Saan la a kadagiti kapuonantayo ti nakitulaganna no di pay ket kadatay amin a sibibiag kadagitoy nga aldaw.

⁴Manipud iti apuy idiay a bantay, nakisao kadakayo ti APO iti rupanrupa.

⁵Iti dayta nga aldaw, nagtakderak iti nagbaetanyo iti APO tapno ipakaammok kadakayo ti imbagana, ta nagbutengkayo iti apuy ket dikay simmang-at iti bantay.

⁵“Kinuna ti APO,

⁶‘Siak ni Yahweh a Diosyo a nangiruar kadakayo idiay Egipto, ti daga a nakatagabuanyo.

⁷“‘Dikay agdaydayaw iti sabali a dios; siak laeng ti pagdaydayawanyo.

⁸“‘Dikayⓐ agaramid iti imahen wenno kaasping ti uray ania nga adda sadi langit wenno ditoy daga wenno iti danum iti uneg ti daga a pagdaydayawanyo.

⁹Dikayⓑ agrukbab wenno agdaydayaw iti uray ania nga imahen, ta siak ti APO a Diosyo ket diak ipalubos nga adda kasalisalko. Dusaek dagiti gumura kaniak, kasta met kadagiti annakda, appokoda ken appokoda-iti-tumeng.

¹⁰Ngem ipariknak ti ayatko kadagiti rinibribu a kaputotan kadagiti agayat kaniak ken agtulnog kadagiti lintegko.

¹¹“‘Diyoⓒ aramaten ti naganko iti dakes a panggep gapu ta siak, ni Yahweh a Diosyo, dusaek ti siasinoman a mangusar iti naganko iti barengbareng.

¹²“‘Ngilinenyoⓓ ti Aldaw a Panaginana ket pagbalinenyo a nasantoan a kas imbilinko kadakayo—siak ni Yahweh a Diosyo.

¹³Innemⓔ nga aldaw nga agtrabahokayo

¹⁴ngem maidaton kaniak ti maikapito nga aldaw. Panaginana dayta nga aldaw, ket awan ti mapalubosan nga agtrabaho—dakayo, dagiti annakyo, dagiti tagabuyo, dagiti animalyo wenno dagiti ganggannaet nga agnaed iti pagilianyo. Masapul nga aginana met a kas kadakayo dagiti tagabuyo.

¹⁵Laglagipenyo a tagabukayo met idi idiay Egipto ket siak, ni Yahweh a Diosyo, inispalkayo babaen iti naindaklan a pannakabalin ken bilegko. Ngarud, ibilinko kadakayo a ngilinenyo ti Aldaw a Panaginana.

¹⁶“‘Raemenyoⓕ dagiti nagannak kadakayo tapno nasayaatto ti kasasaadyo ken napautto ti panagbiagyo iti daga nga itedko kadakayo. Siak, ni Yahweh a Diosyo, ibilinko nga aramidenyo daytoy.

¹⁷“‘Dikayⓖ mamapatay.

¹⁸“‘Dikayⓗ makikamalala.

¹⁹“‘Dikayⓘ agtakaw.

²⁰“‘Dikayⓙ agsaksi iti ulbod a maibusor iti padayo a tao.

²¹“‘Diyoⓚ tarigagayan ti asawa ti padayo a tao. Diyo tarigagayan a tagikuaen ti balayna, ti dagana, dagiti tagabuna, dagiti bakana, dagiti asnona wenno uray ania a kukuana.’

²²“Dagitoyⓛ dagiti bilin nga inted ti APO kadakayo idi naummongkayo idiay bantay. Nagsao iti napigsa a timek manipud iti apuy ken iti napuskol nga ulep ket awanen sabali nga imbagana. Kalpasanna, insuratna dagiti bilin iti dua a tapi a bato sana inted kaniak.”

²³Kinuna ni Moises, “Idi umap-apuy ti entero a bantay ket nangngegyo ti timek iti kasipngetan, immay kaniak dagiti panguloyo ken dagiti panglakayen dagiti tribuyo.

²⁴Kinunada: ‘Impakita kadakami ti APO a Diostayo ti kinatan-ok ken dayagna idi nangngegmi a nagsao manipud iti apuy! Ita nga aldaw, napaneknekanmi a mabalin nga agtuloy nga agbiag ti maysa a tao uray no nakisao kenkuana ti Dios.

²⁵Ngem apay nga ipustami manen ti biagmi? Pukawennakami la ketdi dayta nakabutbuteng nga apuy. Mataykami no mangngegmi manen ti timek ti APO a Diostayo.

²⁶Adda kadin nagbiag pay kalpasan a nangngegna ti sibibiag a Dios a nagsao manipud iti apuy?

²⁷Agsublika, Moises, ket denggem amin nga ibaga ti APO a Diostayo. Kalpasanna, umaymo ipakaammo kadakami ti imbagana kenka. Dumngeg ken agtulnogkamto.’

²⁸“Nangngeg ti APO ti imbagayo ket kinunana kaniak, ‘Nangngegko ti sao dagitoy a tattao ket pudno ti kunada.

²⁹No kasta la koma a kanayon ti panagpampanunotda! Kanayon la koma nga agbutengda kaniak ken agtulnogda kadagiti amin a bilinko tapno nasayaatto latta ti kasasaadda ken dagiti kaputotanda.

³⁰Inka ibaga nga agsublida kadagiti toldada.

³¹Ngem agbatika ditoy ket itedko kenka ti amin a linteg ken bilinko. Isurom dagitoy kadagiti tattao tapno tungpalenda ida iti daga nga itedko kadakuada.’

³²“Tattao ti Israel, tungpalenyo a tungpalen ti amin nga imbilin ti APO a Diostayo. Diyo sukiren ti uray ania a lintegna.

³³Tungpalenyo amin ida tapno narang-aykayto ket atiddogto ti biagyo iti daga nga inkay tagikuaen.”