Dungdung-aw 4:1-22 RIPV1996 - Bible AI

¹Napukawen ti rimat ti nasudi a balitokmi! Agkaiwara iti kalsada dagiti bato ti Templo.

²Idi, napateg a kas balitok kadakami dagiti agtutubo a lallaki ti Sion; ita, maibilangdan a gagangay a banga.

³Uray ti lobo, pasusoenna dagiti urbonna. Ngem mayarig dagiti tattaok kadagiti abestrus a naranggas kadagiti annakda.

⁴Bay-anda dagiti maladagada a matay iti bisin ken waw. Dumawat dagiti ubbing iti kanenda, ket awan ti mangted kadakuada.

⁵Matmatay iti bisin kadagiti kalsada dagiti tattao a naimas idi ti taraonna. Dagiti dimmakkel iti nanam-ay a panagbiag agsuksukainda iti basura nga agbirok iti kanenda.

⁶Nadagdagsenⓑ ti pannakadusa dagiti tattaok ngem dagiti agnaed iti Sodoma a kellaat a pinukaw ti Dios.

⁷Saan a natulawan dagiti prinsipemi;[8] awan rugitda a kas iti niebe. Nakired ken napigsada ket nabusnag ken nasalun-atda.

⁸Ita, gapu iti limmitemen a rupada, awanen makabigbig kadakuada kadagiti kalsada. Wen, natayda ket limmitemen ti rupada. Nagango a kas kayo ti kudilda a kimmayetket iti tultulangda.

⁹Nagasgasat dagiti natay iti gubat ngem dagiti naud-udi a pimmusay a nain-inut a natay iti bisinda ta awan ti taraon a pagbiagda.

¹⁰Nakabutbutengⓒ a buya ti inyeg ti didigra a nagdissuor kadagiti tattaok. Linuto dagiti naayat nga inna dagiti mismo nga annakda tapno adda kanenda.

¹¹Binulosan ni Yahweh ti naan-anay a pungtotna; pinuoranna ti Sion agingga a dimmapu iti daga.

¹²Awan ti mamati, uray pay dagiti agtuturay kadagiti ganggannaet a nasion, nga adda makastrek kadagiti ruangan ti Jerusalem.

¹³Ngem kasta ti napasamak! Nagbasol dagiti papadi ken profetana ket inyegda ti ipapatay dagiti awan basolna.

¹⁴Adda dagiti pangulona kadagiti kalsada; kasda la bulsek nga agalla-alla. Kasta unay ti pannakadaripespesda iti dara ket maariek dagiti tattao a mangsagid kadakuada.

¹⁵“Umadayokayo!” ipukkaw dagiti tattao. “Natulawankayo! Didakam sagsagiden.” Nagalla-allada ngarud kadagiti pagilian; awan a pulos ti nangpasangbay kadakuada.

¹⁶Awan pangaramatan kadakuada ti APO; isu met la ti nangwarawara kadakuada. Dina binigbig dagiti papadi ken papangulomi.

¹⁷Nagsapulkam iti tulong ngem awan nasarakanmi agingga a naumakami. Inur-uraymi ti tulong ti maysa a nasion nga awan ti maitedna kadakami.

¹⁸Sipsiputannakami ti kabusor; dikam makapagna uray pay kadagiti kalsada. Naggibusen dagiti aldawmi, dimtengen ti kanibusananmi.

¹⁹Naparpardas ngem ti sippayot ti agila ti panangkamatda kadakami. Inanupdakami kadagiti katurturodan, sinanebdakami iti let-ang.

²⁰Tiniliwda ti gubbuayan ti biagmi, ti ari a pinili ni Yahweh, ti ari a nagtalkanmi a mangikanawa kadakami iti amin a rumaut iti sakupmi.

²¹Agkatawakayo latta, tattao ti Edom ken Uz; agragsakkayo ita ta adda pay panawenyo. Umayto met ti pannakadidigrayo. Agbasingbasingkayonto iti bartekyo. Maibabain gapu ta lamolamokayo.

²²Nalpasen a nadusa ti Sion gapu kadagiti basolna; wayawayaannatayon ti APO iti pannakaibaludtayo iti sabali a daga. Ngem dusaennakayto ti APO, dakayo nga Edomita. Ibutaktaknanto dagiti basbasolyo!