Exodo 1:1-22 RIPV1996 - Bible AI

¹Dagitoyⓐ ti nagan dagiti annak ni Jacob a kimmuyog kenkuana a napan idiay Egipto agraman dagiti familiada:

²Ruben, Simeon, Levi, Juda,

³Issacar, Zabulon, Benjamin,

⁴Dan, Neftali, Gad ken Aser.

⁵Pitopulo ti dagup dagiti annak a nagtaud ken ni Jacob. Adda idin ni Jose nga anakna idiay Egipto.

⁶Natay sadiay ni Jose, kasta met amin a kakabsatna ken amin daydi a kaputotan.

⁷Nupayⓑ kasta, napardas ti panagadu dagiti Israelita, isu a pimmigsada ket nagwaras dagiti kaputotanda iti entero nga Egipto.

⁸Naglabasⓒ ti tiempo. Nagturay idiay Egipto ti baro nga ari nga awan ti ammona maipapan ken ni Jose.

⁹“Kitaenyo,” kinuna ti ari kadagiti iturayanna. “Agpeggadtayo ta nakaad-adu ken nabileg unayen dagiti Israelita.

¹⁰Masapulⓓ nga agaramidtayo iti pamuspusan tapno malapdan ti panagaduda. Ta no adda gubat, amangan no kumapponda kadagiti kabusor a manggubat kadatayo, ket aglibasda a pumanaw[1] iti dagatayo.”

¹¹Iti kasta, nangdutokda kadagiti narungsot a kapatas a mangparigat kadagiti Israelita nga agtrabaho iti nadagdagsen pay ngem iti sigud nga ar-aramidenda. Binangon dagiti Israelita ti Pitom ken Rameses, dua a siudad a pagidulinan iti makan.

¹²Ngem no kasano ti panangparparigat dagiti Egipcio kadakuada, immad-aduda ketdi ket nagwarasda. Isut' gapuna a kinabuteng ida dagiti Egipcio.

¹³Naranggas ti panangtagabuda kadagiti Israelita.

¹⁴Rimmigat ti biagda. Pinilitda ida nga agtrabaho kadagiti talonda ken agipasdek kadagiti patakderda. Dida naasian kadakuada.

¹⁵Kinasao ti ari ti Egipto dagiti partera a Hebreo ket imbilinna kadakuada, “No paanakenyo dagiti Hebreo, patayenyo ti maladaga no lalaki. Ngem no babai, bay-anyo nga agbiag.” Maysa kadagitoy a partera ti agnagan iti Zifra ket Pua ti nagan met ti sabali.

¹⁷Ngem managbuteng dagiti partera iti Dios ket saanda a tinungpal ti bilin ti ari. Binay-anda nga agbiag dagiti maladaga a lallaki.

¹⁸Pinaayaban ngarud ti ari dagiti partera. Sinaludsodna, “Apay a kasta ti ar-aramidenyo? Apay a palpalubosanyo nga agbiag dagiti lallaki a maladaga?”

¹⁹“Sabali ngamin dagiti babbai a Hebreo, apo,” insungbatda. “Saanda a kas kadagiti babbai nga Egipcio. Nalakada nga aganak. Sakbay nga adda sumangpet a partera, naipasngayen ti ubing.”

²⁰Gapu ta managbuteng dagiti partera iti Dios, binendisionanna dagitoy, ket naikkanda iti bukodda a familia. Immad-adu ken bimmilbileg dagiti Israelita.

²²Imbilinⓔ ti ari ti Egipto kadagiti amin nga iturayanna nga ibellengda iti karayan Nile ti amin a kaippasngay a lallaki a Hebreo, ngem palubosanda nga agbiag dagiti babbai.