Exodo 17:1-16 RIPV1996 - Bible AI

¹Pimmanawⓩ ti amin nga Israelita iti let-ang ti Sin. Nagalis-alisda iti nadumaduma a disso kas bilin ni Yahweh. Nagkampoda idiay Refidim ngem awan ti danum sadiay a mabalin nga inumen dagiti tattao.

²Iti kasta, pinabasolda ni Moises. “Ikkannakam iti inumen,” kinunada.

²“Apay a pabasolendak?” kinuna ni Moises. “Apay a suotenyo ti APO?”

³Ngem mawaw unay dagiti tattao ket intuloyda ti nagreklamo. Kinunada, “Apay ngamin nga inruarnakami idiay Egipto? Tapno patayennakami iti waw, agraman dagiti annakmi ken dagiti animalmi?”

⁴Immawag ni Moises ken ni Yahweh. Kinunana, “Ania ti aramidek kadagitoy a tattao? Kayatdakon a batoen.”

⁵Kinuna ni Yahweh ken ni Moises, “Mangikuyogka iti sumagmamano a pangulo ti Israel ket umun-unakayo a magna ngem dagiti tattao. Itugotmo ti sarukod nga imbautmo idi iti Karayan Nile.

⁶Agtakderakto iti imatangyo iti bato iti Bantay Horeb. Ibautmo ti sarukodmo iti bato ket agpussuakto iti danum nga inumen dagiti tattao.”

⁶Kasta ti inaramid ni Moises iti imatang dagiti pangulo ti Israel.

⁷Napanaganan ti disso iti Massa ken Meriba[26] gapu ta nakisuppiat dagiti Israelita ken sinuotda ni Yahweh idi saludsodenda, “Adda met la ti APO kadatayo wenno awan?”

⁸Dimteng dagiti Amalekita ket ginubatda dagiti Israelita idiay Refidim.

⁹Kinuna ni Moises ken ni Josue, “Pumilika kadagiti lallaki a kaduam a mapan manggubat kadagiti Amalekita inton bigat. Agtakderakto iti tapaw ti turod a nakaiggem iti sarukod nga inted ti Dios.”

¹⁰Inaramid ni Josue ti imbilin ni Moises ket napanna ginubat dagiti Amalekita. Simmang-at met da Moises, Aaron ken Hur iti turod.

¹¹No nakangato dagiti takiag ni Moises, mangab-abak dagiti Israelita, ngem no ibabana, dagiti met Amalekita ti mangab-abak.

¹²Idi maktangan dagiti takiag ni Moises, nangala da Aaron ken Hur iti bato sada inkabil a nagtugawanna idinto a nagsinsinanda nga impangato dagiti imana. Iniggamanda dagiti imana agingga a limnek ti init.

¹³Kastoy ti panangparmek ni Josue kadagiti Amalekita.

¹⁴Kalpasanna,ⓐ kinuna ni Yahweh ken ni Moises, “Isuratmo ti pakasaritaan ti napasamak tapno saan a malipatan. Ibagam ken ni Josue nga ikisapkonto dagiti Amalekita.”

¹⁵Nangbangon ni Moises iti altar a pinanagananna iti Yahweh-nissi.[27]

¹⁶Kinunana, “Ipangatom ti bandera.[28] Saanto nga agsardeng ni Yahweh a manggubat kadagiti Amalekita!”