Exodo 19:1-25 RIPV1996 - Bible AI

¹Pimmanaw dagiti Israelita iti Refidim ket iti umuna nga aldaw iti maikatlo a bulan kalpasan ti ipapanawda idiay Egipto, dimtengda iti let-ang ti Sinai. Nagkampoda iti arisadsad ti Bantay Sinai, ket

³simmang-at ni Moises iti bantay tapno makiuman iti Dios.

³Inawagan ni Yahweh ni Moises manipud iti bantay ket imbagana kenkuana ti sawenna kadagiti Israelita a kaputotan ni Jacob:

⁴“Nakitayo ti inaramidko kadagiti Egipcio ken no kasano ti panangawitko kadakayo—kaslaak la agila a nangitayab kadagiti sibong a nangipan kadakayo ditoy.

⁵Ita,ⓓ ⓔ no agtulnogkayo kaniak ket salimetmetanyo ti tulagko, dakayonto dagiti tattaok. Kukuak ti entero a daga, ngem dakayto dagiti napili a tattaok,

⁶tattaoⓕ a naikonsagrar nga agpaay laeng kaniak ket agserbikayonto kaniak a kas papadi.”

⁷Simmalog ngarud ni Moises ket inayabanna dagiti amin a panglakayen dagiti tattao. Imbagana kadakuada ti amin nga imbilin ni Yahweh.

⁸Sangsangkamaysa a simmungbat dagiti amin a tattao a tungpalenda ti amin nga imbaga ni Yahweh. Ket impakaammo ni Moises ken ni Yahweh ti insungbat dagiti tattao.

⁹Kinuna ni Yahweh ken ni Moises, “Umayakto kenka iti napuskol nga ulep tapno mangngeg dagiti tattao a makisasaoak kenka ket mamatida kenkan manipud ita.” Imbaga ni Moises ken ni Yahweh ti insungbat dagiti tattao

¹⁰ket kinuna ni Yahweh kenkuana, “Inka kadagiti tattao ket ibagam a dalusanda dagiti bagida ita ken inton bigat tapno agsaganada nga agdaydayaw. Masapul a labaanda dagiti pagan-anayda

¹¹ket sisasaganadanton iti maikatlo nga aldaw. Iti dayta nga aldaw, bumabaakto iti Bantay Sinai tapno makitadak dagiti amin a tattao.

¹²Mangikabilkantoⓖ iti beddeng iti aglikmut ti bantay a pagpatinggaan dagiti tattao. Ibagam kadakuada a dida sumang-at wenno umasideg iti bantay. No adda bumaddek iti bantay, masapul a mapapatay:

¹³Maubor wenno mapana agingga a matay ket maiparit ti mangsagid kenkuana. Kasta ti aramidenyo iti tao wenno iti animal; masapul a mapapatay. Ngem inton mapuyot ti tangguyob, sumang-atton dagiti tattao iti bantay.”

¹⁴Simmalog ni Moises iti bantay ket pinagsaganana dagiti tattao nga agdaydayaw. Isu a linabaanda dagiti pagan-anayda,

¹⁵ket imbagana kadakuada, “Nakasaganakayton iti maikatlo nga aldaw. Dikay pay la makikaidda iti assawayo.”

¹⁶Itiⓗ ⓘ agsapa iti maikatlo nga aldaw, naggurruod ken nagkimat iti bantay. Nagparang ti napuskol nga ulep. Immaweng ti nakapigpigsa nga uni ti trumpeta. Nagpigerger dagiti amin a tattao iti kampo gapu iti buteng.

¹⁷Indauloan ida ni Moises a rimmuar iti kampo tapno sabtenda ti Dios. Nagtakderda iti arisadsad ti bantay.

¹⁸Nakumotan ti Bantay Sinai iti asuk gapu ta bimmaba sadiay ni Yahweh babaen iti apuy. Nagpangato ti asuk a kas iti asuk ti urno ket kasta unay ti panagkintayeg ti bantay.[31]

¹⁹Pimmigsa a pimmigsa ti uni ti trumpeta. Nagsao ni Moises ket sinungbatan ti Dios babaen iti panangibulosna iti gurruod.

²⁰Bimmaba ni Yahweh iti tapaw ti Bantay Sinai, ket inayabanna ni Moises a sumang-at. Napan ni Moises iti tapaw,

²¹ket kinuna ni Yahweh kenkuana, “Sumalogka ket ballaagam dagiti tattao a dida labsan ti beddeng nga umay kumita kaniak. No labsanda, adunto kadakuada ti matay.

²²Uray dagiti papadi nga umasideg kaniak, masapul a dalusanda dagiti bagbagida, ta no saan, dusaek ida.”

²³Kinuna ni Moises ken ni Yahweh, “Saan a mabalin a sumang-at dagiti tattao gapu ta imbilinmo kadakami nga ibilangmi a nasagradoan ti bantay ken mangikabilkami iti beddeng iti likmutna.”

²⁴Ngem kinuna ni Yahweh kenkuana, “Sumalogka ket inka alaen ni Aaron. Ngem saan a labsan dagiti papadi ken dagiti tattao ti beddeng nga umasideg kaniak ta dusaek ida no aramidenda ti kasta.”

²⁵Simmalog ngarud ni Moises ket imbagana kadagiti tattao ti sinao ti APO.