Exodo 34:1-35 RIPV1996 - Bible AI

¹Kinuna ni Yahweh ken ni Moises, “Mangaramidka iti dua a tapi ti bato a kas kadagidi immuna ket isuratkonto kadagitoy dagiti naisurat kadagidi tapi a binurakmo.

²Agsaganaka a sumang-at iti Bantay Sinai inton agsapa ket kitaennakto iti tapawna.

³Siksika laeng ti sumang-at. Awan ti siasinoman a tao a makita iti uray ania a disso iti bantay. Diyo met ipalubos nga adda karnero wenno baka nga agarab iti arisadsadna.”

⁴Nangaramid ngarud ni Moises iti dua a tapi a bato, ket iti agsapa ti sumuno a bigat, insang-atna dagitoy iti Bantay Sinai, kas imbilin kenkuana ni Yahweh.

⁵Bimmaba ni Yahweh iti maysa nga ulep nagtakder iti abay ni Moises, ket binalikasna ti naganna Yahweh.[50]

⁶Nagnaⓢ ni Yahweh iti sangoanan ni Moises ket kinunana, “Siak ni Yahweh a Dios a managayat ken manangngaasi. Saanak a nalaka nga agpungtot. Nadungngo ken napudnoak.

⁷Tungpalek ti karik iti rinibribu a kaputotan,[51] ket pakawanek ti kinadakes, panagsalungasing ken basol. Ngem dusaek a dusaen dagiti annak ken appoko agingga iti maikatlo ken maikapat a kaputotan gapu kadagiti basol dagiti ammada.”

⁸Dinagdagus ni Moises nga inrukob ti ulona iti daga ket nagdaydayaw.

⁹Kinunana, “Apo, no pudno met laeng a maragsakanka kaniak, dawatek a kuyogennakami. Nasukir dagitoy a tattao, ngem pakawanennakami koma kadagiti kinadakesmi ket awatennakami a kas tattaom.”

¹⁰Kinuna ni Yahweh ken ni Moises, “Ita, makitulagak kadagiti Israelita. Agaramidakto kadagiti milagro a di pay napasamak ditoy lubong wenno iti uray ania a pagilian. Makitanto dagiti amin a tattao dagiti naindaklan a banag a kabaelak nga aramiden agsipud ta agaramidak kadagiti nakaskasdaaw a banag nga agpaay kadakayo.

¹¹Tungpalenyo dagiti bilin nga itedko ita nga aldaw. Iti isusungadyo, papanawekto dagiti Amorreo, Cananeo, Heteo, Perezeo, Heveo ken Jebuseo.

¹²Dikay makitultulag kadagiti tattao a madanonyo sadiay, ta daytoyto ti pangrugian ti pannakadadaelyo.

¹³Rebbaenyoⓣ ketdi dagiti altarda, dadaelenyo dagiti nasagradoan a bato nga adigida ken dagiti kaykayo a simbolo ti didiosenda nga Asera.

¹⁴“Dikay agdaydayaw iti sabali a dios, ta siak, ni Yahweh, diak ipalubos nga adda kasalisalko.

¹⁵Dikay makitultulag kadagiti tattao sadiay, agsipud ta tunggal agdaydayaw ken agidatonda kadagiti didiosenda, awisendakayto ket masulisogkayto a mangan kadagiti taraon a naidaton.

¹⁶Amangan ketdi no mangasawa dagiti lallaki nga annakyo kadagitoy ganggannaet a babbai a mangisungsong kadakuada a mangtallikud kaniak ket agdaydayawda kadagiti didiosenda.

¹⁷“Dikayⓤ mangsukog kadagiti didiosen a pagdaydayawanyo.

¹⁸“Rambakanyoⓥ ti Fiesta ti Tinapay nga awan Lebadurana. Kas imbilinko, mangankay iti tinapay nga awan lebadurana iti las-ud ti pito nga aldaw iti Abib ta iti daytoy a bulan, pimmanawkayo idi idiay Egipto.

¹⁹“Kukuakⓦ ti amin nga inauna a lalaki, tao man wenno dingngoenyo.

²⁰Ngemⓧ masapul a subbotenyo ti inauna nga anak ti asno babaen iti pannangtedyo iti maysa a karnero a kas sukatna. No diyo subboten ti asno, rungdoenyo ti tengngedna. Subbotenyo ti amin nga inauna nga anakyo.

²⁰“Saankayo nga umay kaniak no awan datonyo.

²¹“Agtrabahokayⓨ iti innem nga aldaw, ngem aginanakayo iti maikapito, uray no panagaarado wenno panagaani.

²²“Rambakanyoⓩ ti Fiesta ti Panagapit iti damo a panaganiyo iti trigo, kasta met ti Fiesta ti Abong-abong inton burasenyo dagiti bungbunga ti mulayo.

²³“Mamitlo iti makatawen nga umay dagiti amin a lallaki nga adda kadakayo tapno agdaydayawda kaniak, ni Yahweh a Dios ti Israel.

²⁴Kalpasan ti panangpapanawko kadagiti tattao iti isusungadyo ket palawaek ti sakupyo, awanto ti agpanggep a mangraut iti pagilianyo bayat ti pannakarambak dagiti tallo a fiesta.

²⁵“Diyoⓐ pakuyogan ti tinapay nga adda lebadurana iti dara ti animal nga idatonyo kaniak a sakrifisio. Diyo ipabigat ti uray ania a paset ti animal a pinatayyo iti Fiesta ti Paskua.

²⁶“Tinawenⓑ a yegyo iti balay ni Yahweh ti umuna a trigo a maapityo. “Diyo lutoen ti urbon a karnero wenno urbon a kalding iti gatas ti inana.”

²⁷Kinuna ni Yahweh ken ni Moises, “Isuratmo dagiti imbagak ta dagitoy ti alagaden ti pannakitulagko kenka ken iti Israel.”

²⁸Uppat a pulo nga aldaw ken rabii a nagyan sadiay ni Moises a kaduana ni Yahweh. Saan a nangnangan wenno immin-inum. Insuratna kadagiti tapi a bato ti linaon ti tulag—dagiti Sangapulo a Bilin.

²⁹Simmalogⓒ ni Moises manipud iti Bantay Sinai a siiiggem kadagiti tapi a bato a nakailanadan dagiti Sangapulo a Bilin. Gapu iti pannakisaona ken ni Yahweh, agranraniag ti rupana ngem saanna nga ammo.

³⁰Idi makita ni Aaron ken dagiti Israelita nga agranraniag ti rupana, nagbutengda nga umasideg kenkuana.

³¹Ngem inayaban ida ni Moises, isu a napan kenkuana ni Aaron ken dagiti amin a pangulo ti ili ket kinasaona ida.

³²Kalpasanna, linawlaw dagiti amin nga Israelita ket impakaammona kadakuada dagiti amin a bilin nga imbaga ni Yahweh kenkuana iti Bantay Sinai.

³³Idi malpasen ti panagsaona kadakuada, inabungotanna ti rupana.

³⁴Tunggal sumrek ni Moises iti Tolda a Pakiumanan a makisao ken ni Yahweh, ikkatenna ti abungotna. No rummuar, ipakaammona kadagiti Israelita dagiti amin a naibilin kenkuana

³⁵ket makitada nga agranraniag ti rupana. Abungotanna met laeng ti rupana agingga a mapan makisao manen ken ni Yahweh.