Ezekiel 1:1-28 RIPV1996 - Bible AI

1Itiⓐ maikalima nga aldaw, iti maikapat a bulan, iti maika-30 a tawen,[1] siak, ni Ezekiel a padi ken anak ni Busi, nakipagnanaedak kadagiti napagtalaw a kas balud a Judio iti igid ti Karayan Kebar idiay Babilonia. Naglukat ti langit, ket nakitak ti Dios iti maysa a parmata. (

2Napasamakⓑ daytoy iti maikalima a tawen ti pannakaitalaw ni Ari Jehoyakin a kas balud.)

3Ket sadiay, iti igid ti Karayan Kebar idiay Babilonia, nangngegko ti timek ni Yahweh a nakisao kaniak ket nariknak ti pannakabalinna.

4Timmangadak ket nakitak ti napigsa nga alipugpog a naggapu iti amianan. Adda kimat nga aggapgapu iti napuskol nga ulep, ket naraniag ti langit iti likmutna. Iti pagkimkimatanna, adda sumilsilap a kasla bronse.

5Itiⓒ tengnga ti alipugpog, nakitak dagiti kasla sibibiag a parsua nga umasping iti tao,

6ket adda uppat a rupa ken uppat a payak ti tunggal maysa kadakuada.

7Nalinteg dagiti sakada ngem dagiti dapanda kasla kukod ti baka. Rumimatrimat dagiti parsua a kasla napasileng a bronse.

8Malaksid dagiti uppat a rupa ken uppat a payakda, adda pay ima ti tao iti baba ti tunggal payak nga adda iti uppat a sikiganda.

9Nakaukrad dagiti dua a payak ti tunggal maysa, ket agsisinnagid ti murdong ti payakda. Iti kasta, kuadrado ti formada. No aggunayda, aggunayda a kasla maysa a grupo a saan nga agpusipos dagiti bagida.

10Addaⓓ uppat nga agduduma a rupa ti tunggal animal: rupa ti tao iti sango, rupa ti leon iti kannawan, rupa ti baka iti kannigid ken rupa ti agila iti likud.

11Siuukrad ti dua a payak[2] ti tunggal parsua, ket agsisinnagid ti murdong dagiti payakda. Dua met a payak ti mangabbong kadagiti bagida.

12Sumango ti tunggal animal iti uppat a direksion. Iti kasta, mabalinda ti agturong iti kayatda a papanan a saanda nga agpusipos.

13Itiⓔ baet dagiti[3] parsua, adda kasla gumilgil-ayab nga aluten nga agalis-alis. Gumil-ayab ti apuy ket agipugso iti kasla kimat.

14Agsublisubli dagiti animal a kasla iti kapardas ti kimat.

15Bayatⓕ ti panangmatmatko kadagiti uppat a parsua, nakitak ti uppat a pilid a sumagid iti daga iti abay ti tunggal maysa kadakuada.[4]

16Rumimatrimat ti tunggal pilid a kasla napateg a bato. Agpapada dagiti uppat a pilid. Adda pilid iti uneg ti tunggal pilid nga agturong iti sabali a direksion.

17Iti kasta, mabalin nga agturong dagiti pilid iti uray ania kadagiti uppat a direksion.

18Pasigⓖ a mata ti nangabbong kadagiti rueda ti pilid.

19No aggunay dagiti parsua, aggunay met a maisurot dagiti pilid. No agpangatoda, agpangato met dagiti pilid.

20Agturong dagiti pilid iti sadinoman a kayatda a pagturongan, ket aramidenda ti aramiden dagiti animal agsipud ta iturayan ida dagiti animal.

21Ngarud, no aggunay dagiti parsua, wenno no sumardengda, wenno no agpangatoda, kasta met ti aramiden dagiti pilid.

22Itiⓗ ngatoen ti ulo dagiti parsua, adda kasla atep a naaramid iti rumimatrimat a kristal.

23Sadiay, iti sirok ti atep nakatakder dagiti parsua. Siuukrad dagiti dua a payak ti tunggal parsua a situturong kadagiti sarsarunoenda, ket dua a payak met ti mangabbong kadagiti bagida.

24Nangngegkoⓘ ti banesbes dagiti payakda iti panagtayabda. Kasla daranudor ti baybay, kasla arimbangaw ti dakkel nga armada, kasla timek ti Dios a Mannakabalin-amin. Idi sumardengda nga agtayab, nagkupin dagiti payakda,

25ngem adda latta mangngeg a timek nga aggapu iti atep, iti ngatoen dagiti uloda.

26Itiⓙ ngatoen ti atep, adda kasla trono a naaramid iti safiro. Adda kasla tao nga agtugtugaw iti trono.

27Kaslaⓚ tao ti agranraniag a kasla bronse iti tengnga ti apuy. Raniaganna ti aglikmut,

28ket addaan kadagiti amin a kolor nga adda iti bullalayaw.

28Daytoy ti makapurar a lawag a mangipakita iti kaadda ti APO.