Ezekiel 17:1-24 RIPV1996 - Bible AI

¹Nagsao ti APO kaniak.

²Kinunana, “Anak ti tao, kasaom dagiti Israelita babaen iti pangngarig

³tapno maammoanda ti ibagbagak kadakuada, siak ti Apo a DIOS: Adda idi dakkel nga agila a dimteng idiay Bantay Libano. Siuukrad dagiti atitiddog a payakna ken napipintas ken agduduma ti maris dagiti dutdotna. Nangtukkol iti murdong ti kayo a sedro,

⁴ket impanna iti daga dagiti komersiante. Indissona iti siudad dagiti agtagtagilako.

⁵Kalpasanna, nangala iti naganus a mula iti daga ti Israel, ket immulana iti nadam-eg a talon a kanayon a madanuman.

⁶Dimmakkel ti mula, ket nagbalin a nababa nga ubas a nagsaknap dagiti sangana. Nagpangato dagiti sanga nga agturong iti agila; nagpauneg dagiti ramutna. Narukbos ti sanga ken bulong ti ubas.

⁷“Adda sabali a dakkel nga agila nga addaan iti dadakkel a payak ken napupuskol a dutdot. Ita, inturong ti ubas dagiti ramutna iti agila kasta met dagiti bulongna bareng no ad-adu ti danum nga itedna ngem ti danum ti hardin a nakaimulaanna.[20]

⁸Ngem naimulan ti ubas iti talon a nadam-eg ken nasayaat ti pannakadanumna. Iti kasta, agtubo dagiti bulongna, agbunga ken agbalin a narukbos nga ubas.

⁹“Siak nga Apo a DIOS, saludsodek, ‘Agbiag ken dumakkel kadi daytoy nga ubas? Dinto aya paruten ti immuna nga agila, rurosenna dagiti bungana, tukkolenna dagiti sangana, ket bay-anna a magango?’ Saan a masapul ti adu a pigsa wenno nabileg a nasion a pangparut kenkuana.

¹⁰Agpayso a naimula, ngem agbiag ken dumakkel kadi? Saan ngata a malaylay no dalapusen ti angin nga aggapu iti daya? Dinto ngata malaylay iti lugar a nakaimulaanna?”

¹¹Kinuna ti APO kaniak,

¹²“Saludsodemⓓ kadagitoy nasukir a tattao no ammoda ti kayat a sawen ti pangngarig. Ibagam kadakuada nga immay ti ari ti Babilonia ditoy Jerusalem ket inyawidna idiay Babilonia ti ari ti Jerusalem agraman dagiti ofisialesna.

¹³Nangala ti maysa kadagiti familia ti ari, nagtulagda ket pinagsapatana a dina salungasingen ti nagtulaganda. Innalana ti sumagmamano a natan-ok a lallaki a kas balud

¹⁴tapno lapdanna nga umalsa manen dagiti tattao ken tapno masigurado a matungpal ti nagtulaganda.

¹⁵Ngem immalsa ti ari ti Juda, ket nangibaon kadagiti pannakabagina a mapan idiay Egipto tapno mangalada kadagiti kabalio ken iti adu a soldado. Agballigi ngata ti ari? Maliklikanna ngata ti pannakadadaelna no kasta ti aramidna? Saan! Madusa a madusa no salungasingenna ti tulag.”

¹⁶Kuna ti Apo a DIOS, “Iti naganko a sibibiag a Dios, isapatak a matayto daytoy nga ari idiay Babilonia agsipud ta sinalungasingna ti karina ken ti nagtulaganda iti ari ti Babilonia a nangisaad kenkuana iti trono.

¹⁷Uray ti nabileg nga armada ti ari ti Egipto, dinanto matulongan a manggubat kadagiti taga-Babilonia inton agaramidda kadagiti sarikedked ken agkalida kadagiti abut tapno agpapatayda iti adu a tattao.

¹⁸Sinalungasingna ti karina ken ti nakitulaganna. Inaramidna amin dagitoy, ket ita, dinto makalisi.”

¹⁹Kuna ti Apo a DIOS, “Siak ti sibibiag a Dios, ket dusaekto ti ari ti Juda ta sinalungasingna ti tulag a sinapataanna a tungpalen iti naganko.

²⁰Isarwagkonto kenkuana ti iket ti maysa a mangnganup ket matiliwto. Ipankonto idiay Babilonia ket dusaekto sadiay ta saan a nagtalinaed a napudno kaniak.

²¹Matayto iti gubat dagiti amin a kalaingan a soldadona, ket mawarawaranto dagiti makalasat iti amin a suli ti daga. Iti kasta, maammoamto a siak, ni Yahweh, ti nagsao.”

²²Kastoy ti kuna ti Apo a DIOS, “Mangalaakto iti rawis ti natayag a sedro, ket mangsip-akakto iti naganus a saringit. Imulakto iti tapaw ti nangato a bantay,

²³iti kangatoan a bantay ti Israel. Agsanganto ket agbunga; agbalinto a narukbos a sedro. Agumokto ti amin a kita ti tumatayab, ket agapondanto iti sirokna.

²⁴Maammoanto amin a kayo ti daga a siak ni Yahweh. Pukanek dagiti natatayag a kayo, ket padakkelek dagiti kayo a babassit. Pagangoek dagiti nalangto a kayo, ket palangtoek manen dagiti kayo a nagango.

²⁴Siak, ni Yahweh, ti nagsao. Ibanagko ti imbagak nga aramiden.”