Ezekiel 19:1-14 RIPV1996 - Bible AI

¹Imbaga kaniak ti APO nga ikantak daytoy a dung-aw a maipaay iti dua a prinsipe ti Israel:

²Pudno a leon ti inam! Pinadakkelna dagiti urbonna iti bunggoy dagiti narungsot a leon.

³Nangpatanor iti urbon ket insurona nga aganup; dimmakkel ket naglamut kadagiti tao.

⁴Nadamag daytoy dagiti nasion, ket tiniliwda iti palab-og. Inkabilda iti tangkal, ket impanda idiay Egipto.

⁵Nagur-uray ti ina ti leon agingga a napukaw ti namnamana. Nangpatanor manen iti maysa kadagiti urbonna, ket nagbalin a narungsot a leon.

⁶Idi nakadakkelen, nakipagdakiwas kadagiti padana a leon; nasursurona ti aganup ken aglamut iti tao.

⁷Nagrakrak kadagiti sarikedked ket nagdadael kadagiti ili. Tunggal agungor, agbuteng dagiti tattao.

⁸Nagmaymaysa dagiti nasion a manggubat kenkuana; naggapu dagiti tattao iti amin a lugar. Impakatda dagiti iketda, ket tiniliwda ti leon iti siloda.

⁹Inkabilda iti tangkal, ket impanda iti ari ti Babilonia. Impupokda sada binantayan a naimbag, tapno saanen a mangngeg ti ungorna kadagiti turod ti Israel.

¹⁰Mayarig idi ni inam iti ubas a naimula iti igid ti waig, adu ti bulong ken bungana gapu iti kaadu ti danum.

¹¹Nalagda dagiti sanga ti ubas, ket nagbalin a setro ti ari. Timmayag ket nadanonna dagiti ulep. Nakita ti amin ti rangpaya ken tayagna.

¹²Ngem pinarut dagiti naranggas nga ima ket impurruakda iti daga. Nagango dagiti bungana, gapu iti angin nga aggapu iti daya. Nasip-ak dagiti sangana, nagango ket napuoranda.

¹³Ita, naimulan iti let-ang, iti namaga ken natikag a daga.

¹⁴Nauram ti puon ti ubas, kasta met dagiti sanga ken bungana. Awanen nalagda a sangana a mabalin a maaramid a setro ti ari.

¹⁴Maysa a dung-aw daytoy a namin-adu a naikankanta.