Ezekiel 22:1-31 RIPV1996 - Bible AI

¹Nagsao ti APO kaniak.

²Kinunana, “Anak ti tao, nakasaganaka kadi a mangukom iti siudad a napno iti mammapatay? Ipakaammom ngarud kenkuana dagiti amin a makarimon nga inar-aramidna.

³Ibagam iti siudad a siak nga Apo a DIOS kastoy ti kunak. Gapu ta adu unay ti pinapataymo kadagiti tattaom ken tinulawam ti bagim babaen ti panagdaydayawmo kadagiti didiosen, dumtengen ti kanibusanam.

⁴Nagbasolka gapu kadagita a panagpapatay, ket natulawanka kadagiti didiosen nga inaramidmo. Iti kasta, dumtengen ti aldawmo ket agpatinggakan! Pinagbalinka a pagang-angawan dagiti nasion ken lalaisen dagiti pagilian.

⁵Umsiendakanto dagiti ili, asideg man wenno adayo, gapu iti nalabes a kinadakesmo.

⁶Agtalek dagiti amin a pangulo ti Israel kadagiti bukodda a pigsa ket agpapatayda.

⁷Awanⓞ tao iti siudad nga agraem kadagiti nagannak kadakuada. Saurem dagiti ganggannaet ket gundawayam dagiti balo a babbai ken dagiti ulila.

⁸Awanⓟ panagraemmo kadagiti nasantoan a lugar ket dimo ngilinen ti Aldaw a Panaginana.

⁹Adda dagiti tattaom nga agsaksi iti ulbod tapno mapapatay ti padada a tao. Mangan ti dadduma kadagiti taraon a naidaton kadagiti didiosen. Adda dagiti kankanayon nga agaramid iti kinaderrep.

¹⁰Kaiddaenⓠ ti dadduma ti asawa dagiti ammada. Adda met mangpilit a mangkaidda kadagiti babbai a madama nga agkadawyan.

¹¹Adda dagiti makikamalala ken adda met dagiti mangsulisog kadagiti manugangda a babbai, adda pay dagiti mangtulaw kadagiti kakabsatda iti ama wenno kakabsatda iti ina.

¹²Matangdananⓡ ti dadduma kadakayo tapno agpapatayda. Paanakan ti dadduma ti pautangda kadagiti padada nga Israelita ket bumaknangda iti pananggundawayda kadakuada. Nalipatandak.” Daytoy ti kuna ti Apo a DIOS.

¹³“Ita, dusaenkayo gapu kadagiti panagtakaw ken panagpapataymo.

¹⁴Ipagarupmo aya nga addanto mabati a tured ken pigsam a mangingato iti imam no naipapaskon ti pungtotko kenka? Siak, ni Yahweh, ti nagsao ket tungpalekto ti saok.

¹⁵Warawaraekto dagiti tattaom ket iwaraskonto ida kadagiti nadumaduma a nasion ken pagilian. Iti kasta, gibusakto ti amin a dakes nga aramidmo.

¹⁶Ibabaindakanto dagiti dadduma a nasion, ngem maammoamto a siak ni Yahweh.”

¹⁷Kinuna ti APO kaniak,

¹⁸“Anak ti tao, awan serserbi kaniak dagiti Israelita. Kasda la naglalaok a gambang, lata, landok ken buli a natda kalpasan ti pannakagugor ti pirak iti urno.

¹⁹Isut' gapuna a siak nga Apo a DIOS kunak kadakuada a kasta ti arigda nga awan serserbina. Urnongekto amin ida idiay Jerusalem

²⁰a kas iti pirak, gambang, landok, buli ken lata a maikabil iti urno. Lunagento ida ti napalalo a pungtotko a kas iti pananglunag ti apuy iti metal.

²¹Wen, ummongekto ida idiay Jerusalem, sungrodakto ida ket lunagekto ida iti pungtotko.

²²Malunagdanto idiay Jerusalem a kas iti pannakalunag ti pirak iti urno. Iti kasta, maammoandanto a marikriknada ti pungtotko.”

²³Nagsao manen ti APO kaniak.

²⁴Kinunana, “Anak ti tao, ibagam kadagiti Israelita a saan a nasantoan ti dagada, isu a dusdusaek ida gapu iti pungtotko.

²⁵Arig dagiti papangulo[23] dagiti leon a mangngerngernger kadagiti animal a pinatayda. Patayenda dagiti tattao, alaenda amin a kuarta ken sanikua a masarakanda, ket adu a babbai ti mabalo gapu kadakuada.

²⁶Salungasingenⓢ dagiti papadi ti lintegko ket dida raemen ti nasantoan. Saanda a paglasinen ti nasantoan ken ti natulawan ken dida isuro no ania ti paggiddiatan ti nadalus ken saan a nadalus. Dida ngilinen ti Aldaw a Panaginana. Daytoy ti gapuna a didak raemen dagiti Israelita.

²⁷Kasla lobo dagiti ofisiales ti gobierno a mangrangrangkay kadagiti animal a pinapatayda. Agpapatayda tapno bumaknangda.

²⁸Kalkaluban dagiti profeta dagitoy a kinadakes, kas iti bakud a mapintaan iti puraw. Saan nga agpayso dagiti parmata ken padtoda. Ibagada nga agsaoda iti sao ti Apo a DIOS, ngem siak ni Yahweh, diak nagsao kadakuada.

²⁹Agsaur ken agtakaw dagiti nabaknang. Idadanesda dagiti napanglaw ket gundawayanda dagiti ganggannaet.

³⁰Nangbirokak iti makabael a mangbangon iti bakud ken mangtarimaan kadagiti narba a paset ti bakud ken mangikaluya iti daga inton dandani agdissuor ti pungtotko. Ngem awan ti nasarakak.

³¹Isut' gapuna nga idissuorko kadakuada ti pungtotko ket kas iti apuy, dadaelek ida a mamimpinsan gapu kadagiti aramidda.” Daytoy ti kuna ti Apo a DIOS.