Ezekiel 25:1-17 RIPV1996 - Bible AI

¹Kinunaⓤ kaniak ti APO,

²“Anak ti tao, babalawem ti pagilian ti Ammon.

³Ibagam kadagiti Ammonita a denggenda ti sao ti Apo a DIOS. Kunak: ‘Maragsakankayo a makakita a natulawan ti Templok, a nadadael ti daga ti Israel ken naitalaw dagiti tattao ti Juda.

⁴Agsipud ta naragsakankayo, ibaonkonto dagiti tribu iti akindaya a let-ang a mangsakup kadakayo. Agkampodanto iti dagayo ket agnaeddanto sadiay. Isudanto ti mangan iti bunga ken uminum iti gatas nga agpaay koma kadakayo.

⁵Pagbalinekto ti siudad ti Rabba a pagaponan dagiti kamelio, ken ti entero a pagilian ti Ammon a koral dagiti karnero. Iti kasta, maammoanyonto a siak ni Yahweh.’

⁶“Daytoy ti kuna ti Apo a DIOS, ‘Nagtitipatkayo ket naglagtolagtokayo iti rag-o, kas pananglaisyo iti daga ti Israel.

⁷Gapu iti inaramidyo, yawatkayto kadagiti nasion a mangtakaw ken mangsamsam kadagiti sanikuayo. Dadaelenkayto a mamimpinsan ket saankayton a maibilang a nasion. Awanton ti bukodyo a pagilian. Iti kasta, maammoanyonto a siak ni Yahweh.’”

⁸Kinunaⓥ ti Apo a DIOS, “Agsipud ta kinuna ti Moab[25] nga awan pakaigiddiatan ti Juda kadagiti dadduma a nasion,

⁹ipaluboskonto a maraut dagiti siudad a mangsalsalaknib iti beddeng ti Moab agraman dagiti kasayaatan a siudad—Bet Jesimot, Baal Meon ken Kiriataim.

¹⁰Palubosakto dagiti tribu iti akindaya a let-ang a mangparmek iti Moab agraman ti Ammon, ket iti kasta, saanen a maibilang a nasion ti Moab.[26]

¹¹Dusaekto ti Moab ket maammoandanto a siak ni Yahweh.”

¹²Kinunaⓦ ti Apo a DIOS, “Naranggas ti panangbales dagiti taga-Edom iti Juda, ket dayta a panagibales ti nangyeg iti agnanayon a basol iti Edom.

¹³Ita, ipakdaarko a dusaekto ti Edom ket patayek ti tunggal tao ken animal nga adda sadiay. Pagbalinekto a langalang manipud iti siudad ti Teman agingga iti siudad ti Dedan. Mapapatayto dagiti tattao iti gubat.

¹⁴Balsento dagiti tattaok nga Israelita ti Edom ket ipariknadanto kenkuana ti nakaro a pungtotko. Maammoanto ti Edom ti kaipapanan ti pagdissuoran ti panagibalesko.” Daytoy ti kuna ti Apo a DIOS.

¹⁵Kinunaⓧ ti Apo a DIOS, “Sirurungsot dagiti Filisteo a nangbales kadagiti kabusorda ket dinadaelda ida gapu iti nabayagen a gurada.

¹⁶Iti kasta, ipakdaarko a darupekto dagiti Filisteo, ket pukawek ida a mamimpinsan. Dadaelekto dagiti amin a natda nga agnanaed iti Tanap ti Filistia.

¹⁷Dusaekto ida iti nakaro ket idissuorko ti naan-anay a panagibalesko kadakuada. Mariknadanto ti pungtotko. Iti kasta, maammoandanto a siak ni Yahweh.”