Ezekiel 26:1-21 RIPV1996 - Bible AI

¹Itiⓨ umuna nga aldaw ti bulan, iti maika-11 a tawen ti pannakaipanawmi, nagsao ni Yahweh kaniak.

²Kinunana, “Anak ti tao, daytoy ti ipukpukkaw a siraragsak dagiti tattao iti siudad ti Tiro: ‘Narban ti Jerusalem! Awanen ti pannakabalinna a kas negosiante! Naglukaten kadatayo dagiti ruanganna ket awanen ti kasalisaltayo!’

³“Ita ngarud, siak nga Apo a DIOS, kastoy ti kunak: ‘Siudad ti Tiro, siak ti kabusormo. Yegkonto ti adu a nasion a mangraut kenka, ket umaydanto a kas kadagiti dalluyon ti baybay.

⁴Dadaelendanto dagiti bakud ti siudadmo ket rebbaendanto dagiti torrem. Kalpasanna, karusekto amin a daga a pagmulaan agingga nga agbalinkanto laengen a bilag a bato.

⁵Ibilagto sadiay dagiti mangngalap dagiti iketda, iti taaw a nagtakderam. Siak nga Apo a DIOS ti nagsao. Samsamento dagiti nasion ti sanikuam,

⁶ket patayendanto iti kampilan dagiti tattao nga agnaed kadagiti ili iti kadakkelan a dagam. Iti kasta, maammoamto a siak ni Yahweh.’”

⁷Kastoy ti kuna ti Apo a DIOS, “Yegkonto ni Nebucadnesar nga ari ti Babilonia—ti katan-okan kadagiti ari, a mangraut kenka. Aggapunto iti amianan a kuyogen ti dakkel nga armada, adu a kabalio ken luglugan a pakigubat, agraman soldado a nagsakay kadagiti kabalio.

⁸Mapapatayto iti gubat dagiti agnaed kadagiti ili iti kadakkelan a paset ti pagilian. Agkalinto dagiti kabusormo kadagiti trensera, ket mangbangondanto kadagiti torre ken napuskol a bakud a pangraut kenka.

⁹Rebbaendanto dagiti bakudmo babaen kadagiti maso, ket rakrakendanto dagiti torrem kadagiti barreta.

¹⁰Gaburannakanto ti umatipukpok a tapok dagiti kabalio. Magunggonto dagiti bakudmo iti dalagudog dagiti kabalio, dagiti kariton ken lugan a pakigubat bayat ti ilalasatda kadagiti ruangan ti nadadael a siudad.

¹¹Dakiwasento dagiti nagkabalio dagiti kalsadam, ket papatayenda dagiti tattaom iti kampilan. Matumbanto dagiti natibker nga adigim.

¹²Samsamendanto dagiti kinabaknang ken tagilakom. Rebbaendanto dagiti bakudmo ket rakrakendanto dagiti agkakapintas a balaymo. Alaendanto dagiti bato, tarikayo ken amin a ladriliom ket itappuakda iti baybay.

¹³Gibusaktoⓩ dagiti amin a kantam, ket pagulimekekto ti tokar dagiti arpam.

¹⁴Pagbalinenkanto a kabatbatoan a pagbilagan dagiti mangngalap kadagiti iketda. Pulos a saanton a mabangon ti siudad.” Daytoy ti kuna ti Apo a DIOS.

¹⁵Kastoy ti kuna ti Apo a DIOS iti siudad ti Tiro: “Agtigergerto dagiti agnaed iti igid ti baybay inton mangngegda dagiti ariwawa ti pannakaparmekmo, dagiti ikkis dagiti mapappapatay iti sidongmo.

¹⁶Bumabantoⓐ kadagiti tronoda dagiti amin nga ari dagiti nasion nga agbibiahe iti taaw. Ikkatendanto dagiti kagayda ken dagiti nabordaan a kawesda, ket agpigpigergerdanto nga agtugaw iti daga. Makigtotdanto gapu iti mapasamak kenka ket didanto maisardeng ti panagtigergerda.

¹⁷Kastoyto ti idung-awda kenka:

¹⁷‘Nadadaelen ti agdindinamag a siudad! Limned[27] dagiti barkona iti baybay. Dagiti tattao iti daytoy a siudad ti nangituray idi kadagiti taaw, ket binutbutengda amin nga agnaed iti igid ti baybay.

¹⁸Agkintayeg dagiti amin a puro iti aldaw a pannakarba ti siudad. Makigtot dagiti tattaoda iti kasta a pannakadadaelna.’”

¹⁹Kuna ti Apo a DIOS, “Pagbalinenka a langalang, kas kadagiti narpuog a siudad nga awan nagyanna. Layusenkanto iti danum nga aggapu iti adalem a taaw.

²⁰Itinnagkanto iti lubong dagiti natay tapno tumiponka kadagiti tattao a nagbiag idi un-unana. Pagnaedenkanto iti dayta lubong nga akimbaba iti agnanayon a pannakadadael, a kaduam dagiti natay. Sadiaymonto ket pulos a dikanton makasubli iti lugarmo iti daga dagiti sibibiag.

²¹Pagbalinenkantoⓑ a nakabutbuteng a pagulidanan ket daytoyton ti gibusmo. Birokendakanto dagiti tattao, ngem saandakanton a masarakan.” Daytoy ti kuna ti Apo a DIOS.