Ezekiel 27:1-36 RIPV1996 - Bible AI

¹Kinuna ti APO kaniak,

²“Anak ti tao, dung-awam ti Tiro,

³dayta siudad iti igid ti baybay a makinegnegosio kadagiti pagpagilian iti igid ti baybay. Ibagam kenkuana a daytoy ti sao ti Apo a DIOS:

³‘Sika, Tiro, impalangguadmo ti awan kurangna a pintasmo.

⁴Ti baybay ti taengmo; inaramiddaka a kas iti napintas a barko.

⁵Saleng a naggapu iti Bantay Senir ti inkapetda a tarikayom. Sedro a naggapu idiay Libano ti impatakderda a palom.

⁶Lugo a naggapu idiay Basan ti inaramidda a gaudmo. Alamo a naggapu idiay Cyprus ti inaramidda a kamarotem, a naarkosan iti marfil.

⁷Nabordaan a linen dagiti layagmo; a naggapu idiay Egipto, nalakada a mailasin uray iti adayo. Agkakangina a lupot ti linongmo; purpura a naggapu idiay Cyprus.

⁸Taga-siudad ti Sidon ken Arvad dagiti para-gaudmo. Dagiti nalaing a tattaom ti nagserbi a marinerom.

⁹Nasanay a lallaki a taga-Biblos dagiti karpintero ti barko. Dagiti marinero kadagiti amin a barko ti umay aggatang kadagiti lakom.’

¹⁰“Nagserbi iti armadam dagiti soldado a naggapu iti Persia, Lud ken Put. Imbitinda dagiti kalasag ken helmetda kadagiti kampom. Isuda ti nanggun-od iti dayagmo.

¹¹Dagiti soldado a taga-Arvad ti nangguardia kadagiti bakudmo. Dagiti taga-Gamad ti nangbantay kadagiti torrem. Imbitinda dagiti kalasagda kadagiti bakudmo. Isuda ti nangpapintas kenka.

¹²“Nakinegosioka iti Tarsis, ket nagalaka iti minasna a pirak, landok, lata ken buli a kas sukat ti adu a tagilakom.

¹³Nakinegosioka idiay Grecia, Tubal ken Mesec. Impanmo dagiti tagilakom, ket tagabu ken alikamen a bronse ti inawatmo a sukatda.

¹⁴Insukatmo dagiti tagilakom kadagiti kabalio ken mulo ti Bet Togarma.

¹⁵Nakinegosio kenka dagiti tattao ti Rodes.[28] Inikkandaka iti marfil ken ballatinaw dagiti tattao kadagiti ili iti igid ti baybay kas bayadda kadagiti tagilakom.

¹⁶Naggatang dagiti taga-Aram kadagiti nadumaduma ken adu a tagilakom. Esmeralda, purpura, nabordaan a lupot, nafino a linen, koral ken rubi ti pinagbayadda kadagiti tagilakom.

¹⁷Naggatang ti Juda ken ti Israel kenka. Trigo, diro, lana ti olibo ken bangbanglo ti pinagbayadda kadagiti tagilakom.

¹⁸Naggatang met kenka ti Damasco ket arak ti Helbon ken de lana ti Sahar ti imbayadda. Insukatda dagiti napanday a landok ken dagiti bangbanglo kadagiti tagilakom.

²⁰Lupot a pagap-ap iti pagsakayan ti insukat dagiti taga-Dedan kadagiti tagilakom.

²¹Urbon ti karnero, karnero ken kalding ti insukat dagiti taga-Arabia ken dagiti agtuturay iti daga ti Kedar kadagiti tagilakom.

²²Nakinegosio kenka dagiti agtagtagilako a taga-Seba ken Raama. Kasayaatan a bangbanglo, alahas ken balitok ti insukatda kadagiti tagilakom.

²³Nakinegosio kenka dagiti siudad ti Haran, Canne, Eden, dagiti agtagtagilako a taga-Seba, dagiti siudad ti Assur ken Kilmad.

²⁴Inlakoda kenka dagiti agkakangina a lupot, kagay a purpura, nabordaan a lupot, alfombra a nadumaduma ti kolorna ken nalagda a tali.

²⁵Dagitiⓒ kadakkelan a bapor ti nangkarga kadagiti tagilakom.

²⁵“Kaska la barko iti taaw a napno iti nadagsen a karga.

²⁶Idi impandaka dagiti para gaudmo iti baybay, immay ti angin-daya ket narbaka idi addaka iti tengnga't taaw.

²⁷Amin a tagilakom, amin a marinero a kaduam, amin a karpintero ken dagiti paglaklakoem, amin a soldado nga adda iti barko, napukawda amin iti taaw idi limned ti barkom.

²⁸Nagallangogan iti igid ti baybay ikkis dagiti malmalmes a marinero.

²⁹“Nabaybay-anen dagiti amin a barko, ket nakatakdangen amin a marinero.

³⁰Dung-awandaka amin iti nasaem; purruakanda ti uloda iti tapok; agtulidtulidda iti dapu.

³¹Kuskosanda ti uloda gapu kenka, ket agpanesda. Madudog ti pusoda, bayat ti panagsangitda.

³²Idi agladingitda, idung-awda daytoy kenka: ‘Adda kadi pumada iti Tiro? Adda kadi nadadael a kas kenkuana a naulimeken iti lansad ti taaw?

³³Intedmo ti kasapulan dagiti nasion idi naipan dagiti tagilakom iti ballasiw-taaw. Bimmaknang dagiti ari ditoy daga gapu iti kaadu ti tagilakom.

³⁴Ita, narbakan iti taaw; limnedkan agraman dagiti tagilakom ken amin a tattaom.’

³⁵“Nakigtot dagiti amin nga agnaed iti igid ti baybay idi maammoanda ti napasamak kenka. Mabuteng uray pay dagiti arida, ket makita ti buteng iti rupada.

³⁶Napukawkan, wen, napukawkan iti agnanayon, ket mabuteng dagiti amin nga agtagtagilako iti sangalubongan. Maamakda amangan no lak-amenda met ti napasamak kenka.”