Ezekiel 35:1-15 RIPV1996 - Bible AI

¹Nagsaoⓜ ti APO kaniak.

²Kinunana, “Anak ti tao, babalawem ti pagilian ti Edom.

³Ibagam kadagiti tattao a siak nga Apo a DIOS, kastoy ti kunak:

³‘Siak ti kabusoryo, bambantay ti Edom, Pagbalinenkayo a langalang a daga.

⁴Dadaelek dagiti siudadyo Ken paglangalangek ti dagayo. Ket maammoanyonto a siak ti APO.’

⁵“Sika ti agnanayon a kabusor ti Israel. Pinapapataymo dagiti Israelita iti tiempo ti pannakadidigra ti pagilian, iti maudi a pannakadusana gapu kadagiti basolna.

⁶Ngarud, isapatak iti naganko nga Yahweh, ti sibibiag a Dios, nga awan duadua ti ipapataymo. Nakabasolka iti[35] pammapatay ket surotennakanto ti panagpapatay.

⁷Paglangalangekto ti katurturodan ti Edom ket papatayekto amin a lumasat sadiay.

⁸Gabsuonakto dagiti bantay iti bangkay. Masaknapanto dagiti turod ken tanap kadagiti napapatay iti gubat.

⁹Paglangalangenkanto iti agnanayon ket awanton ti agnaed kadagiti siudadmo. Iti kasta, maammoamto a siak ni Yahweh.

¹⁰“Kinunam a kukuam dagiti dua a nasion, ti Juda ken Israel, kasta met dagiti daga a masakupanda ket tagikuaem ida idinto a siak, ni Yahweh, ti Diosda.

¹¹Ngarud, isapatak iti naganko nga Yahweh, ti sibibiag a Dios a dusaenkanto gapu iti pungtot, apal ken guram kadagiti tattaok. Maammoandanto a dusdusaenka gapu iti inaramidmo kadakuada.

¹²Iti kasta, maammoamto a siak, ti APO nangngegko a kinunam a kas pangumsi a naglangalangen dagiti bantay iti Israel, ket maaramidmo ti kaykayatmo kadakuada.

¹³Nangngegko dagiti nagubsang ken natangsit a panagsaom kaniak.”

¹⁴Kuna ti Apo a DIOS, “Paglangalangenkanto ket agragsakto ti entero a daga iti pannakadadaelmo,

¹⁵a kas iti panagragsakmo idi nadadael ti Israel a kukuak. Aglangalangto dagiti bantay ti Seir, wen, ti entero a daga ti Edom, ket maammoanto dagiti amin a tattao a siak ni Yahweh.”