Ezekiel 37:1-28 RIPV1996 - Bible AI

¹Nariknak ti pannakabalin ti APO, ket impannak ti espirituna iti maysa a tanap a nasaknapan kadagiti tulang.

²Insursornak iti tanap ket naimatangak ti nakaad-adu a nagango a tulang.

³Kinunana kaniak, “Anak ti tao, agbiag kadi manen dagitoy a tulang?”

³“Apo a DIOS, sika laeng ti makaammo iti dayta,” insungbatko.

⁴Kinunana, “Agipadtoka kadagitoy a tulang. Ibagam kadagitoy nagango a tulang a denggenda ti sao ni Yahweh.

⁵Ibagam kadakuada a siak nga Apo a DIOS, kastoy ti kunak, ‘Ikkankayo iti anges ket agbiagkayo manen.

⁶Ikkankayo iti pennet ken piskel ket bungonenkayo iti kudil. Ikkankayo iti anges ket pagbiagenkayo. Iti kasta, maammoanyo a siak ni Yahweh.’”

⁷Isut' gapuna a nagipadtoak kas naibilin kaniak. Bayat ti panagsaok, nakangngegak iti karatakat, ket nagsusuop dagiti tulang.

⁸Nakitak a timmaud dagiti pennet ken piskel ket nabungonda iti kudil, ngem awan anges dagiti bagida.

⁹Kinuna ti Dios kaniak, “Anak ti tao, agipadtoka iti angin. Ibagam iti angin a siak nga Apo a DIOS ibilinko kenkuana nga umay manipud iti nadumaduma a suli ket angsanna dagitoy a bangkay tapno agbiagda manen.”

¹⁰Nagipadtoakⓞ ngarud a kas naibilin kaniak. Naikkan dagiti bangkay iti anges, nagbiagda ket timmakderda. Maysa nga armada ti kaaduda.

¹¹Kinuna ti Dios kaniak, “Anak ti tao, mayarig dagiti Israelita kadagitoy a tulang. Kunada a namagaanda, awan ti namnamada ket awan ti naraniag a masakbayanda.

¹²Agipadtoka ngarud kadagiti tattaok nga Israelita; ibagam kadakuada a siak nga Apo a DIOS, luktakto dagiti nakaitanemanda. Iruarkonto ida ket isublikto ida iti daga ti Israel.

¹³Inton luktak dagiti tanem dagiti tattaok ket iruarko ida, maammoandanto a siak ni Yahweh.

¹⁴Angsakto ida ket agbiagdanto. Palubosakto ida nga agnaed iti bukodda a daga. Iti kasta, maammoandanto a siak ni Yahweh. Inkarik nga aramidek daytoy ket tungpalek. Siak, ni Yahweh, ti nangibaga iti daytoy.”

¹⁵Nagsao manen ti APO kaniak.

¹⁶Kinunana, “Anak ti tao, mangalaka iti kayo samo isurat: ‘Ti pagarian ti Juda.’ Mangalaka pay iti maysa a kayo samo suratan iti kastoy: ‘Ti pagarian ti Israel.’

¹⁷Pagtiponem nga iggaman ida tapno agparangda a kasla maymaysa a kayo.

¹⁸Saludsodento kenka dagiti kailiam ti kaipapanan daytoy.

¹⁹Ibagam kadakuada a siak nga Apo a DIOS, alaekto ti kayo a mangibagi iti Israel, ket itiponkonto iti kayo a mangibagi iti Juda. Pagmaymaysaekto ida nga iggaman.

²⁰“Iggamam dagiti dua a kayo, ket ipakitam ida kadagiti tattao.

²¹Kalpasanna, ibagam kadakuada, a siak nga Apo a DIOS, iruarkonto dagiti tattaok kadagiti nasion a napananda; ummongekto ida ket isublik ida iti bukodda a daga.

²²Pagmaymaysaekto ida a kas maysa a nasion iti daga, kadagiti bantay ti Israel. Maymaysanton ti ari a mangituray kadakuada ta didanton mabingay iti dua a pagarian.

²³Didanton tulawan dagiti bagida babaen kadagiti makarimon a didiosen wenno mulitan dagiti bagida iti basol. Ispalekto ida iti amin a kita ti panagbasol ken panangliputda kaniak. Dalusakto ida; isudanto dagiti tattaok ket siakto ti Diosda.

²⁴Nintoⓟ adipenko a David ti arida. Agmaymaysadanto iti babaen ti maysa a mangituray ket tungpalendanto a sipapasnek dagiti lintegko.

²⁵Agnaeddanto iti daga nga intedko ken ni adipenko a Jacob, iti daga a nagnaedan dagiti kapuonanda. Agnaeddanto sadiay iti agnanayon, kasta met dagiti annakda ken dagiti kaputotanda. Ninto David nga adipenko ti mangituray kadakuada iti agnanayon.

²⁶Mangaramidak iti tulag a mangted iti talged ti panagbiagda iti agnanayon.[37] Paaduekto ti bilang dagiti tattao ket bangonekto ti templok iti dagada a pagyananna iti agnanayon.

²⁷Sadiay,ⓠ makipagnaedakto kadakuada. Siakto ti Diosda ket isudanto dagiti tattaok.

²⁸Inton bangonek ti templok sadiay tapno addaak kadakuada iti agnanayon, maammoanto dagiti nasion, a siak, ni Yahweh, ti namagbalin kadagiti Israelita a kukuak.”