Ezekiel 44:1-31 RIPV1996 - Bible AI

¹Impannak ti lalaki iti akinruar a ruangan iti akindaya a bangir ti sakup ti Templo. Siririkep ti ruangan.

²Kinuna ni Yahweh kaniak, “Agtalinaed a siririkep daytoy a ruangan ket pulos a di maluktan. Awan ti makastrek iti daytoy a ruangan ta siak, ni Yahweh a Dios ti Israel, simrekak iti dayta a ruangan. Masapul nga agtalinaed a siririkep.

³Nupay kasta, mabalin a mapan sadiay ti prinsipe nga agturay tapno kanenna ti nasantoan a taraon iti imatangko. Sumrek iti ruangan nga agturong iti masungod a kuarto iti akin-uneg a pungto. Isunto met laeng ti ruaranna.”

⁴Impagnanak ti lalaki iti akin-amianan a ruangan a mapan iti sangoanan ti Templo. Naimatangak a napno ti Templo iti makapurar a lawag ti APO. Nagpaklebak.

⁵Kinuna ti APO kaniak, “Anak ti tao, tandaanam a naimbag ti amin a makitam ken mangngegmo. Ibagak kenka dagiti annuroten ken alagaden iti Templo. Tandaanam a naimbag no siasino dagiti mapalubosan a sumrek ken rummuar iti Templo.

⁶“Ibagam kadagita nasukir a tattao ti Israel a siak, ti Apo a DIOS, pasardengekon dagiti nakababain nga ar-aramidenda.

⁷Tinulawanda ti Templo babaen iti panangipalubosda a sumrek dagiti ganggannaet a di nakugit a tattao a saan nga agtulnog kaniak—iti Templo bayat ti pannakaidatag ti taba ken dara dagiti sakrifisio a maidaton kaniak. Ngarud, sinalungasing dagiti tattaok ti nagtutulaganmi gapu kadagiti amin a nakababain nga aramidda.

⁸Saan nga isuda ti nangannong kadagiti nasagradoan a seremonia iti Templok, ngem impaannongda ketdi kadagiti ganggannaet.

⁹“Manipud ita, siak, ti Apo a DIOS ipakaammok a saanen a mapalubosan a sumrek iti Templok ti saan a nakugit a ganggannaet, uray pay ti ganggannaet a makipagtataeng kadagiti Israelita.”

¹⁰Kinuna ti APO kaniak, “Dusaek dagiti Levita agraman dagiti dadduma nga Israelita a nangtallikud kaniak ken nagdaydayaw kadagiti didiosen.

¹¹Mabalin nga agserbida kaniak iti Templo babaen iti panangaywanda kadagiti ruangan ken ti panangannongda iti trabaho iti Templo. Mabalin a partienda dagiti animal nga idatag dagiti tattao a kas daton a mapuoran ken sakrifisio ken agannongda nga agserbi kadagiti tattao.

¹²Ngem gapu ta inannongda ti seremonia ti panagdaydayaw kadagiti didiosen kadagiti Israelita ket daytoy ti nangiturong kadagiti tattao nga agbasol, ngarud, siak, ti Apo a DIOS, isapatak a masapul a madusada.

¹³Saanda nga agserbi kaniak a kas padi, wenno umasideg kadagiti aniaman nga ibilangko a nasantoan wenno sumrek iti kasantoan a lugar. Daytoy ti dusada kadagiti nakababain nga inaramidda.

¹⁴Ipaannongko kadakuada ti amin a trabaho ti adipen iti Templo.”

¹⁵Kinuna ti Apo a DIOS, “Nupay kasta, dagiti Levita a padi a kaputotan ni Zadok, intultuloyda ti agserbi kaniak a sipupudno iti Templo idi tinallikudandak dagiti dadduma nga Israelita. Ngarud, isuda laeng ti mabalin a mangidatag iti sangoanak kadagiti taba ken dara ti daton.

¹⁶Isuda laeng ti makastrek iti Templok, agserbi iti altarko ken mangidalan iti panagdaydayaw iti Templo.

¹⁷Noⓩ sumrekda iti pagserkan nga agturong iti akin-uneg a paraangan iti Templo, agkawesda iti linen. Masapul a dida agkawes iti aniaman a naaramid iti de lana no agserserbida iti akin-uneg a paraangan wenno iti Templo.

¹⁸Tapno dida agling-et, agarruatda iti linen a turban ken linen a pantalon ngem dida agbarikes.

¹⁹Sakbayⓐ a mapanda iti akinruar a paraangan nga ayan dagiti tattao, masapul nga uksobenda dagiti pagan-anay nga inaramatda a nagserbi iti Templo. Ibatida dagitoy kadagiti nasagradoan a kuarto ket sabali a pagan-anay ti ikawesda tapno saan a madangran dagiti tattao.[49]

²⁰“Saanⓑ nga agpakalbo dagiti papadi ngem dida met unay paatiddogen ti buokda. Kalalaingan laeng ti pukisda.

²¹Saanⓒ nga uminum ti padi iti arak sakbay a sumrek iti akin-uneg a paraangan.

²²Awanⓓ padi a mapalubosan a mangasawa iti naisina a babai. Dagiti laeng babbalasang nga Israelita wenno ti biuda ti maysa a padi ti mabalinda nga asawaen.

²³“Masapulⓔ nga isuro dagiti papadi dagiti tattaok ti paggiddiatan ti nasantoan ken ti saan, ti paggiddiatan ti nadalus iti imatang ti linteg ken ti saan.

²⁴No adda rumsua a riri a mainaig iti linteg, risuten dagiti papadi ti riri kas sagudayen dagiti lintegko. Masapul a ngilinenda dagiti nasagradoan a fiesta kas mayannurot kadagiti annuroten ken paglintegak. Ngilinenda met dagiti Aldaw a Panaginana.

²⁵“Saanⓕ a rugitan ti padi ti bagina iti imatang ti linteg babaen iti panangsagidna iti bangkay malaksid no bangkay dagiti nagannak kenkuana, dagiti annakna, ti kabsatna a lalaki wenno kabsatna a babai nga awan asawana.

²⁶Kalpasan ti pannakadalusna manen, masapul nga aguray iti pito nga aldaw

²⁷sa sumrek iti akin-uneg a paraangan ti Templo ket mangidatag iti daton nga agpaay iti pannakadalusna tapno makapagserbi manen iti Templo.” Daytoy ti sao ti Apo a DIOS.

²⁸“Awanⓖ ti tawiden dagiti papadi iti Israel. Siak ti tawidda. Saanda a mapalubosan a maaddaan iti sanikua iti Israel. Siak ti sanikuada.

²⁹Dagitiⓗ daton a makan, dagiti daton a pakapakawanan ti basol ken dagiti daton gapu iti basol ti agpaay a taraon dagiti papadi. Awatenda amin nga ilasin dagiti Israelita a para kaniak.

³⁰Kukua dagiti papadi ti kasayaatan kadagiti amin nga umuna nga apit ken amin a maidatag kaniak. Tunggal agluto dagiti tattao iti tinapay, masapul nga itedda kadagiti papadi ti umuna a maluto a kas daton ket bendisionak dagiti pagtaenganda.

³¹Maiparitⓘ nga agsida dagiti papadi kadagiti tumatayab wenno animal a natay wenno pinatay ti sabali nga animal.”