Ezra 8:1-36 RIPV1996 - Bible AI

¹Daytoy ti listaan dagiti ulo dagiti familia a naipan a kas balud idiay Babilonia. Kimmuyogda ken ni Ezra a nagsubli idiay Jerusalem idi ni Artaxerxes ti emperador:

²ni Gersom iti familia ni Finees; ni Daniel iti familia ni Itamar; ni Hattus nga anak ni Sekanias iti familia ni David; ni Zacarias iti familia ni Paros, agraman ti 150 a lallaki a kabagianna (adda listaan ti familia a nagtaudanda); ni Elieoenai nga anak ni Zerahias iti familia ni Pahat Moab, agraman ti 200 a lallaki; ni Sekanias nga anak ni Jahaziel iti familia ni Zattu, agraman ti 300 a lallaki; ni Ebed nga anak ni Jonatan iti familia ni Adin, agraman ti limapulo a lallaki; ni Jesaias nga anak ni Atalias iti familia ni Elam, agraman ti 70 a lallaki; ni Zebadias nga anak ni Micael iti familia ni Sefatias, agraman ti 80 a lallaki; ni Obadias nga anak ni Jehiel iti familia ni Joab, agraman ti 218 a lallaki; ni Selomit nga anak ni Josifias iti familia ni Bani, agraman ti 160 a lallaki; ni Zacarias nga anak ni Bebai iti familia ni Bebai, agraman ti 28 a lallaki; ni Johanan nga anak ni Jakkatan iti familia ni Azgad, agraman ti 110 a lallaki; da Elifelet, Jeuel ken Semaias iti familia ni Adonikam, agraman ti 60 a lallaki (naud-udida a nagsubli); da Utai ken Zakkur iti familia ni Bigvai, agraman ti 70 a lallaki.

¹⁵Inummongko ti entero a bunggoy iti igid ti karayan nga agturong iti ili ti Ahava. Nagkampokami sadiay iti tallo nga aldaw. Nasarakak nga adda papadi iti grupoda ngem awan ti Levita.

¹⁶Pinaayabak ti siam kadagiti papangulo: da Eliezer, Ariel, Semaias, Elnatan, Jarib, Elnatan, Natan, Zacarias ken Mesullam ken dua a mamaestro: da Joiarib ken Elnatan.

¹⁷Imbaonko ida ken ni Iddo a pangulo ti gimong idiay Casifia tapno kiddawenda kenkuana ken kadagiti kaduana nga agserserbi iti Templo a mangibaonda iti agserbi iti Templo ti Dios.

¹⁸Babaen iti kaasi ti Dios, imbaonda ni Serebias, tao a makabael, maysa a Levita a nagtaud iti familia ni Mali. Kimmuyog kenkuana ti 18 kadagiti annak ken kakabsatna.

¹⁹Imbaonda pay da Hasabias ken Jesaias iti familia ni Merari agraman ti 20 kadagiti kakabagianda.

²⁰Malaksid kadagitoy, adda pay 220 nga agtartrabaho iti Templo, isuda a dinutokan idi ni David ken dagiti ofisialesna ti familiada a tumulong kadagiti Levita. Nailista amin ti naganda.

²¹Iti igid ti Karayan Ahava, imbilinko nga agayunarkami amin ket agpakumbabakam iti imatang ti Diosmi ken dawatenmi nga idalannakami iti panagdaliasatmi ket salaknibannakami ken dagiti annakmi, agraman dagiti sanikuami.

²²Nakababain koma no dimmawatak iti ari iti maysa a bunggoy dagiti mannakigubat a nakakabalio a mangsalaknib kadakami kadagiti kabusormi, agsipud ta imbagak kenkuana a bendisionan ti Diosmi dagiti amin nga agtalek kenkuana, ket guraen ken dusaenna ti siasinoman a mangtallikud kenkuana.

²³Nagayunar ken nagkararagkami ngarud iti Dios tapno salaknibannakami ket impangagna dagiti kararagmi.

²⁴Kadagiti kangrunaan a papadi, pinilik da Serabias, Hasabias ken sangapulo pay a papadi.

²⁵Tinimbangko dagiti pirak, balitok ken dagiti alikamen nga inted idi ti ari, dagiti mammagbaga kenkuana, dagiti ofisialesna ken dagiti Israelita tapno mausar iti Templo ket intedko ida kadagiti papadi.

²⁶Dagitoy ti intedko kadakuada: 100 nga alikamen a pirak — 150 a libra balitok — 7,500 a libra 20 a malukong a balitok — 270 nga onsa 2 a malukong a bronse a kas iti pateg dagiti balitok a malukong.

²⁶pirak — 25 a tonelada

²⁸Kinunak kadagiti pinilik: “Nasagradoankay iti APO a Dios dagidi kapuonanyo kasta met dagiti alikamen a pirak ken balitok a naited kenkuana a kas sagut a nagtaud iti nakem dagiti tattao.

²⁹Aywananyo ida a naimbag agingga a makadanonkay iti Templo. Timbangenyo ida kadagiti kuarto dagiti papadi, sa itedyo kadagiti pangulo dagiti papadi ken kadagiti pangulo dagiti Levita ken kadagiti pangulo dagiti Israelita iti Jerusalem.”

³⁰Inaywanan ngarud dagiti papadi ken Levita dagiti pirak, balitok, ken dagiti alikamen a naipan iti Templo iti Jerusalem.

³¹Iti maika-12 nga aldaw iti umuna a bulan, pimmanawkami iti Karayan Ahava ket nagturongkami idiay Jerusalem. Kimmuyog ti Diosmi ket inkanawanakam iti panangdarup dagiti kabusor ken iti pannakasanebmi iti dalan.

³²Idi sumangpetkam idiay Jerusalem, naginanakami iti tallo nga aldaw.

³³Iti maikapat nga aldaw, napankam iti Templo. Tinimbangmi ti pirak, ti balitok ken dagiti alikamen sami inyawat ida ken ni Meremot, ti padi nga anak ni Urias. Kaduana ni Eleazar nga anak ni Finees ken dua a Levita, ni Josabad nga anak ni Jesua ken ni Noadias nga anak ni Binnui.

³⁴Natimbang ken nabilang amin a naited, ken nailistada a saggaysa.

³⁵Nagidatag dagiti amin a nagsubli a napagtalaw a kas balud kadagiti daton a mapuoran iti Dios ti Israel. Para iti amin nga Israel, 12 a toro a baka ti indatagda ken 96 a kalakian a karnero, 77 nga urbon ti karnero ken 12 a kalding ti naidaton para iti pannakadalusda iti basol. Napuoran amin dagitoy nga animal a kas daton iti APO.

³⁶Innalada pay ti dokumento nga inted ti emperador kadakuada ket intedda kadagiti gobernador ken ofisiales ti Laud-ti-Eufrates. Ket inted met dagitoy ti tulongda kadagiti tattao ken iti panagdaydayaw iti Templo.