Genesis 15:1-21 RIPV1996 - Bible AI

¹Kalpasan daytoy, nagparmata ni Abram ket nangngegna ni Yahweh a makisasao kenkuana: “Dika agbuteng, Abram. Salaknibanka iti amin a peggad ket ikkanka iti naindaklan a gunggona.”

²Ngem kinuna ni Abram, “O Apo DIOS, ania ti serbi kaniak ti gunggona nga itedmo idinto ta awan anakko? Ni laeng Eleazar a taga-Damasco ti agtawid kadagiti sanikuak.

³Dinak pinaraburan iti anak ket maysa kadagiti tagabuk ti agtawid iti sanikuak.”

⁴Kalpasanna, nangngegna manen ni Yahweh a makisasao kenkuana, “Saan a ni Eleazar a tagabu ti agtawid iti sanikuam no di ket ti bukodmo nga anak.”

⁵Inruarⓝ ni Yahweh ni Abram ket kinunana, “Tumangadka ket padasem a bilangen dagiti bituen. Kastanto ti kaadu dagiti kaputotam.”

⁶Nagtalekⓞ ni Abram ken ni Yahweh ket gapu iti daytoy, naragsakan kenkuana ni Yahweh ket inawatna a kas nalinteg ni Abram.

⁷Kalpasanna, kinuna ni Yahweh kenkuana, “Siak ni Yahweh a nangiruar kenka iti Ur idiay Caldea tapno ipatagikuak kenka daytoy a daga.”

⁸Ngem kinuna ni Abram, “O Apo DIOS, kasano a maammoak a kukuak daytoy a daga?”

⁹Insungbatna, “Yegannak iti baka, kalding, kalakian a karnero nga agtawen iti tallo ti tunggal maysa, ken saggaysa a kalapati ken pagaw.”

¹⁰Indatag ni Abram dagiti animal iti Dios. Pinatayna ida sana ginudua dagiti bangkay. Inintarna ida iti dua a linia nga agbinnatog dagiti agkapisi ngem dina ginudua ti kalapati ken ti pagaw.

¹¹Nagdisso dagiti buitre kadagiti bangkay dagiti animal ngem binugawna ida.

¹²Idiⓟ lumnek ti init, immapay ken ni Abram ti nargaan a turog. Nariknana ti panagbuteng ken panagamak gapu iti nakaro a kinasipnget.

¹³Kinunaⓠ ni Yahweh, “Ganggannaetto dagiti kaputotam iti sabali a daga. Agbalindanto a tagabu sadiay ket 400 a tawen a maparparigatdanto.

¹⁴Ngemⓡ dusaekto ti nasion a mangtagabu kadakuada ket inton pumanawda iti dayta a daga, adunto a kinabaknang ti alaenda.

¹⁵Atiddogto ti panagbiagmo, mataykanto a sitatalna ket maitanemkanto.

¹⁶Mapalabasto ti uppat a kaputotan santo agsubli ditoy dagiti kaputotam agsipud ta sakonto la pagtalawen dagiti Amorreo inton nakaro ti kinadakesda ket masapul a madusada.”

¹⁷Idi nakalneken ti init ket nagsaknapen ti sipnget, pagammoan adda nagparang nga umas-asuk a banga ken sumsumged nga aluten a limmasat iti nagbaetan dagiti nagudua-gudua nga animal.

¹⁸Itiⓢ dayta met la a kanito, nakitulag ni Yahweh ken ni Abram. Kinunana, “Ikarik nga itedko iti kaputotam amin daytoy a daga manipud iti beddeng ti Egipto agingga iti Karayan Eufrates,

¹⁹agraman ti daga dagiti Kineo, dagiti Kenezeo, dagiti Kadmoneo,

²⁰dagiti Heteo, dagiti Perezeo, dagiti Refaim,

²¹dagiti Amorreo, dagiti Cananeo, dagiti Gergeseo ken dagiti Jebuseo.”