Genesis 27:1-46 RIPV1996 - Bible AI

¹Lakayen ni Isaac ket dandani saanen a makakita. Pinaayabanna ni Esau nga inauna nga anakna ket kinunana, “Anak.” “Apay, tatang?” insungbat ni Esau.

²Kinuna ni Isaac, “Lakayakon ket nalabit matayakon iti mabiit.

³Alaem ta bai ken panam, inka iti bakir ket yanupannak.

⁴Lutoem 'tay pagay-ayatko a potahe samonto yeg kaniak. Kalpasan ti pannanganko, bendisionankanto sakbay a matayak.”

⁵Agdengdengngeg ni Rebecca bayat ti pannakisao ni Isaac ken ni Esau. Idi nakapanawen ni Esau tapno mapan aganup,

⁶kinuna ni Rebecca ken ni Jacob, “Nangngegko ti panangbilin ni tatangmo ken ni Esau,

⁷‘Yegannak iti animal ket ilutoannak iti sidak. Kalpasan ti pannanganko, bendisionankanto iti imatang ti APO sakbay a matayak.’

⁸Ita, anakko, denggennak ket kastoy ti aramidem.

⁹Inka mangala iti arban iti dua a nalukmeg nga urbon ti kalding ket lutoek ti potahe a kaay-ayo unay ni tatangmo.

¹⁰Ipanmonto kenkuana tapno sidaenna ket bendisionannaka sakbay a matay.”

¹¹Ngem kinuna ni Jacob iti inana, “Ammom a barbonan ni Esau idinto a nalinis ti kudilko.

¹²No arikapennak ni tatang, maduktalanna nga al-allilawek. Ilunodnakto imbes a bendisionannak.”

¹³Insungbat ni inana, “Bay-am a siak ti mailunod, anakko. Aramidem laeng ti ibagak. Inka alaen dagiti kalding.”

¹⁴Napan innala ni Jacob dagiti kalding sana impan ken ni nanangna. Linuto ni Rebecca ti potahe a kaay-ayo ni Isaac.

¹⁵Kalpasanna, innalana dagiti kasayaatan a kawes ni Esau nga iduldulinna iti balay sana insuot ken ni Jacob.

¹⁶Binalkotna iti lalat ti kalding dagiti takiag ni Jacob ken ti paset ti tengngedna nga awan dutdotna.

¹⁷Intedna kenkuana ti naimas a potahe agraman ti tinapay a linutona.

¹⁸Napan ni Jacob iti ayan ni tatangna ket kinunana, “Tatang.” Insungbat ni Isaac, “Apay? Siasinoka, anakko?”

¹⁹Ket kinuna ni Jacob, “Siak ni Esau nga inauna nga anakmo. Tinungpalko ti imbagayo kaniak. Bumangonkayon. Adtoyen ti karne ti ugsa nga insangpetko. Mangankayon sadakto bendisionan.”

²⁰“Nagbiitka metten, anakko? Sadino ti naganupam?” kinuna ni Isaac. “Tinulongannak ti APO a Diosyo!” insungbat ni Jacob.

²¹“Umasidegka man ta arikapenka,” kinuna ni Isaac. “Pudno kadi a sika ni Esau?”

²²Immasideg ni Jacob iti amana. Inarikap ni Isaac ti anakna ket kinunana, “Kasla timek ni Jacob ti timekmo ngem kasla takkiag ni Esau dagiti takkiagmo.”

²³Dina nabigbig ni Jacob agsipud ta barbonan dagiti imana a kas ken ni Esau. Bendisionanna koman

²⁴ngem sinaludsodna manen, “Pudno kadi a sika ni Esau?”

²⁴“Wen, siak,” insungbat ni Jacob.

²⁵Kinuna ni Isaac, “Itedmo ngaruden ti linutom ta bendisionankanto inton malpasak a mangan.” Inyasideg ni Jacob ti taraon agraman ti arak nga inumen.

²⁶Kinuna ni Isaac, “Umasidegka, anakko, ket ungngoannak.”

²⁷Bayatⓐ ti yaasidegna, nasay-up ni Isaac ti kawes ni Jacob isut' gapuna nga intedna ti bendisionna a kunana,

²⁷“Nabanglo 'toy anakko; mayarig ti angot toy anakko iti bang-i ti talon a binendisionan ti APO.

²⁸Ited koma ti Dios kenka ti linnaaw ti langit ket padam-egenna dagiti talonmo. Ikkannaka koma iti adu a trigo ken arak.

²⁹Agserbiⓑ koma kenka dagiti nasion ket agrukbab kenka dagiti tattao. Iturayam koma dagiti kabagiam ket agrukbab koma kenka dagiti kaputotan ni inam. Mailunod koma dagiti mangilunod kenka ket mabendisionan dagiti mangbendision kenka.”

³⁰Apaman a nakapanaw ni Jacob kalpasan ti panangbendision kenkuana ni Isaac, simmangpet met ni Esau a kabsatna a naggapu iti paganupan.

³¹Nangluto ni Esau iti naimas a potahe ket impanna ken ni tatangna. “Bumangonkayon, tatang,” kinunana, “ket kanenyo ti insangpetko tapno mabalinmo nga ited ti bendisionmo kaniak.”

³²“Siasinoka?” sinaludsod ni Isaac. “Siak ni Esau nga inauna nga anakmo,” insungbatna.

³³Kasta unay ti panagpigerger ni Isaac ket kinunana, “Siasino ngarud daytay nangyeg iti karne a sindak sakbay a simmangpetka? Intedko kenkuana ti maudi a bendisionko. Kukuanan iti agnanayon.”

³⁴Idi mangngeg daytoy ni Esau, nagsangit iti napigsa ken nasaem ket kinunana, “Bendisionannak met koma, tatang!”

³⁵Ngem kinuna ni Isaac, “Inallilawnak ti kabsatmo, isu a naalana ti bendision nga itedko koma kenka.”

³⁶“Maikaduaⓒ daytoyen a panangsaurna kaniak,” kinuna ni Esau. “Isu met la gayam a Jacob[57] ti naganna. Innalana ti kalintegak a kas inauna nga anak ket ita, inagawna manen ti bendision nga agpaay kaniak. Awan kadi ti nabati a bendision nga agpaay kaniak?”

³⁷Simmungbat ni Isaac, “Awanen ti maitedko kenka, anakko. Dinutokakon a mangituray kenka ket pinagbalinkon nga adipenna dagiti amin a kabagianna. Intedkon kenkuana ti trigo ken arak, isu nga awanen ti nabati.”

³⁸Intuloyⓓ ni Esau ti panagpakpakaasina ken ni tatangna. Kinunana, “Maymaysa la kadi ti bendisionmo, tatang? Bendisionannak met kadi, tatang!” Rinugianna ti nagsangit.

³⁹Kinunaⓔ ni Isaac kenkuana, “Saanto a nadam-eg ti dagam. Saanto a malinnaawan ti talonmo.

⁴⁰Agbiagkantoⓕ babaen iti kampilanmo ngem agbalinkanto nga adipen ni kabsatmo. Nupay kasta, no busorem makalapsutka iti pannakabalinna.”

⁴¹Ginura ni Esau ti kabsatna ta isu ti binendisionan ti amada. Kinuna ni Esau iti panunotna, “Uray ta asidegen ti ipapatay ni tatang. Patayekto ni Jacob kalpasan ti tiempo ti panagdung-aw.”

⁴²Ngemⓖ idi naammoan ni Rebecca ti panggep ni Esau, pinaayabanna ni Jacob ket kinunana, “Denggem, kayatnaka a patayen ni Esau a kabsatmo tapno makaibales.

⁴³Ita, anakko, tungpalem ti ibagak. Dagdagusem ti agrubbuat ket inka agkamang idiay Haran, iti balay ni ulitegmo a Laban.

⁴⁴Agyanka pay laeng sadiay agingga nga agbaaw ti pungtot ti kabsatmo

⁴⁵ket malipatanna ti inaramidmo kenkuana. Mangibaonakto iti umay mangala kenka. Diak kayat a mapukawkayo a dua nga annakko iti isu met la nga aldaw.”[58]

⁴⁶Kinuna ni Rebecca ken ni Isaac, “Mapulkokanakon kadagiti ganggannaet nga assawa ni Esau. No mangasawa met ni Jacob iti maysa a Heteo a kas kadakuada, nasaysayaat laengen a matayak.”