Genesis 28:1-22 RIPV1996 - Bible AI

¹Inayaban ni Isaac ni Jacob, kinablaawanna ti anakna ket imbilinna, “Dika mangasawa iti taga-Canaan.

²Agrubbuatka ket inka idiay Padan-aram, iti ili ni Betuel nga apongmo. Mangasawaka iti taga-sadiay, maysa kadagiti annak ni ulitegmo a Laban.

³Bendisionan koma ti Dios a Mannakabalin-amin ti kallaysayo ket ikkannakayo iti adu nga annak tapno agbalinka nga ama ti dakkel a nasion.

⁴Bendisionannakaⓗ koma ken ti kaputotam a kas iti panangbendisionna ken ni Abraham. Ket sapay koma ta matagikuam ti daga a nagnaedam, ti daga nga inted ti Dios ken ni Abraham.”

⁵Pinarubbuatan ni Isaac ni Jacob a mapan idiay Mesopotamia, iti ayan ni Laban nga anak ni Betuel nga Arameo. Ni Laban ti kabsat ni Rebecca nga ina da Jacob ken Esau.

⁶Naammoan ni Esau ti panangbendision ni Isaac ken ni Jacob ken ti panangibaonna kenkuana idiay Mesopotamia tapno agbirok sadiay iti asawaenna. Naammoanna met nga idi binendisionanna ni Jacob, imbilinna a di mangas-asawa iti taga-Canaan.

⁷Naammoanna a tinungpal ni Jacob ti bilin dagiti nagannak kenkuana ket napan idiay Padan-aram.

⁸Naawatan ngarud ni Esau nga iparit ti amana a mangasawa iti taga-Canaan.

⁹Iti kasta, napan ni Esau iti ayan ni Ismael nga anak ni apongna nga Abraham, ket inasawana ni Mahalat a kabsat ni Nebayot ken anak ti ulitegna.

¹⁰Pimmanawⓘ ni Jacob idiay Beerseba ket nagturong idiay Haran.

¹¹Lumneken ti init idi dumteng iti maysa a disso ket sadiay ti nangpalabasanna iti rabii. Maysa a bato ti nagpungananna a naturog.

¹²Itiⓙ dayta a rabii, natagtagainepna nga adda agdan a dumanon sadi langit ket adda dagiti angheles ti Dios nga umuli-umulog sadiay.

¹³Pagammoan,ⓚ nakitana ni Yahweh nga agtaktakder iti dennana.[59] “Siak ni Yahweh a Dios ni Abraham ken ni Isaac,” kinunana. “Itedkonto kenka ken iti kaputotam daytoy a daga a pagid-iddaam.

¹⁴Umaduntoⓛ ti kaputotam—kaslanto tapok ti kaaduda. Agwarasdanto iti amin a lugar ket dawatento dagiti amin a nasion a bendisionak met ida a kas iti panangbendisionko kenka ken kadagiti kaputotam.[60]

¹⁵Laglagipem nga addaakto kenka ket salaknibankanto iti amin a papanam. Isublikanto ditoy a daga. Dikanto baybay-an agingga a maaramidko ti amin nga inkarik kenka.”

¹⁶Nakariing ni Jacob ket kinunana, “Adda gayam ditoy a lugar ti APO! Diak ammo nga adda!”

¹⁷Nagbuteng ket kinunana, “Nakabutbuteng daytoy a lugar! Daytoy la ketdi ti balay ti Dios! Daytoy ti ruangan nga agturong sadi langit!”

¹⁸Kabigatanna, nasapa a bimmangon ni Jacob. Innalana ti bato a nagpungananna sana impatakder a kas baton-lagip; binukbokanna iti lana tapno maidaton iti Dios.

¹⁹Pinanagananna ti lugar iti Betel.[61] (Luz idi ti nagan daytoy nga ili.)

²⁰Insapata ni Jacob ken ni Yahweh a Dios, “No addaka kaniak ket salaknibannak iti daytoy a panagdaliasatko, no ikkannak iti taraon ken kawes,

²¹ken no agsubliak a sikakaradkad iti balay ni tatangko, sikanto ti Diosko.

²²Iti daytoy a lugar a nangipatakderak iti baton-lagip, agdaydayawto kenka dagiti tattao ket itedkonto kenka ti apagkapullo ti amin nga itedmo kaniak.”