Genesis 29:1-35 RIPV1996 - Bible AI

¹Intuloy ni Jacob ti panagdaliasatna agingga a dimmanon iti daga ti Daya.

²Nakakita iti bubon iti taltalon. Iti aglikmutna, adda tallo nga arban ti karnero nga agin-inana, ta sadiay ti pakapainumanda. Adda dakkel a bato a kalub ti bubon

³ket sa la maikkat no maurnongen dagiti karnero. Kalpasan a mapainum dagiti agpaspastor ti arbanda, ikalubda met la ti bato.

⁴“Taga-anokayo, gagayyem?” sinaludsod ni Jacob kadagiti agpaspastor nga adda sadiay. “Taga-Harankami,” insungbatda.

⁵“Am-ammoyo kadi ni Laban nga apoko ni Nahor?” kinunana. “Wen, am-ammomi,” insungbatda.

⁶“Kumusta met ti kasasaadna?” sinaludsodna. “Nasayaat met,” insungbatda. “Daydiay man ni Raquel nga anakna agraman dagiti karnero ni tatangna.”

⁷Kinuna ni Jacob, “Yantangay ta nasapa pay, ken di pay tiempo ti panagyapon, apay a diyo painumen dagiti karnero sayo ipaarab manen ida?”

⁸Insungbatda, “Saan a mabalin ta urayenmi pay nga adda amin ditoy dagiti karnero sakamto itulid ti bato ket painumenmi ida.”

⁹Makisarsarita pay laeng ni Jacob kadakuada idi dumteng ni Raquel ken dagiti ipaspastorna a karnero ni tatangna.

¹⁰Apaman a nakita ni Jacob ti balasang ken ti arban ni Laban nga ulitegna, napan iti bubon, inikkatna ti bato a naiserra sana pinainum dagiti animal.

¹¹Inasitganna ni Raquel ket inagkanna. Uray la nagsangit ni Jacob iti ragsakna.

¹²Imbagana kenkuana, “Kaanakannak ni tatangmo. Siak ti anak ni ikitmo a Rebecca.”

¹²Nagtaray ni Raquel a napan nangibaga ken ni tatangna iti daytoy.

¹³Idi mangngeg ni Laban ti maipapan ken ni Jacob a kaanakanna, nagtaray a napan nangsabat kenkuana. Inarakup ken inagkanna ni Jacob sana inyawid iti taengda. Sinarita ni Jacob ken ni Laban ti amin a napasamak.

¹⁴Kinuna ni Laban, “Wen, pudno nga agkabagianta!”

¹⁴Makabulan a nagyan sadiay ni Jacob.

¹⁵Kinuna ni Laban ken ni Jacob, “Saan a gapu ta agkabagianta ket agtrabahoka kaniak nga awan tangdanmo. Manot' kayatmo a sueldo?”

¹⁶Dua ti babbalasang nga annak ni Laban: ni Lea nga inauna ken ni Raquel nga inaudi.

¹⁷Napungay dagiti mata ni Lea, ngem napintas ni Raquel ken nasippukel ti pammagina.

¹⁸Adda panagayat ni Jacob ken ni Raquel, isu a kinunana, “Agserbiak kenka iti pito a tawen no la ket ipalubosmo nga asawaek ni Raquel.”

¹⁹Insungbat ni Laban, “Kaykayatko a sika ti mangasawa ken ni Raquel ngem ti sabali a lalaki. Agyanka ditoyen.”

²⁰Pito a tawen a nagserbi ni Jacob tapno maasawana ni Raquel. Dina napupuotan ti panaglabas dagiti tawen ta ay-ayatenna unay ni Raquel.

²¹Kinuna ni Jacob ken ni Laban, “Nalpasen ti pito a tawen. Ipalubosmon nga asawaek ti anakmo.”

²²Ngarud, nagpaboda ni Laban ket inawisna ti amin nga agnaed iti dayta a lugar.

²³Ngem iti rabii ti parambak, saan a ni Raquel ti impanna iti kuarto ni Jacob no di ket ni Lea ket isu ti kinaidda ni Jacob. (

²⁴Inted ni Laban ti tagabuna a babai nga agnagan Zilpa ken ni Lea nga anakna tapno agserbi kenkuana.)

²⁵Sa la naammoan ni Jacob iti sumuno a bigat a ni Lea ti kinaiddana. Napan ken ni Laban ket sinidirna, “Apay a kastoy ti inaramidmo kaniak? Nagserbiak kenka tapno maasawak ni Raquel. Apay nga inallilawnak?”

²⁶“Agpayso ti kunam ngem dimi ugali ditoy nga ipaasawa nga umun-una ti inaudi,” insungbat ni Laban.

²⁷“Palpasem pay daytoy makalawas a rambak ti kasar. Itedkonto kenka ni Raquel no la ket agtrabahoka pay kaniak iti pito a tawen.”

²⁸Immanamong ni Jacob ket idi malpas ti rambak, inted ni Laban kenkuana ni Raquel a kas asawana. (

²⁹Inted ni Laban ti tagabuna a babai nga agnagan Bilha ken ni Raquel tapno agserbi kenkuana.)

³⁰Iti kasta, kinaidda met ni Jacob ni Raquel; ad-adda nga ay-ayatenna ni Raquel ngem ni Lea. Ket nagtrabaho ken ni Laban iti pito pay a tawen.

³¹Ammo ni Yahweh a saan nga ay-ayaten unay ni Jacob ni Lea, isut' gapuna nga inikkanna iti gundaway nga aganak. Ngem nagtalinaed nga awan anak ni Raquel.

³²Nagsikog ni Lea ket naganak iti maysa a lalaki. “Ammo ti APO ti parikutko. Ita, awan duadua nga ayatennakon ti asawak,” kinunana. Isut' gapuna a pinanagananna ti maladaga iti Ruben.[62]

³³Nagsikog manen ni Lea ket naganak iti lalaki. “Inted pay kaniak ti APO daytoy nga anak ta naammoanna a dinak ay-ayaten ti asawak,” kinunana. Isut' gapuna a pinanagananna ti maladaga iti Simeon.[63]

³⁴Nagsikog manen ket naganak iti maysa pay a lalaki. “Ita, ad-adda a maisinggalut kaniakon ni asawak, ta tallo ti annakmin,” kinunana. Isut' gapuna a pinanagananna ti maladaga iti Levi.[64]

³⁵Nagsikog manen ket naganak iti maysa pay a lalaki. “Ita, idaydayawko ti APO,” kinunana. Isut' gapuna a pinanagananna ti maladaga iti Juda.[65] Manipud idin, simmardengen nga aganak.