Genesis 48:1-22 RIPV1996 - Bible AI

¹Iti saan a mabayag, naipakaammo ken ni Jose a masakit ni Jacob, isu a napanna kinita ti amana. Intugotna da Manases ken Efraim nga annakna.

²Idi naipakaammo ken ni Jacob ti isasarungkar ni Jose nga anakna, inkarkarigatanna ti nagtugaw iti iddana.

³Kinunaⓣ ni Jacob ken ni Jose, “Nagparang kaniak ti Dios a Mannakabalin-amin idi addaak idiay Luz iti daga ti Canaan ket binendisionannak.

⁴Kinunana kaniak, ‘Paraburankanto iti adu nga annak ket agbalinto dagiti kaputotam a dakkel a nasion. Itedkonto kadakuada daytoy a daga a tagikuaenda iti agnanayon.’”

⁵Intuloy ni Jacob, “Jose, ibilangko nga annakko dagiti dua nga annakmo a nayanak ditoy Egipto. Wen, kukuak da Efraim ken Manases a kas kada Ruben ken Simeon.

⁶No addanto pay anakmo a sumaruno kadakuada, sikanton ti akinkukua. Aggapunto ti tawidda kada Efraim ken Manases.

⁷Aramidekⓤ daytoy gapu ken ni Raquel a nanangmo. Kasta unay ti ladingitko idi matay idiay Canaan, iti saan nga adayo idiay Efrata, idi agsubliak a naggapu idiay Padan-aram. Sadiay ti nangitanemak kenkuana, iti igid ti dalan nga agpa-Efrata.” (Betlehem itan ti nagan ti Efrata.)

⁸Idi makita ni Jacob dagiti annak ni Jose, sinaludsodna, “Siasino dagitoy nga ubbing?”

⁹“Isuda dagiti annakko nga imparabur kaniak ti Dios iti kaaddak ditoy Egipto,” insungbat ni Jose. Kinuna ni Jacob, “Yasidegmo ida kaniak tapno bendisionak ida.”

¹⁰Lakay unayen ni Jacob ket dandani saanen a makakita. Inyasideg ni Jose dagiti ubbing ket inarakup ken inagkan ti lakay ida.

¹¹Kinuna ni Jacob ken ni Jose, “Diak ninamnama a makitaka manen. Ita, impalubos ti Dios a makitak pay dagiti annakmo.”

¹²Innala ni Jose dagiti ubbing iti saklot ni Jacob ket nagpakleb iti daga iti sango ni amana a kas pammadayawna kenkuana.

¹³Inkabil ni Jose ni Efraim iti batog ti kannigid nga ima ni Jacob ket ni Manases iti kannawanna.

¹⁴Ngem pinagkuros ni Jacob dagiti imana ket impatayna ti kannawanna iti ulo ni Efraim uray no isu ti inaudi; ti kannigidna iti ulo ni Manases nga inauna.

¹⁵Kalpasanna, binendisionanna ida,[98]

¹⁵“Sapay koma ta bendisionan ti Dios dagitoy nga ubbing, Ti Dios a nagserbian da ammak nga Abraham ken Isaac! Sapay koma ta bendisionan ida ti Dios a nangidaldalan kaniak agpapan ita!

¹⁶Sapay koma ta bendisionan ida ti anghel a nangispal kaniak iti amin a dakes! Sapay koma ta agbiag kadakuada ti naganko ken ti nagan da ammak nga Abraham ken Isaac. Adunto koma ti annak ken kaputotanda.”

¹⁷Saan a naragsakan ni Jose idi makitana nga impatay ti amana ti makannawan nga imana iti ulo ni Efraim, isu nga innalana ti ima ti lakay tapno ipatayna iti ulo ni Manases.

¹⁸Kinunana, “Saan a kasta, tatang. Daytoy ti inauna; ipataymo ti makannawan nga imam iti ulona.”

¹⁹Nagkedked ti amana ket kinunana, “Ammok, anakko, ammok. Agbalinto met a naindaklan a tattao dagiti kaputotan ni Manases. Ngem ad-addanto a naindaklan ti inaudi a kabsatna ket agbalinto dagiti kaputotanna a natatan-ok a nasion.”

²⁰Binendisionannaⓥ ngarud ida iti dayta nga aldaw. Kinunana, “Aramatento dagiti Israelita dagiti naganyo no mangbendisionda. Kunadanto, ‘Pagbalinennakayo koma ti Dios a kas kada Efraim ken Manases.’” Kastoy ti napasamak no apay nga immun-una ni Efraim ngem ni Manases.

²¹Kalpasanna, kinuna ni Jacob ken ni Jose, “Dandaniakon matay, ngem addanto ti Dios kadakayo ket isublinakayto iti daga dagidi kapuonanyo.

²²Sika a saan ketdi a dagiti kakabsatmo ti pangtedak iti Sikem, ti bantay a nagun-odko iti pannakirangetko kadagiti Amorreo.”