Genesis 9:1-29 RIPV1996 - Bible AI

¹Binendisionanⓒ ti Dios ni Noe ken dagiti annakna. Kinunana, “Aganakkayo iti adu tapno agwaras dagiti kaputotanyo iti amin a paset ti daga.

²Kabutengdakayto dagiti amin nga animal, tumatayab ken ikan. Mayawatda amin iti turayyo.

³Ita, mabalinyo a kanen dagitoy, kasta met dagiti nalangto a mula. Itedko amin dagitoy a taraonyo.

⁴Addaⓓ laeng banag a saanyo a kanen—ti karne nga adda pay laeng darana; ngamin, ti biag adda iti dara.

⁵No adda mangpatay iti tao, patayek met, uray ti animal. Patayek met ti siasinoman a mangpatay iti padana a tao.

⁶Siasinomanⓔ a mangpatay iti tao, patayento met ti padana a tao. Ngamin, naaramid ti tao a kaasping ti Dios.

⁷“Masapulⓕ nga adu ti annakyo tapno agnaedto dagiti kaputotanyo iti amin a paset ti daga.”

⁸Kinuna ti Dios ken ni Noe ken kadagiti annakna,

⁹“Ita, makitulagakon kadakayo ken kadagiti kaputotanyo

¹⁰ken kadagiti amin nga adda biagna—amin a tumatayab, ken amin nga animal—amin a kinaduam a rimmuar iti daong.

¹¹Daytoy ti pagtutulagantayo: Ikarik a saankonton a pukawen ti amin a sibibiag—awanton ti layus a mangdadael iti daga.

¹²Kas pakakitaan iti agnanayon a tulagko kadakayo ken iti amin nga adda biagna,

¹³ikabilko ti bullalayawko iti ulep. Daytoy ti tanda ti pannakitulagko iti lubong.

¹⁴Tunggal adda ulep iti tangatang ket agparang ti bullalayaw,

¹⁵laglagipekto ti karik kadakayo ken kadagiti animal nga awanton ti layus a mangpukaw kadagiti amin a parsua.

¹⁶No agparang ti bullalayaw iti ulep, makitakto ket malagipko ti agnanayon a pannakitulagko kadagiti amin a sibibiag a parsua iti daga.”

¹⁷Kinuna ti Dios ken ni Noe, “Daytoy ti pagilasinan ti tulagko kadagiti amin a sibibiag a parsua.”

¹⁸Adtoy dagiti annak ni Noe a kinaduana iti daong: da Sem, Ham ken Jafet. (Ni Ham ti tatang ni Canaan.)

¹⁹Isuda a tallo ti kapuonan dagiti amin a tattao ditoy daga.

²⁰Mannalon ni Noe ket isu ti immuna a nagmula iti ubas.

²¹Iti naminsan, nabartek iti yiinumna iti arak ti ubas; inuksobna ti pagan-anayna sa nagidda a lamolamo iti toldana.

²²Idi nakita ni Ham a lamolamo ti amana, napanna imbaga kadagiti dua a kakabsatna.

²³Nangala da Sem ken Jafet iti kagay ket inyabadayda kadagiti abagada. Simrekda a sitatallikud iti tolda sada inabbongan ti bagi ni tatangda; saanda a simmango tapno saanda a makita a lamolamo.

²⁴Idi namunawan ni Noe ket naammoanna ti inaramid ti inaudi nga anakna,

²⁵kinunana,

²⁵“Mailunod koma ni Canaan! Agbalinto a tagabu dagiti kakabsatna.

²⁶Madaydayaw ti APO a Dios ni Sem! Agbalinto ni Canaan a tagabu ni Sem.

²⁷Palawaen koma ti Dios ti sakup ni Jafet.[23] Makipagnaed koma dagiti kaputotanna kadagiti tattao ni Sem. Agbalinto ni Canaan a tagabu ni Jafet.”

²⁸Tallo gasut ket limapulo a tawen ti panagbiag ni Noe kalpasan ti layus.

²⁹Agtawen iti 950 idi matay.