Habakuk 3:1-19 RIPV1996 - Bible AI

¹Kararag daytoy ni profeta Habakuk:

²O APO, nadamagko dagiti inaramidmo,

²ket kasta unay ti siddaawko. Aramidem met kadi ita dagiti naindaklan a gapuanam? Mangngaasika kadi uray no makapungtotka?

³Umay manen ti Dios manipud Teman; umay ti Nasantoan a Dios manipud kadagiti turod ti Paran. Abbongan ti dayagna ti tangatang; mapno ti daga iti pannakaidaydayawna.

⁴Umay a buyogen ti raniag ti kimat; tumpuar ti lawag iti imana, a nakailemmengan ti pannakabalinna.

⁵Ibaonna ti sakit iti sangoananna; bilinenna a sumaruno ti patay.

⁶Agginggined ti daga no agsardeng; agkintayeg dagiti nasion no tumalliaw. Margaay dagiti agnanayon a bantay; lumned dagiti agnanayon a turod, dagiti turod a nagnaanna idi un-unana.

⁷Nakitak a nagbuteng dagiti taga-Cusan, ket nagtigerger dagiti taga-Midian.

⁸Pinagpungtotdaka kadi dagiti karayan, O APO? Ti kadi baybay ti nangpaunget kenka? Nagsakayka kadagiti ulep; dagiti ulep a mangyeg iti bagio ti nagluganam, idi yegmo ti balligi kadagiti tattaom.

⁹Nagsaganaka a mangusar iti baim, sisasaganaka a mangibiat kadagiti panam. Inugisam ti daga kadagiti karayan.

¹⁰Nakitadaka dagiti bantay ket nadayyegda; nagtinnag ti napigsa a tudo. Nagdaranudor dagiti danum iti uneg ti daga, ket dimmakkel dagiti dalluyonda.

¹¹Iti gilap ti bumanesbes a panam ken ti rimat ti sumilsilap a gayangmo, nagintek ti init ken ti bulan.

¹²Sipupungtotka a nagdaliasat iti daga, siuungetka a nangbaddebaddek kadagiti nasion.

¹³Napanmo insalakan dagiti tattaom ken ti pinilim nga arim. Pinapataymo ti pangulo dagiti managdakdakes, ket inkisapmo a namimpinsan dagiti pasurotna.

¹⁴Sinalput dagiti panam ti pangulo ti armadana, idi immay ti armada a kas bagio a mangwarawara kadakami, a siraragsak a kas kadagiti sililimed a mangidadanes kadagiti napanglaw.

¹⁵Sikakabalioka a nangbaddebaddek iti baybay, ket nagburek ti nadawel a danum.

¹⁶Mangngegko amin dagitoy ket agkintayegak; agtigerger dagiti bibigko iti buteng. Agkapsut ti bagik, ket agkutukot dagiti tumengko.[2] Anusak nga urayen ti idadateng ti tiempo a panangdusa ti Dios kadagiti mangraut kadakami.

¹⁷Uray no awan ti bunga dagiti igos, ken awan ti bunga dagiti ubas; uray no awan maapit nga olibo ken awan maapit kadagiti talon; uray no matay dagiti amin a karnero, ken awan nagyan ti pagaponan dagiti baka;

¹⁸agrag-oakto latta iti APO agragsakakto iti Dios a salakanko.

¹⁹Papigsaennakⓕ ti APO. Pasiglatennak a kas iti ugsa ken papagnaennak kadagiti nangato ken natalged a disso.