Isaias 13:1-22 RIPV1996 - Bible AI

¹Adtoyⓕ ti mensahe ti Dios maipapan iti Babilonia nga impakaammona ken ni Isaias nga anak ni Amoz.

²Iti tapaw ti natikag a bantay, ibayogyo ti bandera a mangipakaammo iti gubat! Pukkawanyo dagiti mannakigubat ket ingatoyo dagiti imayo a pagilasinanda iti idadarupda kadagiti ruangan ti natangsit a siudad.

³Inayaban ti APO dagiti maingel ken matalek a soldadona a mangiwayat iti gubat a pangdusa kadagiti tattao a kapungtotna.

⁴Denggenyo ti arimbangaw iti tapaw dagiti bantay—ti ariwawa ti nakaad-adu a tattao, ti ariwawa dagiti nasion ken pagarian nga aguummong! Pagsagsaganaen ni Yahweh dagiti armada dagiti soldadona a makigubat.

⁵Aggapuda kadagiti adayo a pagilian, kadagiti pungto ti daga. Iti pungtot ti APO, umayna dadaelen ti entero a daga.

⁶Agdung-awkayo!ⓖ Asidegen ti aldaw ti APO, aldaw a panangidissuor ti Mannakabalin-amin iti pannakadadael!

⁷Malpayto ti ima ti tunggal maysa ket mapukawto ti turedda.

⁸Agkullayawdanto iti buteng ket agrigatdanto a kas iti agpasikal. Sibubutengdanto nga agkikinnita ket makitanto iti rupada ti pannakalapunosda iti bain.

⁹Dumtengen ti aldaw ti APO. Wen, dumtengen ti naranggas nga aldaw a panagbettak ti pungtotna. Pagbalinennanto a let-ang ti daga ket pukawennanto dagiti amin a managbasol.

¹⁰Saantoⓗ nga agraniag dagiti bituen ken dadduma pay a grupo dagiti bituen iti tangatang. Nasipngetto ti init no sumingising ket dinto agsilnag ti bulan.

¹¹Kuna ti APO, “Dusaekto ti lubong gapu iti kinadakesna, kasta met dagiti managbasol gapu iti kinakilloda. Ipababakto dagiti natangsit ken naranggas.

¹²Manmanonto a kas iti balitok dagiti makalasat.

¹³Pagkintayegekto ti langit ket mayalisto ti daga iti ayanna iti dayta nga aldaw inton siak, ni Yahweh a Mannakabalin-amin, ipakitak ti pungtotko.

¹⁴“Agtatarayto dagiti ganggannaet nga agnanaed idiay Babilonia ket agsublida kadagiti ilida. Mawarawaradanto a kas kadagiti ugsa a kamkamaten dagiti aganup. Mayarigdanto kadagiti karnero nga awan ti pastorda.

¹⁵Maduyokto agingga a matay ti siasinoman a matiliw.

¹⁶Buybuyaendanto a marumrumek dagiti maladagada, masamsam dagiti sanikuada ken marames dagiti assawada, ngem awanto ti maaramidda.”

¹⁷Kuna ti APO, “Sugsogakto dagiti taga-Media[20] a mangraut iti Babilonia. Saanda a pagan-ano ti pirak ket saanda a masulisog iti balitok.

¹⁸Babaen kadagiti panada, papatayendanto dagiti agtutubo a lallaki. Awanto ti kaasianda a maladaga ket patayendanto amin nga ubbing.

¹⁹Tiⓘ Babilonia ti kapintasan a pagarian. Isu ti pagtangtangsit dagiti tattaona. Ngem siak, ni Yahweh, dadaelekto ti Babilonia a kas iti inaramidko iti Sodoma ken Gomorra!

²⁰Awanton a pulos ti agnaed sadiay. Awanton ti Arabo a mangipatakder iti toldana wenno agpaspastor a mangipaarab iti arbanna sadiay.

²¹Pagnaedantoⓙ dagiti animal ti let-ang ket sadiayto ti pagumokan dagiti kullaaw. Agnaedto sadiay dagiti abestrus ket agtaraytarayto dagiti atap a kalding kadagiti nadadael a patakder.

²²Agallangoganto dagiti pagwanawanan ken dagiti palasio iti taul ken taguob dagiti lobo ken aso ti bakir. Adtoyen ti naituding a tiempo ti Babilonia. Dandanin aggibus dagiti aldawna.”