Isaias 21:1-17 RIPV1996 - Bible AI

¹Daytoy ti pakdaar maipapan iti Babilonia. Kas iti alipugpog a lumasat iti let-ang, dumtengto ti didigra nga aggapu iti nakabutbuteng a daga.

²Adda nakitak a parmata dagiti nakaam-ames a pasamak, maysa a parmata maipapan iti panangliput ken pannakadadael.

²Dakay a soldado ti Elam, rumautkayo! Dakayo a soldado ti Media, lakubenyo dagiti siudad! Gibusan ti Dios ti panagsagaba nga inyeg ti Babilonia.

³Gapu iti nakita ken nangngegko iti parmata, nalapunosak iti buteng. Nakariknaak iti ut-ot a kasla iti ut-ot ti agpasikal.

⁴Maul-ulawak ket agtigtigergerak iti buteng. Segseggaak ti idadateng ti rabii ngem pasig a buteng ti inyegna.

⁵Iti parmatak, adda padaya a naisagana. Nayaplag dagiti alfombra a pagtugawan dagiti sangaili. Agpapangan ken agiinumda. Pagammoan, adda bilin a naipukkaw: “Dakayo nga ofisiales, isaganayo dagiti kalasagyo!”

⁶Kinuna ti Apo kaniak, “Mangibaonka iti agbantay, ket ibagam kenkuana nga ipakaammona ti makitana.

⁷No makakita kadagiti lallaki a sumungad a sagdudua a nakakabalio, ken lallaki a nagsakay kadagiti asno ken kamelio, ibagam a siputanna ida a naimbag.”

⁸Ipukkaw ti agbambantay, “Apo, aldaw ken rabii nga addaak iti lugarko nga agguguardia.”

⁹Pagammoan,ⓣ adtoyen dagiti lallaki a nakakabalio a sagdudua ket ipakaammo ti agbambantay, “Naparmeken ti Babilonia! Agkaiwaran dagiti naburakburak nga imahen dagiti didiosen a nagdaydayawanda.”

¹⁰Dakay a kailiak, nairikkayo a kas iti trigo. Ngem ita, impakaammokon kadakayo ti naimbag a damag a nangngegko iti APO a Mannakabalin-amin a Dios ti Israel.

¹¹Daytoy ti pakdaar maipapan iti Edom. Manipud Edom adda umawag kaniak, “Guardia, atiddog pay kadi ti rabii? Mabayag pay kadi ti panagbannawagna?”

¹²Kunak, “Agbannawagen, ngem umayto met la ti rabii. No kayatmo manen ti agsaludsod, agsublika ket agsaludsodka latta.”

¹³Daytoy ti pakdaar maipapan iti Arabia. Tattao ti Dedan, dakayo nga agbibiahe a nabunggo-bunggoy, ken agkampo iti namaga a pagilian ti Arabia,

¹⁴painumenyo dagiti tattao a mawaw nga umay kadakayo. Dakay a tattao iti Tema, ikkanyo iti taraon dagiti umay agkamang kadakayo.

¹⁵Itartarayan dagiti tattao dagiti kampilan a sisasagana a mangpapatay kadakuada, dagiti pana a sisasagana a maibiat kadakuada ken dagiti amin a peggad ti gubat.

¹⁶Kalpasanna, kinuna ti APO kaniak, “Iti las-ud ti makatawen, agpatingganto ti pannakabalin dagiti tribu ti Kedar.

¹⁷Dagiti pumapana ti katuredan a lallaki ti Kedar, ngem manmanonto kadakuada ti matda. Daytoy ti saok, ni Yahweh a Dios ti Israel.”