Isaias 23:1-18 RIPV1996 - Bible AI

¹Daytoyⓦ ti pakdaar maipapan iti Tiro. Umkiskay iti ladingit, dakayo nga aglaylayag iti taaw! Nadadaelen ti Tiro a pagaw-awidanyo. Narban dagiti balbalayna ken dagiti pantalanna. Inton agsubli dagiti barkoyo nga aggapu idiay Chipre, maammoanyo ti damag.

²Aglimdokayo, dakayo nga agtagtagilako a taga-Sidon! Imbaonyo dagiti tattaoyo

³nga aglayag iti baybay tapno aggatang ken aglakoda kadagiti trigo a naapit idiay Egipto ken tapno agkomersioda kadagiti amin a nasion.

⁴Sika, siudad ti Sidon, naibabainkan. Laksidendaka ti baybay ken dagiti lansad ti taaw. Kunada, “Awan ti annakko. Awan ti tinagibik nga annak a lallaki wenno babbai.”

⁵Uray dagiti Egipcio, maklaat ken agladingitdanto inton madamagda a nadadaelen ti Tiro.

⁶Umkiskay iti ladingit, dakay a tattao ti Fenisia![26] Padasenyo ti agkamang idiay Tarsis!

⁷Daytoy kadi ti naragsak a siudad ti Tiro a nabangon idi un-unana? Daytoy kadi ti siudad a nangibaon kadagiti tattao iti ballasiw ti taaw tapno agbangonda kadagiti ilida?

⁸Siasino ti nangyeg kadagitoy iti Tiro, dayta natan-ok a siudad, a dagiti komersiantena isuda dagiti madaydayaw unay a tattao ditoy daga?

⁹Inaramid daytoy ti APO a Mannakabalin-amin tapno gibusanna ti kinapalangguadda gapu iti inaramidda ken tapno ibabainna dagiti natan-ok a tattaoda.

¹⁰Inkay talonen ti daga, dakayo a tattao nga agnanaed iti sakup ti Tarsis! Awanen ti mangsalaknib kadakayo.

¹¹Inlayat ti APO ti imana iti baybay, ket pinarmekna dagiti pagarian. Imbilinna a madadael dagiti kangrunaan a lugar a paglakoan idiay Fenisia.

¹²Siudad ti Sidon, nagpatinggan ti ragragsakmo. Maparparigat dagiti tattaom, ket uray no agkamangda idiay Chipre saandanto a natalged sadiay.

¹²(

¹³Dagiti taga-Babilonia,[27] saan a dagiti taga-Asiria, ti nangipalubos kadagiti atap nga animal a mangdadael iti Tiro. Dagiti taga-Babilonia ti nangbangon kadagiti torre a pagwanawanan. Rinebbada dagiti sarikedked ti Tiro, ket binaybay-anda ti siudad a nadadael.)

¹⁴Umkiskayo iti ladingit, dakayo nga aglaylayag iti taaw! Nadadaelen ti siudad a nagtaltalkanyo.

¹⁵Dumtengto ti tiempo nga awanto ti makalagip iti Tiro iti las-ud ti pitopulo a tawen, ti kapaut ti panagbiag ti maysa nga ari. Inton aggibus dagita a tawen, mayarigto ti Tiro iti balangkantis a babai iti kanta:

¹⁶Alaem ti arpam, ket sursorem ti ili, sika a nalipatan a balangkantis a babai! Agtokarka ken kantaem manen dagiti kantam tapno umay manen kenka dagiti lallaki.

¹⁷Inton malpas ti 70 a tawen, talliawento manen ti APO ti siudad ti Tiro. Agsublinto ti Tiro ti sigud a panggedanna ket agserbinto a patangdanan kadagiti amin a pagarian ditoy lubong.

¹⁸Maidatonto iti APO ti kuarta a matgedanna iti negosiona. Dinanto urnongen wenno idulin ti kuartana ngem maigatangto iti taraon ken kawes dagiti agdaydayaw iti APO.