Isaias 48:1-22 RIPV1996 - Bible AI

¹Denggenyo daytoy, O balay ni Jacob, dakay a maawagan iti Israel, dakay a kaputotan ni Juda. Agsapatakayo iti nagan ti APO, ket kunayo nga agdaydayawkayo iti Dios ti Israel, ngem saan a pudno ti sasawenyo.

²Ket kaskasdi a natangsitkay a mangibaga nga umilikay iti nasantoan a siudad, ket agtalekkay iti Dios ti Israel nga APO a Mannakabalin-amin ti naganna.

³Kuna ti APO iti Israel, “Nabayagen nga impadtok ti mapasamakto; ket kellaat nga inaramidko!

⁴Ammok a nasukirkayo, a natangkenkayo a kas landok, kaskayo la bronse a di makillo.

⁵Nabayagen nga impadtok ti masakbayanyo, impakaammok dagiti mapasamak sakbay a maaramidda, tapno diyo kuna a gapuanan ida dagiti didiosen ken imahenyo.

⁶“Pimmayso dagiti amin nga impakaunak; annugotenyo a pudno dagiti padtok. Ita, ibagak a dumteng dagiti baro a bambanag, a diak pay impakaammo kadakayo a paspasamak.

⁷Ita laeng nga ipalubosko a matungpalda; awan kastoy a napasamak idi. No adda, mabalinyo la koma a kunaen nga ammoyo amin ti maipapan kadagitoy.

⁸Ammok a dikay mapagtalkan, ket manipud pannakayanakyo agdindinamagen ti kinasukiryo. Saanyo pay a nangngegan wenno naammoan daytoy ta dagiti lapayagyo nasullatanda manipud un-unana.

⁹“Tapno madaydayaw ti naganko, tiptipdek ti panagungetko; igawgawidko ket saankayto a dadaelen.

¹⁰Ginugorankayo iti apuy ti panagsagaba, kas iti pannakagugor ti pirak iti urno; ngem natakuatak nga awan serserbiyo.

¹¹Ti aramidek, aramidek gapu kaniak— diakto ipalubos a maibabain ti naganko, wenno adda sabali a mangala iti dayagko a nairanta a siak laeng ti pagpaayanna.”

¹²Kuna ni Yahweh, “Denggendak,ⓞ Jacob ken Israel nga inayabak! Siak ti Dios, ti umuna, ti maudi, ti maymaysa a Dios!

¹³Impasdekko dagiti fondasion ti daga; inyukradko dagiti langlangit. No awagak ti langit ken daga, umayda a dagus ket dumatagda.

¹⁴“Aguummongkayo, dakay amin, ket denggendak! Awan kadagiti didiosen ti makaipadto a ti pinilik a tao rautenna ti Babilonia; aramidennanto ti kayatko nga aramidenna.

¹⁵Siak ti nagsao ken nangayab kenkuana, inyegko ti balligina.

¹⁶“Umasidegkayo kaniak ket denggenyo ti ibagak. Manipud idi damo, awan inlimlimedko a sao inkagumaak a matungpal amin nga imbagak.” (Ita, inted ni Apo DIOS ti pannakabalinna, ket imbaonnak.)

¹⁷Ti Nasantoan a Dios ti Israel, ni Yahweh a nangisalakan kadakayo, kunana: “Siak ni Yahweh a Diosyo, ti mangisuro kadakayo iti pagimbaganyo ken mangidalan iti rumbeng a papananyo.

¹⁸“No impangagyo dagiti bilinko, nagayus koma ti bendision nga agpaay kadakayo, kas iti waig a di maibus ti danumna. Nagtulid koma nga immay kadakayo ti balligi kas iti panagtulid dagiti dalluyon nga agpaigid.

¹⁹Kas koma kadagiti darat ti kaadu dagiti kaputotanyo, diak koma impalubos a madadaelda.”

²⁰Panawanyoⓟ ti Babilonia ket agbalinkayo a siwawaya! Idir-iyo a siraragsak ti damag, ket ipakaammoyo iti amin a lugar: “Insalakan ti APO ti Israel nga adipenna!”

²¹Idi indalan ti APO dagiti tattaona iti napudot ken natikag a let-ang, saanda a nagsagaba iti waw. Pinagrengngatna ti bato ket pimsuak ti danum tapno adda inumenda. Wen, pinagrengngatna ti bato, ket pimsuak ti danum.

²²“Awanⓠ ti talna kadagiti managdakdakes,” kuna ti APO.