Isaias 50:1-11 RIPV1996 - Bible AI

¹Kunaⓦ ti APO: “Insinak aya dagiti tattaok ket pinapanawko ida a kas iti panangisina ti lalaki iti asawana? Ayanna ngarud ti kasuratan ti panagsinami? Inlakoka aya a kas balud a kas iti tao a mangilako kadagiti annakna a kas tagabu? Saan, naipanawkayo a kas balud gapu kadagiti dakes nga aramidyo; napagtalawkayo gapu kadagiti basolyo.

²“Apay a di nagtignay dagiti tattaok idi napanak kadakuada tapno isalakanko ida? Apay a dida simmungbat idi immawagak? Awan kadi ti bilegko a mangisalakan kadakuada? Mabalinko a bilinen ti taaw tapno agmaga; mapagbalinko a let-ang dagiti karayan ket matay dagiti ikan gapu iti kaawan ti danumda.

³Mapagsipngetko ti langit a kasla adda natay a dungdung-awanna.”

⁴Insuronak ni Apo DIOS iti sawek tapno mapapigsak ti nabannog. Binigat a paggagarennak a dumngeg iti isurona kaniak.

⁵Inikkannak ti APO iti pannakaawat, ket diak nagsukir wenno simmina kenkuana.

⁶Kadagitiⓧ mangsaplit kaniak, intayak ti bukotko; binay-ak ida a mangpabain kaniak, impalubosko a parutenda dagiti barbasko ken tupraanda ti rupak.

⁷Ngem diak maan-ano iti panangpabainda kaniak, ta tultulongannak ni Apo DIOS. Pinapuskolko ti rupak tapno makaibturak. Ammok a saanakto a maibabain,

⁸agsipudⓨ ta asideg ti Dios kaniak, ket ipaduyakyaknanto nga awan basolko. Siasino ti makaitured a mangidarum kaniak? No adda, dumatagkami iti pangukoman ket yulina ti darumna.

⁹Ni Apo DIOS ti tumulong kaniak— siasino ngarud ti makapaneknek a nagbasolak? Agpukawto dagiti mangidarum kaniak; main-inutdanto a marunot a kas iti sinanga a lupot!

¹⁰Dakay nga agbuteng iti APO ken agtungpal kadagiti sao ti adipenna— nalabit a nasipnget ti pagnaanyo ngem agtalekkayo iti APO, agpannuraykayo iti Diosyo.

¹¹Dakayo nga agpanggep a mangdadael iti padayo a tao ti panggepyonto met laeng ti pakadadaelanyo! Ti APO ti mangdusanto kadakayo; nakaay-ay-ayto ti pagbanaganyo.