Isaias 54:1-17 RIPV1996 - Bible AI

¹Jerusalem,ⓝ kaska la babai nga awan idi ti anakna; ngem ita, mabalinmon ti agkanta ken umkis iti rag-o. Ad-adunto ti anakmo ngem ti babai a di pinanawan ti asawana.

²Palawaem ti tolda a pagtaengam, silpoam dagiti talina ket palagdaem dagiti pasokna.

³Palawaemto ti masakupan dagiti beddengmo; mapasublinto dagiti tattaom ti daga a pagnanaedan ita dagiti nasion. Adunto a tattao ti agnaed kadagiti siudad a langalang ita.

⁴Dika agbuteng—dikanton maibabain; saankanton a malalais. Malipatamton ti kinagulibmo a kas asawa idi ubingka pay. Malipatamton ti nakaay-ay-ay a kasasaadmo a kas balo.

⁵Kaslanto maysa nga asawa ti pannakilangen kenka ti Namarsua— APO a Mannakabalin-amin ti naganna. Isalakannakanto ti Nasantoan a Dios ti Israel— isu ti agturay iti entero a lubong.

⁶Israel, arigmo iti ubing pay nga asawa; nabaybay-anka ket napalalo ti ladingitmo. Ngem ayabannaka manen ti APO ket kunana:

⁷“Iti apagkanito, binaybay-anka; iti nasged nga ayatko, isublika iti arpadko.

⁸Iti apagdarikmat, simged ti pungtotko ket pinanawanka. Ngem ipakitakto kenka ti agnanayon nga ayatko.” Kastoy ti kuna ti APO a mangisalakan kenka.

⁹“Idiⓞ tiempo ni Noe, inkarik a diakton layusen ti daga. Ita, ikarik a saankanton a kapungtot; dikanton ungtan wenno dusaen.

¹⁰Mabalinⓟ a margaay dagiti turod ken bantay, ngem dinto agpatingga ti panagayatko kenka. Salluadakto iti agnanayon ti tulagko iti pannakikappia.” Kastoy ti sao ti APO a mangipatpateg kenka.

¹¹Kunaⓠ ⓡ ti APO, “Nakaay-ay-ay ken agsagsagabaka, O Jerusalem, siudad nga awan ti mangliwliwa. Bangonek manen dagiti fondasionmo, agkakapateg a bato ti pangtarimaanko.

¹²Rubi ti usarekto a pangbangon kadagiti torrem. Agraniag a kas apuy dagiti batbato nga aramatek kadagiti ruanganmo. Napateg a batbato ti pangbangonko kadagiti bakudmo!

¹³“Siaktoⓢ ti mangisuro kadagiti tattaom; paraburakto ida ket rumang-ayda, addanto kappia iti sidongda.

¹⁴Patibkerrennaka ti kinalinteg ken hustisia. Awanton ti mangidadanes ken mamutbuteng kenka.

¹⁵No addanto mangdarup kenka, awan ti pammalubosko. Maparmekto ti siasinoman a mangraut kenka!

¹⁶“Parsuaek ti mammanday, isu a mangpasged iti apuy ket agpanday kadagiti armas. Siak met la ti mangparsua iti mannakigubat nga agpapatay babaen iti armas.

¹⁷Ngem awanto ti armas a makasugat kenka, ket no adda pakaidarumam, addanto latta sungbatmo a nakasagana. Salaknibakto dagiti adipenko, ket pagballigiekto ida.”

¹⁷Daytoy ti sao ti APO.