Isaias 59:1-21 RIPV1996 - Bible AI

¹Diyo ipagarup a nakapuy ti APO a mangisalakan kadakayo wenno tuleng a di makangngeg iti asugyo.

²Ngem nayadayokayo iti Dios gapu kadagiti basbasolyo, isut' gapuna a dinakay ipangag tunggal agdaydayawkayo kenkuana.

³Ngamin ta nagbasolkayo. Nagpapataykayo ken nagsaokayo iti ulbod ken panangallilaw.

⁴Dumatagkayo iti pangukoman, ngem saan a nainkalintegan dagiti pammabasolyo. Agtalekkayo iti kinaulbod tapno mangabakkayo. Ibanagyo dagiti planoyo a mangranggas iti padayo a tao.

⁵Mayarig iti makasabidong nga itlog ti nagita nga uleg dagiti dakes a panggepyo. Pis-itenyo ti itlog ket rummuar ti maysa nga uleg. Ngem awan imbag nga ited dagiti panggepyo. Awan serserbida a kas iti pagan-anay a naaramid iti sapot ti lawwalawwa.

⁷Kanayonⓒ nga agpanggepkayo iti dakes, ket agganatkayo a mangibanag. Dikay bumdeng a mangpapatay iti tao nga awan basolna. Iti sadinoman a papananyo, riribuk ken pannakadadael ti iwayatyo.

⁸Agpeggad dagiti tattao no addakayo. Dakes amin nga aramidyo. Nakillo ti pagnaanyo ket saan a natalged ti magna iti dayta a dalan.

⁹Kuna dagiti tattao, “Ita, ammomin no apay a dinakam isalakan ti Dios kadagiti mangranggas kadakami. Birokenmi ti lawag a mangsilaw iti dalanmi ngem kinasipnget la ti adda.

¹⁰Kaskami la bulsek nga agar-arikap. Maitibkolkami iti agmatuon a kasla ketdi tay rabiin. Kasla addakami iti nasipnget a lubong dagiti natay.

¹¹Maamak ken madanagankami. Segseggaanmi ti panangisalakan ti Dios kadakami a maidaddadanes ken maparparigat, ngem awan ti mauraymi.

¹²“O APO, nakaad-adu ti basolmi kenka, ket dagitoy ti agsaksi a maibusor kadakami. Bigbigenmi amin ida.

¹³Sinukirdaka, tinallikudandaka ket dimi kayat ti sumurot kenka. Pinarparigatmi ti padami a tao ket sinukirdaka. Pasig nga ulbod dagiti pampanunotenmi. Saan a pudno dagiti saomi.

¹⁴Malapdan ti hustisia ket adda iti adayo ti kinalinteg. Iti paguummongan, maitibkol ti kinapudno ket awan lugar sadiay ti kinatakneng.

¹⁵Awanen ti kinapudno, ket ti siasinoman nga agsardeng nga agaramid iti dakes isu ti biktima ti kinadakes.”

¹⁵Nakita daytoy ti APO, ket saan a maragsakan gapu ta awan ti hustisia.

¹⁶Masdaawⓓ a makakita nga awan ti uray maysa a tumulong kadagiti maparparigat. Ngarud, usarennanto ti bukodna a pannakabalin a mangisalakan kadakuada ket magun-odna ti balligi.

¹⁷Ikawesnantoⓔ ti hustisia a kas kabal ken ti panagballigi a kas helmet. Kawesannanto ti bagina iti nasged a tarigagay tapno mapalinteg ti amin a bambanag. Dusaennanto dagiti managdakdakes kas panangibalesna iti panagsagsagaba dagiti tattao.

¹⁸Dusaennanto dagiti kabusorna kas mayannurot kadagiti inaramidda, uray pay dagiti agnaed iti adayo a daga.

¹⁹Manipud daya agingga iti laud, kabutengto ti amin a tao ti nagan ken pannakabalinna. Dumtengto ti APO a kas iti napegges a karayan, kas iti napigsa nga angin.

²⁰Kunaⓕ ti APO kadagiti tattaona, “Umayakto iti Jerusalem tapno salaknibankayo ken isalakanko ti amin nga agbabawi ken mangtallikud kadagiti basolda.

²¹Ket makitulagak kadakayo: Intedkon a kukuayo iti agnanayon ti pannakabalinko ken dagiti pannursurok. Manipud ita, masapul a tungpalendak ken isuroyo dagiti annakyo ken dagiti kaputotanyo nga agtungpal kaniak iti amin a tiempo.”